Hebreos 9

1Melel te sbabial tratoe ay mandal yu'un te ya yal te bit'il ya sc'an ya x'ich'ot ta muc' ta templo te Diose, soc ay nailpac' templo te swenta nax in balumilal to. 2Ta yutil te nailpac' temploe, Ch'ul Awilal sbiil te sba tsalale, ta banti ay te scajtijib c'ajq'uetique soc ay mesa tey a ta bay pachal ta stojol Dios te waje. 3Ta spat te xcha'tsalal spac'ul te nailpac' temploe, ja' Mero Ch'ul Awilal sbiil. 4Ay scajtijib xchic'jibal pom tey a te pasbil ta oro, soc tey ay a te xcaxail trato pasbil ta ch'ujte' te potsbil ta oro. Tey q'uejbil ta yutil caxa te jarra te pasbil ta oro te nojel ta maná, soc te sbastón Aarón te puline, soc te cha'pejch' ton te ts'ibubil jilel tey a te tratoe. 5Ta sba te caxae ay querubinetic te ja' seña te tey ay a te Diose. Yaxintesejic ta xiq'uic te banti ya yich' ch'ayel te mulile. Ta ora to, ma ja'uc ya jcholbey xan sc'oplal spisil in to. 6In te bit'il jich chajbanbil te nailpac' temploe, te sacerdoteetique spisil ora ochic tey a ta bay te sba tsalal te temploe, yu'un ja' yat'elinejic spasel te bit'il ya sc'an ich'el ta muc' ta templo te Diose. 7Yan ta bay te xcha'tsalale, ja' nax stuquel te muc' sacerdote te ya x'och bael jun buelta ta jun ja'wil. In te c'alal ya x'och baele, puersa ya yich' ochel xch'ich'el chambalametic te ya xc'o stsijts'an tey a swenta xch'ayjibal te smule soc xch'ayjibal smul uuc te slumale te ma'yuc ta yo'tanic te bila mulil te la spasique. 8Jich ya yac'botic jna'tic stojol te Ch'ul Espiritue te bit'il ma to jamaluc sbelal te Mero Ch'ul Awilale, te jayeb c'aal yac to ta tuunel ta yich'el ta muc' Dios te sbabial nailpac' temploe. 9Spisil in to ja' seña ta jtojoltic, jo'otic te cuxulotic ta q'uinal ta ora to. Melel te smajt'an Diose soc te milbil smajt'an te ya yich' aq'uel ta stojol Dios ta bay te temploe, ma xju' te jc'axel libre ya xc'ot yo'tanic yu'un smulic a te mach'atic jich ya yich'ic ta muc' te Diose. 10Ja' nax ya yalbey sc'oplal te bila ya swe'ique soc te ya yuch'ique soc te bi yilel ya sc'an ya spoc sc'abique. Melel ja' nax ay sc'oplal ta pasel ta stojol Dios ja' to te la sta yorail te la yich' jeltayel yu'un te Diose. 11Ja'uc me to, xtaluquix te Cristoe, ja' te Muc' Sacerdote cu'untic te swentainej te utsilal te ya yac'botic ta patile. Te templo te banti yac ta at'el ta sacerdoteile c'axem to xan lec soc c'ax jich ay yutsilal stuquel te bit'il ay te sbabiale. Melel ma pasbiluc ta sc'ab ants-winiquetic stuquel, ja' bi ma ja'uc te bitic pasbil ta balumilale. 12Tey ochemix stuquel a te Cristo ta banti te Mero Ch'ul Awilale. Soc ma ja'uc xch'ich'el tat tentsun soc xch'ich'el alal wacax te c'o yac' ta ilel ta stojol te Diose. Ja' c'o yac' stuquel te xch'ich'ele. Jc'axel ochemix tey a ta bay te Mero Ch'ul Awilale. Jich la swejt'esbotiquix jcoleltic yu'un jmultic sbajt'el q'uinal. 13Te xch'ich'el toroetic soc te xch'ich'el tat tentsunetique soc te stanul te chic'bil alal me' wacaxe, ay nax yip ta yutstesel xcuxlejalic te ants-winiquetic ta balumilal teme ya yich'ic tsijts'anel ta utstesel a te sbaq'uetalique. 14Yan te xch'ich'el Cristo c'axem to xan ay yip stuquel. Melel ta swenta Espíritu te sbajt'el q'uinal aye, ju' yu'un stuquel te Cristo te la yac' sba ta lajel ta stojol Dios swenta milbil smajt'an te xujt' ma ba ts'ilajeme. Jich te xch'ich'ele jc'axel ya spocbotic co'tantic te ts'ilajemic yu'un cat'eltic te quechelotic ta lajel yu'une, swenta yu'un jich me ya cac' jbajtic ta abatinel yu'un te cuxul Diose. 15Ja' swentail te ja' tejc'anbil ta c'op ta xchajbanel yach'il trato te Jesucristoe. Laj Cristo swenta yu'un ya staic perdón yu'un smulic te mach'atic ayic ta swenta te sbabial trato te la sta smulique, swenta yu'un jich me ya yich'ic te bila albotic yu'un Dios te ya x'ac'bot yu'uninic sbajt'el q'uinal te mach'atic ic'bilic yu'une. 16Teme ay mach'a ya spas stestamentoe, ja' to ay sc'oplal ya xc'ot a teme laj te mach'a la spase. 17Ma to ayuc lec sc'oplal te testamento teme cuxul to te mach'a la spas te testamentoe. Yan teme laje jich ayix sc'oplal abi. 18Ja' swentail te ay ch'ich' la sc'an la yich' malel ta swenta xchajbanel te sbabial tratoe. 19Jich te Moisés neel la yal te mandalil ta stojol te lume. Patil la stsac tsajal stsotsil chij soc ch'in sc'ab hisopo-te'. La smul ta xch'ich'el alal wacaxetic soc ta xch'ich'el tat tentsunetic te capbil ta ja'e. La stsijts'an ta ch'ich' te sjunal te mandalile soc la stsijts'an spisil uuc a te lum te stsoboj sbaique. 20Soc jich la yalbey yaiyic: “Ja' in to, ja' te ch'ich' te ya xchajbaj a te trato te la yac'beyex te Diose”, te xie. 21Jich te Moisés la stsijts'an ta ch'ich' uuc te nailpac' temploe soc spisil te vasoetic te ya xtuun ta yich'el ta muc' a te Diose. 22Yu'un ya yal te mandalile te ya yich' utstesel ta ch'ich' col spisiluc te bitic aye, melel ma'yuc ta ch'ayel mulil te manchuc ayuc ch'ich' ya yich' malele. 23Jich yu'un puersa la sc'an te la yich' malel xch'ich'el in chambalametic to swenta yutstesel te bila seña to nax te bitic ay ta ch'ulchane. Yan te bitic ay ta ch'ulchane ja' ya sc'an yich' utstesel a te ch'ich' te c'axem to xan ay yutsile. 24Melel te Cristoe, ma teyuc och bael a ta bay te templo pasbil ta sc'ab ants-winiquetic te ja' seña to nax te mero temploe. Tey och bael stuquel ta bay te ch'ulchane, tey yac'oj sba ta ilel ta stojol Dios cu'untic ta ora to. 25Yan te muc' sacerdote te ay ta balumilale jujun to ja'wil ya x'och bael ta bay Mero Ch'ul Awilal te ya xc'o stsijts'an ta stojol Dios te ch'ich' te ma ja'uc xch'ich'el stuquele. Yan te Cristoe ma ba ya yac'ulay sba ta lajel bayal buelta stuquel. 26Te jichuque bayal buelta la yac'ulayix sba ta lajel ta xjajch'ibal to tel balumilal te jichuque. Ja'uc me to, te bit'il slajibalix c'aale, jun nax buelta xtaluc te la yac' sba ta lajel ta xch'ayel jmultic te Cristoe. 27Jich bit'il jun nax buelta te ya xlajotique, soc patil ay ich'el ta c'op, 28ja' nanix jich uuc te Cristoe jun nax buelta tal yac' sba ta lajel ta xch'ayel smul tsobol ta jtul te ants-winiquetique. Patil ya xtal yan buelta, ja'uc me to, ma yu'unuc ya xtal xan ta xch'ayel te mulile. Ja' ya xtal scoltay spisil te mach'atic yacalic ta smaliyele.


Copyright
Learn More

will be added

X\