Hebreos 4

1Jich yu'un ya sc'an ya jtsajtay jbajtic ta jpisiltic, melel ay to ta jwentatic te bila yaloj Dios te ya xju' ya x'ochotic ta bay te cux-o'tan yu'un te Diose. Ja' wocol teme ay ma x'ochex tey a te ja'exe. 2Melel jpisiltic la yich'ix alel ta jtojoltic uuc te lec yach'il c'ope, jich nix te bit'il la yich' alel ta stojolique. Ja'uc me to, tojol c'ot te la yaiyic stojole, melel ma la yac' xch'uunjel yo'tanic te bit'il la yaiyic stojole. 3Yan te jayebotic te jch'uunejtiquixe, ya x'ochotic tey a ta banti ay te cux-o'tane. Jich te bit'il yalojix stuquel te Diose: “Ja' swentail te ilinon ta stojolique, jich la calbey ta jamal te jc'axel ma xju' ya x'ochic tey a ta banti ay te cux-o'tan cu'une”, te xie. Ja'uc me to, te Diose ju' yu'un yat'el te c'alal la spas te balumilale. 4Melel ta Sjun Dios jich ts'ibubil sc'oplal te sjuquebal c'aale: “Dios la yich' lewa yu'un spisil yat'el ta sjuquebal c'aal”, te xie. 5Soc ay banti la yal yan buelta: “Jc'axel ma xju' ya x'ochic tey a ta banti ay te cux-o'tan cu'une”, xi' te Diose. 6Melel te mach'atic neel la yaiyic stojol sc'oplal te colele ma ba och stuquelic tey a, yu'un la xch'aybeyic smandal te Diose. Jich yu'un ay to sc'an te jayeb mach'atic ya x'ochic tey a ta bay te cux-o'tane. 7Ja' swentail te Dios la slebey xan yan yach'il sc'aalelal ja' bi ja' te “yo'tic to”, te xie. Melel bayal ja'wil ta patil Dios la yal ta swenta te muc' ajwalil David jich te bit'il la jtatiquix ta alele: “Yo'tic to, teme ya awaiybeyic stojol sc'op te Diose, ma me tulanuc ya awac' te awo'tanique”, te xie. 8Te ju'uc yu'un te Josué te la yac' ochel tey a ta bay cux-o'tan te israeletique, te Diose ma ba la slebey yan sc'aalelal te jichuque. 9Jich yu'un ay to xan jun sc'aalelal cux-o'tan ya staic te lum yu'une te pajal soc te bit'il la yich' lewa ta sjuquebal c'aal stuquel te Diose. 10Melel te mach'atic ya x'ochic tey a ta bay te cux-o'tan yu'un te Diose, ya yich'ic lewa yu'un yat'elic uuc jich bit'il te la yich' lewa yu'un yat'el te Diose. 11Jich yu'un ya sc'an ya cac'tic puersa te ya x'ochotic tey a ta bay te cux-o'tane. Ma me jc'ainbeytic jtuluc te bila la spasic te mach'atic ma la xch'uunbeyic smandal te Diose. 12Melel cuxul te sc'op Diose, soc bayal yip ya x'at'ej. C'ax jich ya xlajinwan a te bit'il puñal te cha'jejch' ay yee. Najt' ya x'och c'alal ta banti ay te co'tantique soc te jch'uleltique, tey to c'alal a ta banti ay te xchinamil jbaqueltique. Ya xchicnantes ta jamal spisil te bila jnopoj ta co'tantique soc te bila baem co'tantic ta sna'el juju-jtule. 13Melel te Diose, ma'yuc bila pasbil yu'un te ma chicanuc ta ilel ya yile. Spisil jamal ta ilel ya yil. Xujt' ma'yuc bila macal ta sit te Mach'a ya yich'botic ta wenta te cat'eltique. 14Te Jesús, te Snich'an Diose, ja' mero Muc' Sacerdote cu'untic te ochemix bael ta bay ay te Diose. Jich yu'un ma me xquijq'uitaytic te bila yacotic ta xch'uunele. 15Melel te Muc' Sacerdote cu'untique, ma yu'unuc ma sna'botic yo'bolil jbatic te bit'il ay jwocoltic yu'un te ma'yuc quiptique, melel la yaiy swocol yu'un spisil ta jchajp uuc te yiljibal yo'tane, jich nix te bit'il ya caiytic te jo'otique. Ja'uc me to, ma ba yal ta mulil yu'un. 16Jich yu'un jun co'tantic ac'a noptsajucotic bael ta smuc'ul nactijib te Diose, te bayal yutsil yo'tan cu'untic stuquele, swenta yu'un jich me ya jtatic c'uxtayel yu'un. Melel ta swenta nax yutsil yo'tan ya scoltayotic teme ay bila ay jwocoltic yu'une.


Copyright
Learn More

will be added

X\