Santiago 2

1Ja'ex quermanotac, te ay xch'uunjel awo'tanic ta swenta te Cajwaltic Jesucristo te jelawen yutsilal stuquele, ma me tsabiluc nax awu'unic te mach'a lec ya awilique. 2Jich bit'il teme ya x'och ta banti atsoboj abaic jtul winic te ay xch'ocow pasbil ta oro soc te buen t'ujbil te sc'u'-spac' slapoje, soc teme ya x'och yan winic te me'ba stuquel te ma'yuc stuul te sc'u'-spac' slapoje, 3soc teme bin nax awo'tan ya awic' ochel te mach'a t'ujbil sc'u'-spac' slapoje soc te jich ya awalbeye: “Naclan li'to ta bay in lequil nactijibal to”, teme ya awute, yan te me'bae jich ya awalbey stuquel: “Te ja'ate baan tec'lan lum to o naclan ta lum”, teme ya awute, 4¿ma bal yacaluquex ta stsael te mach'a lec ya awilic ta awolilique? Yu'un nanix amen awo'tanic te bit'il jich ya apasique. 5Quermanotac te bayal c'uxex ta co'tane, aiya awaiyic stojol in to: ¿Ma bal ja'uc tsabilic yu'un Dios te mach'atic me'ba ayic li'to ta balumilale? Melel ja' sc'ulejalic ya xc'ot te ay xch'uunjel yo'tanique, soc te ya x'ac'bot ainuquic tey a ta bay ay ta ajwalil te Diose, jich te bit'il yalojbey sc'oplal spisil te mach'atic c'ux ya yaiyic ta yo'tanic te Diose. 6Yan te ja'exe ya awilayic te me'bae. ¿Ma bal ja'uc ya yac'beyex awocolic te jc'ulejetique? ¿Ma bal ja'uc nix te ya yiq'uex bael ta stojol te jchajbanwanejetique? 7¿Soc ma bal ja'uc nix te jc'ulejetic te ya slabanbeyic yutsil sbiil te Dios ach'uunejique? 8Ja' to lec ya xc'oex ta stojol Dios teme ya ach'uunic spasel te smandal Dios te cajal sc'oplale, jich te bit'il ts'ibubil ta Sjun Diose: “C'ux me x'awaiy te apat-axujq'ue, jich te bit'il c'ux ya awaiy aba atuquel te ja'ate”, te xie. 9Yan teme tsabil nax awu'unic te mach'a lec ya awilique, tey la ataix amulic a soc quechelex ta yich'el castigo yu'un Dios ta swenta bit'il la ac'axintay te smandale. 10Melel te mach'a ju'ix yu'un xch'uunel te mandalil yu'un Diose, ja'uc me to, teme la xc'axintayic jp'aluque, la xc'axintayix spisil abi. 11Ja' nix stuquel te Dios te jich la yale: “Ma me x'awaiy mulwej”, te xie, soc jich la yal xan: “Ma me x'awaiy milaw”, te xie. Jich yu'un teme ma ba la awaiy mulweje, ja'uc me to, teme la awaiy milaw, la ac'axintayix spisil a te mandalile. 12Te ja'exe, ya sc'an lec ya xc'opojexe soc te lec ya awac' abaique, jich bit'il te mach'a ya yich' chajbanel yu'un te mandalile. 13Melel te mach'a ma ba la yaiy c'uxtaywaneje, ja' nanix jich ma ba ya yich' c'uxtayel uuc c'alal ya yich' ich'el ta c'op. Yan te mach'a la yaiy c'uxtaywaneje, lec me ya x'ilot stuquel te c'alal ya yich' ilel te yat'ele. 14Quermanotac, ¿bi ya xloc' yu'un a te ay mach'a ya yal te ay xch'uunjel yo'tan teme xujt' ma xchicnaj ta swenta te yat'ele? ¿Ya bal xcol yu'un awaiy ta swenta te xch'uunjel yo'tane? 15Jich bit'il teme ay jtul quermanotic, chican teme ants o teme winique, te ma'yuc sc'u'-spac' soc swe'el ya xtuun yu'un te jujun c'aale, 16soc teme ay jtulex te ja'exe te jich ya awalbeyique: “Lec ay, quermano, baan, ma me xamel awo'tan. Q'uixinan me, we'an uch'ajan, mac'lina aba ta lec”, teme ya awute, ja'uc me to, teme ma ba ya awac'bey ts'iin te bila ya xtuun yu'un soc te sbaq'uetale, ¿bila ya sta yu'un awaiy te jich la awalbeye? 17Ja' nanix jich te xch'uunjel-o'tanile, teme ma xchicnaj ta swenta te at'elile, lajem abi. 18Ay mach'a jich ya yal: “Te ja'ate ay xch'uunjel awo'tan, yan te jo'one jpasoj lequil at'elil”, xi'. ¿Bit'il ya awac'bon quil te xch'uunjel awo'tan teme ma ba chican ta awat'ele? Yan te jo'one ya me cac'bat awil te xch'uunjel co'tan ta swenta te cat'el jpasoje. 19Te ja'ate ach'uunej te jun nax Dios aye. Lec nax te bit'il jich ach'uuneje. Ja'uc me to, jich xch'uunejic uuc te pucujetique, soc ya xnijc' yo'tanic yu'un xi'el. 20P'ijanic me soc na'aic me te xujt' ma'yuc swentail te xch'uunjel awo'tan teme ma chicanuc ta swenta te awat'ele. 21¿Ma bal ja'uc toj ilot yu'un Dios ta swenta yat'el te jtatic Abrahame te c'alal jun nax yo'tan c'an smil ta scajtijib smajt'an Dios te snich'an Isaaque? 22Na'ame te bit'il te xch'uunjel yo'tan te Abrahame snujp'inej sba soc te yat'ele. Jich ts'acal c'ot te xch'uunjel yo'tan ta swenta te yat'ele. 23Jich c'ot ta pasel te bila ts'ibubil jilel ta Sjun te Diose: “Te Abrahame la xch'uun te Diose, jich toj a c'ot ta stojol Dios yu'un”, te xie. Soc jich c'ot sc'oplal te Abrahame te ja' mero sjoy sba soc te Diose. 24Tey chican ya awilic a te Dios ya yal ta jamal te toj ya x'ilot yu'un Dios te ants-winic ta swenta te yat'ele, ma ja'uc nax ta swenta te xch'uunjel yo'tane. 25Ja' nanix jich c'ot uuc te Rahab te jmulawil antse. Ja' toj ilot yu'un Dios yu'un te yat'ele, te la yic' ta sna te jtsajtaywanejetique soc te la slebey te bit'il ya xloq'uic bael ta bay te lume. 26Jich bit'il ma cuxuluc abaq'uetal teme ma teyuc a te ach'ulele, ja' nanix jich lajem te xch'uunjel-o'tanil teme ma'yuc te at'elile.


Copyright
Learn More

will be added

X\