Hebreos 3

1Jich yu'un, quermanotac te ch'ultesbilexe soc te pajal ic'bilex yu'un te Diose, swenta yu'un ya yu'uninex, ja' me ac'a bajt'uc ta awo'tanic sna'el te Cristo Jesús te ja' mero Jpuc-c'op soc te ja' Muc' Sacerdote cu'untic te jch'uunejtique. 2Melel te Jesuse jun yo'tan ta at'el ta stojol Dios te ac'bot spas yu'un in at'el to, jich te bit'il Moisés te jun nax yo'tan ay ta abatinel ta bay sna te Diose. 3Te Jesuse ya sc'an te c'ax jich ya quich'tic ta muc' stuquel te bit'il te Moisese, jich bit'il te mach'a la spas te nae, c'ax jich ya x'ich'ot ta muc' stuquel te bit'il te nae. 4Melel spisil te naetic puersa ay mach'a la spas. Ja'uc me to, ja' la spas spisil bitic ay stuquel te Diose. 5Jich te Moisese, te abat nax yu'un te Diose, jun nax yo'tan la yac' sba ta abatinel ta bay sna te Diose. Ja' yat'el ac'bot spas tey a te ya yalbey sc'oplal te bila ya yal ta patil te Diose. 6Yan te Cristo te ja' Snich'an te Diose, jun nax yo'tan swentainej te snae, ja' bi ja' te jo'otic teme jc'axel jun co'tantic ta stojol c'alal ta slajibal c'aal, soc teme bin nax co'tantic ta smaliyel te jcoleltique. 7Ja' swentail te jich ya yal te Ch'ul Espíritu ta bay Sjun te Diose: “Yo'tic to, teme ya awaiybeyic stojol sc'op te Diose, 8ma me tulanuc ya awac' te awo'tanique, jich bit'il la scontroinonic te antiguo ame'-atatique, soc te la yilbonic co'tan ta bay te muc'ul jochol taquin q'uinale. 9Tey la yilbonic co'tan a te me'il-tatiletic awu'unique, manchuc teme cha'winic ja'wil te la yilbonic te bila la jpas ta stojolique. 10Ja' swentail te ilinon ta stojol in ants-winiquetic to, soc jich la cal yu'un: ‘Spisil ora jowejem yo'tanic, soc ma sc'an st'unbonic te jbee’, te xoone. 11Ja' swentail te ilinon ta stojolique, te jc'axel ma xju' ya x'ochic tey a ta banti ay te cux-o'tan cu'une”, xi' te Ch'ul Espiritue. 12Quermanotac, tsajtaya me abaic, ma me ayuc jtuluquex te ma junuc awo'tanic ta stojol te cuxul Diose, te jich ya awijq'uitayic jilel soc te ma x'ac'an ach'uunique. 13Te bit'il yo'tic to ya sc'an ya jch'uuntic te Diose, ja' ya sc'an te ya ajechtac'uy abaic jujun c'aal, swenta yu'un ma me ayuc jtuluquex te ya xlajex ta lo'layel yu'un mulil, te jich tulan awo'tanic ya xc'oex yu'une. 14Melel teme ayotiquix ta swenta te Cristoe, jich bit'il jun awo'tanic te jajch' ach'uunic ta xjajch'ibale, jich nix ya sc'an, ja' to c'alal ta slajibal te c'aale. 15Jich te bit'il la yal te Diose: “Yo'tic to, teme ya awaiybeyic stojol sc'op te Diose, ma me tulanuc ya awac' te awo'tanique, jich bit'il te mach'atic la scontroinonique”, te xie. 16¿Mach'atic a te la yaiybeyic stojol sc'op te Diose soc te la scontroinique? ¿Ma bal ja'uc spisilic te mach'atic ic'ot loq'uel tel ta sq'uinal Egipto yu'un te Moisese? 17¿Soc mach'atic a te cha'winic ja'wil ilinem Dios ta stojolique? ¿Ma bal ja'uc te mach'atic la sta smulic soc te lajic jilel ta bay te muc'ul jochol taquin q'uinale? 18¿Soc mach'atic a te la yich' alel sc'oplal te jc'axel ma xju' ya x'ochic tey a ta banti ay te cux-o'tan yu'une? ¿Ma bal ja'uc te mach'atic la xc'axintaybeyic te smandale? 19Tey chican ya quiltic ta jamal a te ma ju' yu'unic te ochic bael tey a scaj te ma la xch'uunique.


Copyright
Learn More

will be added

X\