Santiago 3

1Quermanotac, ja' lec te ma ba tsobolex te jp'ijubteswanej ya xc'oexe. Melel ana'ojic stojol te jo'otic te jp'ijubteswanejotique c'axem to xan ya quich'tic ich'el ta c'op yu'un te Diose. 2Ta jpisiltic bayal buelta ya xjelawotic ta c'op tey a. Teme ay mach'a ma xjelaw jp'aluc te sc'ope, lec me ta winiquil stuquel abi, soc ya xju' yu'un stojtesel spisil te sbaq'uetale. 3Te c'alal ya cac'beytic freno ta ye te caballoetique, jich me ya xch'uunbotic jmandaltic a. Jich ya xju' cu'untic stojtesel scojt'ol a te sbaq'uetale. 4Ila awilic te barcoetique: Manchuc teme c'ax muq'ue soc manchuc teme bayal yip te ic' te ya xtenot ta beel yu'une, ja'uc me to, tsail nax stuquel te stijibal te ya stojtes ta beel a te yajwal te banti stojol ya sc'an ya xbajt' soque. 5Ja' nanix jich te cac'tique, tsail nax stuquel. Ma spajbey smuc'ul spisil te bitic ay ta jbaq'uetaltique. Ja'uc me to, bayal ya jtoy jbatic ta c'op soc. Jich c'oem te bit'il ch'in c'ajc' te c'ax muc' ya xtil bael ta c'ajq'uel a te q'uinale. 6Te cac'tique jich bit'il c'ajc'. Ja' jun yawil te nojel ta mulil te ay ta jbaq'uetaltique te ya sboltes spisil te jbaq'uetaltique. Ja' nix ya xtilesbot jach'el yu'un spisil te jcuxlejaltic soc te c'ajc' te tilem tel ta bay infierno. 7Tsobol ants-winiquetic te ya xju' yu'unic smansoubtesel spisil ta jchajp ja'mal chambalametic, soc mutetic, soc chanetic, soc xchambalamul te mare. Bayal buelta ju'ix yu'unic smansoubtesel, 8ja'uc me to, ma'yuc jtuluc te ya xju' yu'un ya stojtes te yaq'ue. Ma'yuc ta comel te sbolile, melel nojel ta veneno te ya yac' lajele. 9Ja' nix ta cac'tic te ya calbeytic yutsilal sc'oplal a te Jtatic Diose, soc ja' nix ya jbolc'optaytic a te ants-winiquetic te ja' sloc'tayej sba a te Diose. 10Jun nax te quejtique te ya xloc' tey a te lequil c'ope soc te bol c'ope. Quermanotac, ma ba lec te jich ya jpastique. 11¿Ay bal ya awilic te jun nax sloc'ja' ya xloc' tel ta bay lec te ja'e soc ta bay ch'a te ja'e? 12Quermanotac, ¿ya bal spas awaiy te ya sitin olivo-te' ta banti ste'el te higo-te'e? Soc ¿ya bal xju' awaiy te ya sitin higo ta bay yac'ul te ts'usube? Ja' nanix jich ma xju' te jun nax sloc'ja' ya xloc' tel soc ta bay lec te ja'e soc ta bay ay yats'amul te ja'e. 13Teme ay ja'ex te ay sp'ijil awo'tanic soc teme ay bila ana'ojic stojole, ac'a me ta ilel ta swenta te bila lec ya apasique. Te bit'il ay sp'ijil awo'tanique peq'uel me xawac' abaic yu'un. 14Yan teme nojel awo'tanic ta bic'tal-o'tanil soc jex-o'tanil, ma me xacuy abaic te lec ayex soc te sp'ijil awo'tanique, soc ma me x'asut ta lot te bila smelelile. 15Te p'ijil-o'tanil to, ma ja'uc talem ta bay te Diose. Ja' p'ijil-o'tanil swenta balumilal, soc yu'un te ch'ich'-baq'uet, soc yu'un te pucuje. 16Melel te bic'tal-o'tanile soc te toybaile, tey ya xchicnaj guerra a soc spisil ta jchajp te bila amene. 17Yan te p'ijil-o'tanil te talem ta toyole, ma'yuc bila capal stuquel a: yich'oj lamal-o'tanil, soc lequil-o'tanil, soc yutsil-o'tanil, nojel ta c'uxul-o'tanil, soc lec te sit ya yaq'ue. Ma'yuc chebal-o'tanil soc cha'lam-o'tanil. 18Te mach'atic ya yantayic spasel te lamal q'uinale, ja' ya sts'un te lamal q'uinal soc ja' ya sc'aj te toj-o'tanile.


Copyrighted Material
Learn More

will be added

X\