Hebreos 2

1Jich yu'un ya sc'an te c'axem to xan ya quich'tic ta muc' te bila caiyojtiquix stojole. Ma me xquijq'uitaytic jilel te bee. 2Melel te sc'op Dios te la yich' alel yu'un te ch'ul abatetic ta neelal toe, tulan sc'oplal c'ot yu'un. Spisil te mach'atic la xc'axintayic soc te ma la xch'uunique, puersa la stojic ta castigo. 3¿Bit'il c'an jcoltay loq'uel jbajtic uuc teme ma'yuc sc'oplal ta co'tantic te jcoleltic te c'ax muc' sc'oplale? Yu'un ja' nix Cajwaltic te la xcholbey sc'oplal ta neelal te jcoleltique. Te mach'atic la yaiybeyic stojol te sc'ope, ja'ic la yalbotic te bit'il smelelil c'op te bila la yale. 4Soc Dios la snup'bey sc'opic ta swenta señailetic soc jchajp at'eliletic te la yac' ta ilel ta swenta te yu'ele. Soc ta swenta te Ch'ul Espíritu la spuctilaybotic jmajt'antic, chican bit'il la sc'an yo'tan stuquel. 5Dios ma la yaq'uix ta wentainel yu'un ch'ul abatetic te yach'il balumilal te ya xchicnaj tel te ja' yacotic ta xcholel sc'oplale. 6Melel ay mach'a jich la yal ta Sjun te Diose: “¿Bi swentailuc awu'un te ants-winiquetic te ya ana' spisil orae? ¿Bi swentailuc awu'un te awich'oj ta wenta te mach'a ch'ich'-baq'uet naxe? 7Peq'uel la awac' jtebuc yu'un a te ch'ul abatetique. La awac'bey scoronain te awutsilale soc la awac' ta ich'el ta muc', [soc la awac'bey swentain spisil te bitic pasbil awu'une.] 8La awac'bey spas ta mandal spisil te bitic ay ta yanil yacane”, xi'. In te bit'il yac'ojbey spas ta mandal spisile, tey chican a te ma'yuc bila ma la yac'bey ta swenta ants-winiquetic te Diose. Ja'uc me to, ma to chicanuc ya quiltic te ya xch'uunbot smandalic yu'un spisil te bitic aye. 9Yu'un jna'ojtic stojol te Jesuse, peq'uel c'ot yu'un te ch'ul abatetic che'oxebuc c'aale. Ja'uc me to, ac'botix yutsilal soc ac'otix ta ich'el ta muc' ta scaj te c'ax swocol ta lajele. Ta swenta yutsil yo'tan Dios te c'ax swocol ta lajele, swenta jich ya jtatic cutsilaltic ta jpisiltic a. 10Spisil te bitic aye ja' yu'un te Diose, soc ja' ta swenta te la yich' pasele. Jich la sc'an yo'tan Dios te ya sjoin ta utsilal spisil te alnich'anetic yu'une. Ja' swentail te ja' lequil Jcoltaywanej c'ot yu'unic te Jesucristoe, ta swenta bit'il c'ax bayal swocol. 11Melel te mach'a Jch'ulteswaneje soc te mach'atic la yich'ic ch'ultesele, jun nax Static ta spisilic. Ja' swentail te Snich'an Dios ma ba ya xq'uexaw ta yalel te ja'ic te yermanotaque. 12Jich te bit'il la yale: “Ya me cac'at ta ich'el ta muc' ta stojol te quermanotaque. Ya me jc'ajintayat ta bay yolil te mach'atic stsoboj sbaique”, xi' te Snich'an Diose. 13Soc jich la yal xan: “Ay smuc'ul co'tan ta smaliyel te Diose”, xi'. Soc jich la yal xan yan buelta: “Li' ayon to soc spisil te alnich'anetic te ac'bilon join yu'un te Diose”, xi'. 14Te bit'il ch'ich'-baq'uet ayic te “alnich'anetic” te xie, jich nix ch'ich'-baq'uet c'ot uuc te Jesuse, swenta yu'un jich ju' yu'un tsalaw a te bit'il laje. Jich ju' yu'un te la slajinbey yip yu'el te lajele, ja' bi ja' te pucuje. 15Jich la yaq'uix ta libre spisil te mach'atic pajal c'oemic soc mosoetic scaj te xi'ojic lajel te jayeb c'aal cuxulic ta q'uinale. 16Melel ma ja'uc tal ta scoltayel te ch'ul abatetique; ja' tal scoltay te mach'a sts'umbal te Abrahame. 17Ja' swentail te puersa pajal c'ot soc te yermanotaque. Jich muc' sacerdote c'ot ta stojol Dios te jun yo'tane soc te ay xc'uxul yo'tane. Jich me ya staic perdón yu'un smulic spisil ants-winiquetic ta swenta te bit'il la yac' sba ta lajel yu'unique. 18In te bit'il c'ax swocol yu'un ta ilel yo'tane, ta ora to ya xju' yu'un ya scoltay te mach'atic ayic ta ilel yo'tanique.


Copyright
Learn More

will be added

X\