Santiago 1

1Jo'on Santiagoon, yabaton te Diose soc uuc te Cajwaltic Jesucristoe. Ya jpatbeyex awo'tanic ja'ex te lajchaychajbex te sts'umbalex Israel te pujq'uemex ta spamal balumilale. 2Quermanotac, ya sc'an te ay bayal sbujts' awo'tanic yu'un te c'alal ay bayal ta jchajp awocolic te ya xc'axex ta q'uinale. 3Melel ana'ojic stojol te ya me yich' xan yip te xch'uunjel awo'tanique teme ya sts'ijc' awu'unic te awocolique. 4C'axem to xan ac'a me yich' yip te awo'tanique, swenta yu'un jich me ts'acal ya ach'uunic te Diose. Jich ma'yuquix bi yan ya sc'an awu'unic a. 5Teme ay ma'yuc sp'ijil awo'tanique, c'anbeyaic te Diose, jich me ya yac'beyex. Ma p'isbiluc ya yac' stuquel, soc ma ba amen ya yaiy te bit'il ya yich' c'anbele. 6Ja'uc me to, ya sc'an te soc xch'uunjel awo'tanic te ya ac'anbeyique. Ma me x'ayan awo'tanic ta stojol. Melel te mach'a ya x'ayan yo'tan ta sc'anele, ja' pajal soc te xtal xbajt' nax ya x'eanot yu'un ic' te mare. 7Teme jich te awo'tanique, ma me xacuyic te ay bi ya x'ac'botex xujt'uc yu'un te Cajwaltique. 8Melel teme xchebet te awo'tanique, jich ma'yuc bila lec te ya xju' awu'unic spasele. 9Te quermanotic te peq'uel ay te ma'yuc bi ay yu'une, binuc nax me yo'tan yu'un te bit'il Dios ya xtoyesbot sc'oplal yu'une. 10Yan te mach'a jc'uleje, binuc nax me yo'tan yu'un te ya xpejc'anbot sc'oplal yu'un te Diose. Melel te mach'a jc'uleje, ja' pajal soc te nich wamal te ma xju' ya xjalaj ta q'uinale. 11Yu'un te c'alal ya xloc' tel te c'aale soc teme tulan q'uixnaj te q'uinale, ya xtaquej te wamale, soc ya xlubaj coel te sniche. Tey ya xch'ay a te yutsilale. Ja' nanix jich te jc'uleje, jich ya xch'ay bael ta q'uinal soc te bila ya spas ganar ae. 12Bin nax yutsil te mach'a jun yo'tan ya xts'ijc' yu'un te swocole. Yu'un teme cujch' yu'un te swocole, ya me yich' corona swenta cuxlejal, ja' bi ja' te yaloj Dios te ya yac'bey spisil te mach'atic c'ux ta yo'tanic te Diose. 13Teme ay mach'a la sta sujel ta mulil, ma me xyal te ja' sujot yu'un te Diose. Melel te Diose ma xch'uun sujel ta mulil, soc ma sujawan ta mulil. 14Melel ta swenta sbic'tal yo'tan te mach'a ya sta sujel ta mulile, jich ya xnitot bael ta spasel te bila ma lecuque. 15Teme ya x'ipaj te bic'tal-o'tanile, tey ya xchicnaj a te mulile. Soc teme la yich' yip te mulile, tey ya xchicnaj a te lajele. 16Quermanotac te bayal c'uxex ta co'tane, ma me xjowejex. 17Spisil bila lec te quich'ojtique soc spisil jmajt'antic te jelawen yutsile, coem tel ta cajal spisil, te ja' yac'ojbotic te Jtatic te la spas te c'aal, u, soc eq'uetique. Stalel ay stuquel, soc xujt' ma xyanaj te xojobile. 18Ta swenta sc'anjel yo'tan stuquel te la yac' cha'ayinucotic xan ta swenta te smelelil c'ope, swenta yu'un sba sit yawal-sts'unub ya xc'ootic ta bay spisil te yat'el spasoje. 19Jich yu'un quermanotac te bayal c'uxex ta co'tane, chapaluquex me ya awaiyic stojol te bila ya yich' alele. Ma me xc'opojex ta ora, soc ma me x'ilinex ta ora. 20Melel te yilimba te ants-winique, ma ja'uc ya spas te bila ya sc'an te Diose. 21Jich yu'un ijq'uitayaic te bila ilaybile soc spisil ta jchajp te bila amen ta pasele. Peq'ueluc me xawac' abaic ta yaiyel stojol te sc'op Dios te ya yich' ts'unel ta awo'tanic soc te ya xcol ach'ulelic yu'une. 22Ja'uc me to, pasaic me te bila ya yal te sc'op Diose. Ma me ja'uc nax te ya awaiyic stojole. Ma me xalo'lay abaic atuquelic a. 23Melel te mach'a ja' nax la yaiy stojole soc te ma xch'uun spasele, ja' pajal soc jtul winic te ya yil sit yelaw ta espejo. 24Ya yil te sit yelawe, ja'uc me to, bael to a te ya xch'ay ta yo'tan ta orae. 25Yan te mach'a ya yil ta lec te bila ya yal te mandalil, te ya x'ac'wan ta libree, ma me xch'ay ta yo'tan te bila yaiyoj stojole, ac'a me spas. Jich me ya yich' bendiciĆ³n teme ya yat'elin spasele. 26Teme ay mach'a ya yal te xch'uunej ta lec te Diose, teme ma sna' scomel te yaq'ue, ja' nax ya slo'lay sba stuquel abi. Xujt' ma'yuc swentail te bit'il xch'uunej ta sc'op te Diose. 27Te bit'il ay ta ch'uunel ta lec te Diose soc te ma capaluc ta mulil ya yil te Jtatic Diose, ja' in to: Ja' te ya xc'uxtay me'ba alaletic soc me'ba antsetic te c'alal ay swocolique, soc te ya scanantay sba yu'un te bila ma lecuc ta pasel ta balumilale.


Copyright
Learn More

will be added

X\