Hebreos 6

1Jich yu'un ac'a me cantaytic te bit'il ya xju' cu'untic te muc'ul ants-winic ya xc'ootique. Ya sc'an ya to quijq'uitaytic te xjajch'ibal te bit'il ay ta nopel sc'oplal te Cristoe. Ma me ja'uc nax ya jnopilaytic te xjajch'ibale: Jich bit'il ya sc'an ya sujt'es co'tantic yu'un cat'eltic te ya yac'otic ta lajele, soc te bit'il ya sc'an ya cac'tic xch'uunjel co'tantic ta stojol te Diose, 2soc snopel sc'oplal te ich'ja'e, soc snopel te ya yich' cajanel c'abal ta joltique, soc te bit'il ya xcha'cux tel te animaetique, soc te bit'il ay castigo ya yich' sbajt'el q'uinal te mach'a ay smule. 3Jich me ya jpastic bael teme jich ya sc'an yo'tan te Diose. 4Melel te mach'atic sacubix q'uinal ta stojolic jun buelta, soc te la yaiybeyiquix sbujts' te majt'anil yu'un te Diose, soc te yic'ojiquix ta yo'tanic te Ch'ul Espiritue, 5soc te la smulanbeyiquix yutsilal te sc'op Diose soc te yu'el Dios te ya xchicnaj ta swenta te yach'il balumilale, 6teme yoloj ya yijq'uitayic ta ch'uunel te Snich'an Diose, jich ma xju'ix te ya x'ac'bot sujt'es xan yo'tanique. Yu'un ja'ic ya yaq'uic xan ta jijp'anel ta cruz c'oem te Snich'an Diose, soc ya yaq'uic xan ta labanel ta comonsitil. 7Ja' pajal c'oemic soc te lumq'uinal te ya yuch' bael ja'al ta jujun buelta te ya xtale. Teme ya xch'i te awal-ts'unubile soc teme ya xtuun yu'un te mach'a at'ejemique, jich ya yich' bendición yu'un te Diose. 8Yan teme ch'ix soc teme chic-ch'ix te ya xch'i tey a, ma'yuc yutsil xujt'uc. Jich ma lecuc sc'oplal yu'un te Diose, soc ya me xlaj ta chiq'uel yu'un. 9Quermanotac, manchuc teme jich la caltiquixe, ja'uc me to, xch'uunej co'tantic te lec ayex ta stojol Dios ja'ex te c'uxex ta co'tantique, soc xch'uunej co'tantic te awich'ojic bayal bendición te ya xtal ta swenta acolelique. 10Melel te Diose, ma xch'ay ta yo'tan te awat'elique soc te xc'uxul awo'tan awac'ojic ta ilel ta stojol Cajwaltic te c'alal la acoltayic te mach'atic ch'ul lum yu'un te Diose, soc te ma ba acomoj abaic ta spasele. 11Ja'uc me to, ya jc'antic te toyol awo'tanic juju-jtul ta stojol Dios ja' to c'alal ta slajibal c'aal, swenta yu'un ya me ataic te bila yacalex ta smaliyele. 12Ma jc'antic te ya xch'ajubexe. Ja' ya jc'antic te ya anopbeyic yo'tan te mach'atic ay xch'uunjel yo'tanique soc te jun yo'tanic yacalic ta smaliyel te bila ya x'ac'bot ta swentaic te yaloj te Diose. 13Melel te Dios te c'alal la yalbey te Abraham te ay bila ya yac'beye, ja' nix la yal ta jamal stuquel. Melel ma'yuc yan te mach'a cajal ay yu'une. 14Jich la yal: “Jo'on ya cac'bat bayal bendición soc te ya cac'bat bayal ats'umbale”, la yut. 15Te Abrahame jun yo'tan la smaliy. Jich la yich' te bila albil yu'un te Diose. 16Jich bit'il te ants-winiquetique, teme ay bi bayal sc'oplal ta yo'tanic te bila ya yalique, ja' ya yac' ta testigo te mach'a cajal ay yu'unique. Swenta yu'un mero melel ya xc'ot te bila ya yale. 17Jich nix la spas uuc te Diose. La sc'an yo'tan te ya sna'ic stojol te mach'atic ay bila ya x'ac'bot ta swentaic yu'une, te ma xch'ay te bila yaloje. Jich ma ja'uc nax la yich' alel, ja' nix la yal ta jamal stuquel. 18Jich ay cheb te bila ma xch'ay sc'oplal, te melel ma xju' ya spas lot stuquel te Diose. Jich ay yip co'tantic te jayebotic te la jtatiquix coltayel yu'un te Diose soc te jun co'tantic yacotic ta smaliyel te bila yaloje. 19Ja' snitojbotic co'tantic jich bit'il nitil ta ancla-taq'uin ta yejt'al ja' te barcoe. Jich ma xjowejotic. Ja' ayotic ta smaliyel te Mach'a ochemix tey a ta bay yutil te pac' tsalbil a te templo ta ch'ulchane. 20Ja' te banti ochemix te Jesuse, swenta yu'un ya sjambotic te sbelale. Jich Muc' Sacerdote c'oemix sbajt'el q'uinal, te ja' la yich'bey yat'el te Melquisedeque.


Copyright
Learn More

will be added

X\