Hebreos 10

1Melel te mandalile squeawil nax te bila lec, te patil chicnaj ta jamale, melel ma ja'uc ta swenta mandalil te ya jtatic te bila leque. Yu'un te mandalile ma xju' ya yutstes ta jc'axel te mach'atic ya xnoptsajic tel ta stojol Dios ta swenta te chambalametic te ya yich' malel xch'ich'el ta stojol Dios ta jujun ja'wile. 2Te yacuc xju' yu'un te ya x'utstesbot yo'tanic yu'un te mandalile, jich ma'yuquix smulic te jichuque. Soc ya me yijq'uitayic yaq'uel te milbil majt'anil te jichuque. 3In te milbil majt'anile, ja' nax ya x'ac'bot xan sna'ic jujun ja'wil a te smulique. 4Melel ma'yuc bi ora te ya xju' yu'un xch'ayel mulil te xch'ich'el toroetic soc te xch'ich'el tat tentsunetique. 5Ja' swentail te c'alal jul ta balumilal te Cristoe jich la yal ta stojol te Diose: “Ma ja'uc ya ac'an amajt'anin te milbil chambalame soc te yan amajt'ane. Ja' achajbanejbonix te jbaq'uetale. 6Ma ja'uc bin nax awo'tan yu'un te chic'bil amajt'ane soc te yantic milbil chambalam ta swenta xch'ayjibal mulile. 7Soc la cal: ‘Dios cu'un, ja' talemon yu'un te ya jpas te sc'anjel awo'tane, jich nix te bit'il ts'ibubil jilel jc'oplal ta bay balbil june’, xoon”, te xie. 8Neel la yal te Cristo te ma sc'an Dios te milbil chambalam soc te yan smajt'ane, soc ma sc'an te chic'bil smajt'an ta swenta xch'ayjibal te mulile, manchuc teme jich ya yac' ta pasel te mandalile. 9Patil la yal xan: “Dios cu'un, ja' talemon yu'un te ya jpas te sc'anjel awo'tane”, te xie. Jich te Cristoe la xch'aybey sc'oplal te majt'aniletic te ay ta aq'uel ta neelal toe, soc ja' tulan sc'oplal c'ot te majt'anil te la yaq'ue. 10Jich la yutstesotiquix ta jc'axel a te Dios ta swenta bit'il la spasbey sc'anjel yo'tan Dios te Jesucristoe, te jun nax buelta la yac' sba ta lajel sbajt'el q'uinal. 11Spisil mach'atic yich'oj yat'elic ta sacerdoteil ta bay te judioetique jujun c'aal ya spas yat'elic ta stojol te Diose. Bayal buelta ya yaq'uic te milbil smajt'an Dios te c'aemic ta yaq'uel te jxujt' ma xch'ay a te mulile. 12Yan te Jesucristoe jun nax milbil smajt'an Dios la yac' swenta sbajt'el q'uinal ta xch'ayel te jmultique. Jich la snajc'an sba ta bay swa'el sc'ab te Diose. 13Tey yac ta maliywanej ta ora to ja' to teme ac'bot spech' ta teq'uel te jayeb yajcontroe. 14Ta swenta jun nax smajt'an Dios te la yaq'ue, jc'axel ju' yu'un yutstesel sbajt'el q'uinal te mach'atic jayeb ya yich'ic ch'ultesel yu'une. 15Soc jich la yalbey sc'oplal uuc te Ch'ul Espiritue: 16“Jich ya yal te Cajwaltique: ‘Te trato ya jpas soc te ants-winiquetic te c'alal ya sta yoraile, jich ay: Ya me cac'bey sna'ic ta yo'tanic te mandalil cu'une, soc ya me jts'ibubey ta yo'tanic’, xi' me”, te xie. 17Soc ta patil jich la yal xan: “Jich ma ba ya jna'beyix xan ta co'tan te smulic te jayeb buelta la xc'axintaybon te jmandale”, te xie. 18Jich yu'un teme jc'axel la yich'ix ch'ayel te jmultique, ¿bistuc yan milbil smajt'an Dios yu'un? 19Jich yu'un, quermanotac, jun co'tantic ya xju' ya x'ochotiquix bael tey a ta bay te Mero Ch'ul Awilal ta swenta xch'ich'el te Jesucristoe. 20Ja' me ac'a jt'untic ochel te ach' be te sbelal cuxinel te la sjambotiquix c'axel ta bay te pac' joc'ole, te ja' nix sbaq'uetal stuquele. 21Te Jesús ja' Muc' Sacerdote cu'untic stuquel te swentainejbey te sna te Diose. 22Jich yu'un spisiluc me co'tantic ac'a noptsajucotic ta stojol te Diose, te bit'il jc'axel ay xch'uunjel co'tantique, te melel jc'axel la yutstesbotiquix co'tantic yu'un te jmultique soc pocbilix jbaq'uetaltic yu'un te lequil ja'e. 23Ma me xquijq'uitaytic te bila ay yip co'tantic yu'une. Ma me xtal xbajt'uc te co'tantique, te melel ma xch'ay te bila yalojbotiquixe. 24Ya sc'an te talel c'axel ya jech jtijbey jba co'tantic te c'uxuc ya caiy jbajtic ta jpisiltique soc te yacuc jpastic spisil te lequil at'elile. 25Soc ma me quijq'uitaytic te bit'il ya jtsobilay jbajtic, jich bit'il ay mach'atic ma sc'aniquix te ya stsobilay sbaique. Ya sc'an ya jech calbey jbajtic te ya jtsobilay jbajtique. C'axem to xan ac'a me jpastic te bit'il nopolix yorail ya xtal te Cajwaltique. 26Melel teme spasemal co'tantic ya jleulay xan jmultic te bit'il quich'ojtiquix te smelelil c'ope, ma'yuquix yan milbil smajt'an Dios yu'un xch'ayel te mulile. 27Ja' xanix ya jmaliytic te castigo yu'un jmultic te xiweltic sbae, ja' bi ja' te chiq'uel ta c'ajc' te xumumet nax ta tilel ta slajinel spisil mach'atic scontroinejic te Diose. 28Teme ay mach'a ya xc'axintay te mandalil yu'un te Moisese soc teme ay cheb o oxeb testigoetic yu'un te bila amen spasoje, jich ya x'ac'ot ta lajel yu'un soc ma'yuc mach'a ya xcoltayot yu'un. 29¿Ma bal c'axemuc to xan jich castigo ya yich' awaiy te mach'a ya spech'an ta teq'uel te Snich'an Diose, soc te ma'yuc swentail ta yo'tan te ch'ich' yu'un te trato te la yich' ch'ultesel yu'un ae, soc te ya scontroc'optay te Espíritu yu'un Dios te c'uxtaybil yu'une? 30Jna'ojtic te bit'il la yal te Cajwaltique: “Jtuquel ay ta jwenta yaq'uel te castigoe. Jo'on ya cac'bey stoj”, te xi' te Cajwaltique. Soc la yal xan: “Te Cajwaltique ya me yich' ta c'op te lum yu'une”, te xie. 31¡Xiweltic sba ta c'axem to xan teme ipajotic ta sc'ab te cuxul Diose! 32Ja'uc me to, na'aic me te bit'il ayex ta neelal to te c'alal sacub q'uinal ta atojolic. Na'aic me te bit'il ju' awu'unic xcuchel awocolic te c'alal jajch' bayal controinel. 33Ay la awich'ic ixtac'optayel soc uts'inel ta comonsitil, soc ay la ajoin abaic soc te mach'atic jich c'ax swocolique. 34Soc bayal xc'uxul la awaiy ta awo'tanic te mach'atic la yich'ic chuquele. Soc bayal sbujts' awo'tanic yu'un te bajt' ta pojel te bila ay awu'unique, yu'un ja' la ana'ic te bila ay awu'unic ta ch'ulchan te c'axem to xan ay yutsilal soc te sbajt'el q'uinal ay stuquele. 35Ma me xch'ay awu'unic te bit'il jun awo'tanic ta stojol te Diose, melel ya me x'ac'botex muc' amajt'anic yu'un. 36Pasaic me tulan. Ts'ijc'uc me awu'unic te awocolique. Pasbeyaic sc'anjel yo'tan te Diose, jich me ya awich'ic te bila yaloj te ya yac'beyex awu'uninique. 37Melel ya yal te Sjun Diose: “Nopol ya xtal te mach'a ya xtale, jteb xanix sc'an te ya xtale, soc ma ba jalix c'aal. 38Te mach'a toj ya x'ilot yu'un Dios, ya me xcuxin ta swenta xch'uunjel yo'tane. Yan teme ya sujt' ta spate, ma ba lec co'tan yu'un”, te xie. 39Yan te jo'otique ma ba ya sujt'otic ta jpatic jich bit'il te mach'atic ya sujt' ta spatic te ch'ayel ya xbajt'ic yu'une. Te jo'otique joy jbajtic soc te mach'atic ay xch'uunjel yo'tanique. Jich ma ch'ayeluc ya xbootic soc te jch'uleltique.


Copyright
Learn More

will be added

X\