Hebreos 13

1Ma me xawijq'uitayic te talel c'axel c'ux ya awaiy abaic te bit'il awermano abaique. 2Ma me xch'ay ta awo'tanic te ya awic' ochel ta anaic te mach'atic q'uejel ya xtalique. Melel ay mach'atic la yic' ochel ta snaic ch'ul abatetic te ma la sna'beyic sbae. 3Juluc me ta awo'tanic te mach'atic ayic ta chuquele. Jichuc me c'oem ta awo'tanic te bit'il pajal chuculat soque. Ja' nix me jich te mach'atic ayic ta uts'inele, jichuc me c'oem ta awo'tanic te bit'il pajal ayat ta uts'inel soque. 4Ich'biluc me ta muc' awu'unic te nujbinele. Ma me xacapic ta mulwej te bit'il awic'oj abaique, melel Dios ya yac'bey castigo te mach'a ya xyal ta mulile soc te ya yaiy mulweje. 5Ma me ja'uc xbajt' ta awo'tanic te c'ulejalile. Junuc me awo'tanic yu'un te bila ay awu'unique, melel jich yaloj te Diose: “Xujt' ma ba ya jpijt'esat soc ma ba ya quijq'uitayat”, te xie. 6Jich me jun co'tantic ya caltic: “Te Cajwale, ja' Jcoltaywanej cu'un; jich ma ba ya jxi' te bila ya sc'an spasbon te ants-winiquetique”, xootic yu'un. 7Juluc me ta awo'tanic te mach'atic ya x'at'ejic ta atojolique, te la xcholbeyex awaiyic te sc'op Diose. Na'aic me te bila lec ju' yu'unic spasele, soc nopbeya yo'tanic te bit'il la yac' xch'uunjel yo'tanique. 8Te Jesucristoe stalel ay, ma xyanaj stuquel. Te bit'il ay te wojeye, ja' nanix jich ta ora to, soc ta sbajt'el q'uinal. 9Ma me xawac' abaic ta lo'layel ta yaiyel stojol yantic nopjibaletic te ma ja'uc yaloj te Diose. Ja' lec te ja'uc ya yich' stulanil awo'tanic yu'un te bit'il ay yutsil yo'tan ta atojolic te Diose. Ma ta swentauc we'lil te lec ya xc'oex yu'une. Melel ma'yuc bi la staic a te mach'atic la xch'uunic spasele. 10Te jo'otique ay milbil smajt'an Dios cu'untic te ma xju' ya sti' te sacerdoteetic te swentainejic te nailpac' temploe. 11Melel ta bay te nailpac' temploe, te muc' sacerdote ya yich' ochel xch'ich'el chambalametic ta bay te Mero Ch'ul Awilal ta swenta xch'ayel te mulile. Yan te sbaq'uetal te chambalametique ya yich' chiq'uel c'alal ta spat sti'il te lume. 12Ja' swentail ta pat lum to c'ax swocol ta lajel te Jesuse, swenta yu'un jich me jc'axel ya yutstes ta swenta xch'ich'el stuquel te lum yu'une. 13Ac'a loc'ucotic bael ta pat lum uuc ta banti ay te Jesuse. Ac'a me ts'ijc'uc cu'untic uuc teme ayotic ta labanele, jich te bit'il la yich' labanel stuquele. 14Melel te bit'il ayotic ta balumilale, ma'yuc muc'ul lum cu'untic li'to te sbajt'el q'uinal aye. Ja' yacotic ta sleel te muc'ul lum te ya xchicnaj ta patile. 15Jich yu'un ya sc'an te spisil ora ya calbeytic yutsilal Dios ta swenta te Jesucristoe. Ja' milbil smajt'an Dios cu'untic te ya caltic ta jti'tic te yutsil sbiile. 16Soc ma me xch'ay ta awo'tanic te bit'il ya sc'an ya awat'elinic spasel te bila leque soc te ya ac'uxtayic yantic a te bila ay awu'unique. Spisil in to ja' smajt'an cu'untic te bin nax yo'tan Dios yu'une. 17Ch'uunbeyaic smandal te mach'atic yacalic ta at'el ta atojolique, soc ich'aic ta muc'. Melel ja'ic te ya scanantaybeyex ach'ulelique, soc quechelic ta yalel ta stojol Dios te yat'elique. Ac'beya me sbujts' yo'tanic ta at'el, ma me xawac'bey smel yo'tanic, melel teme ya awac'bey smel yo'tanique, amen ya xc'oex yu'un. 18C'oponbotic me Dios ta jtojoltic, melel jun co'tantic ya caiytic ta stojol te Diose, yu'un ya jc'antic te tojuc ya xbeenotique. 19Ya jc'anbeyex te ya me ac'oponbon Dios te yacuc yac'on bael ta ora tey a ta banti ayexe. 20Te Dios, te ya yac' lamal q'uinale, la xcha'cuses tel ta bay animaetic te Cajwaltic Jesucristo te Muc' Jcanantaywanej yu'un te chijetique, te ja' ta swenta xch'ich'el te chajbaj a te trato te sbajt'el q'uinal aye. 21Ja' me ya yac' ju'uc awu'unic spasel spisil te lequil at'elile, swenta yu'un jich me ya apasbeyic te sc'anjel yo'tan stuquele, soc ja' ac'a at'ejuc ta awo'tanic ta apisilic ta spasel te bila lec yo'tan yu'un ta swenta te Jesucristoe. ¡Jelawen yutsil sbajt'el q'uinal stuquel te Cristoe! Jichuc. 22Quermanotac, ya calbeyex wocol te yacuc sts'ijc' awu'unic te bila la calbeyex tel cha'oxp'aluc ta swenta atac'uyelic. 23Soc ya calbeyex awaiyic te bit'il ayix ta libre te quermanotic Timoteo. Teme ya xtal ta orae, ya me join bael teme ya xju' cu'un te ya xtal quilexe. 24Albon spatjibal yo'tanic ta spisilic te mach'atic yacalic ta at'el ta atojolique soc ta spisil uuc te mach'atic ch'ul lum yu'un te Diose. Te italiaetique ya sticunbeyex spatjibal awo'tanic uuc. 25Ac'a yac'beyex yutsil yo'tan ta apisilic te Diose. Jichuc.


Copyright
Learn More

will be added

X\