Hebreos 5

1Melel te mach'a ya yich' yat'el ta muc' sacerdoteil, ya stsaot loq'uel ta yolil ants-winiquetic te ya x'ac'bot yich' yat'el, swenta yu'un ya xc'opoj ta stojol Dios yu'un te ants-winiquetique soc te ya yac'bey smajt'an Dios soc te milbil smajt'an Dios swenta xch'ayel te smulique. 2In te bit'il ma'yuc yip yo'tan uuc, jich ya sna' stojtesel te mach'atic ya xjowejic te ma sna'ic te bila ya spasique. 3Te bit'il jteb stael yu'un uuc te mulile, jich puersa ya yac'bey milbil smajt'an Dios yu'un uuc te smule, jich nix te bit'il ya yac'bey milbil smajt'an Dios yu'un smulic uuc te lume. 4Jtul ma'yuc mach'a te stuquel yo'tan ya yac' sba ta muc' sacerdoteile, melel ja' Dios ya x'ic'ot ta at'el yu'un ta spasel te bila muc' sc'oplal ta stojol te lume, jich bit'il te Aarone. 5Jich uuc te Cristoe, ma la sle ich'el ta muc' te och ta Muc' Sacerdoteile. Ja' stuquel te Dios te jich albot yu'une: “Te ja'ate, Jnich'anat. Ora to nax la cac' ta ilel te bit'il jo'on Atatone”, te xie. 6Soc jich la yal yan buelta ta Sjun te Diose: “Te ja'ate sbajt'el q'uinal awich'oj awat'el ta sacerdoteil, ja' te la yich'bey yat'el te Melquisedeque”, te xie. 7Te jayeb c'aal ay ta balumilal te Cristoe, ma la scom sba ta sc'oponel Dios. Bayal la yoq'uetay sba ta yalel wocol ta stojol, te yacuc xju' ya xcoltayot ta yu'el te manchuc ya x'ac'ot ta lajele. Dios aiybot stojol sc'op yu'un, melel jun nax yo'tan yich'oj ta muc'. 8Manchuc teme Snich'an Diose, ja'uc me to, la snop xch'uunel mandal ta swenta bit'il c'ax swocol ta q'uinal. 9Jich mero lequil Jcoltaywanej c'ot, te sbajt'el q'uinal ay jcoleltic yu'un te jayebotic ya jch'uunbeytic te smandale. 10Melel Dios ac'bot yich' yat'el yu'un ta Muc' Sacerdoteil te pajal sc'oplal soc te Melquisedeque. 11Ay bayal bila ya sc'an ya calbeyex sc'oplal in aiyej to, ja'uc me to, wocol ta alel ta atojolic, melel ch'ajubenexix ta yaiyel stojol. 12Te bit'il bayalix c'aal ach'uunejic te Cristoe, ya sc'an te ja'ex ayex ta p'ijubteswanej te jichuque. Ja'uc me to, ya to sc'an ya awich'ic xan p'ijubtesel a te bila xjajch'ibal ay ta xch'uunel te sc'op Diose, melel pejc'ajemix awipic. Ja' ya xtuunix awu'unic yan buelta te leche, ma xju' awu'unic stuuntesel te tulan we'elile. 13Te mach'atic ja' ya stuuntesic te leche, pajal c'oemic soc te chu'ul alaletique. Melel te mach'a jich ayique, ma to c'oemuc ta yo'tanic te bila lec yo'tan yu'un te Diose. 14Yan te tulan we'elile, ja' ya stuuntesic te mach'atic muc'ul ants-winique. Melel te mach'atic jich c'oemique, p'ijubeniquix ta sna'el te bila leque soc te bila ma lecuque.


Copyright
Learn More

will be added

X\