Galatas 6

1Quermanotac, teme ay mach'a la awilic te la staix smule, te ja'ex te wentainbil awo'tanic yu'un te Espiritue, lamaluc me awo'tan ya acoltay ta sujt'esel yo'tan ta stojol Dios. Soc tsajtaya me aba uuc, ma me ja'uc te ya xlajat ta sujel ta mulil uuc te ja'ate. 2Juju-jtul jech cuchbeya abaic te awijc'atsique. Jich me ts'acal ya xc'ot ta ch'uunel awu'unic a te smandal te Cristoe. 3Melel teme ay mach'a scuyojix sba ta muc' teme ma meleluque, jich slo'layej sba stuquel a. 4Juju-jtul ac'a me stsajtay yil te bi yilel te yat'ele. Teme lec ya yile, jich me bayal sbujts' yo'tan ya yaiy yu'un. Ma me ja'uc ya xbajt' ta yo'tan yilel yat'el te yane. 5Melel juju-jtul ay ta swenta xcuchel te bi yilel te yat'el ya spase. 6Te mach'a ayic ta p'ijubtesel ta swenta te sc'op Diose, ac'a me yac'bey te bila ya xtuun yu'un te jp'ijubteswanej yu'unique. 7Ma me xalo'lay abaic, melel te Diose ma xju' ta labanel awu'unic. Melel spisil te bila ya yaw te ants-winique, ja' nix ya sc'aj ta patil. 8Melel te mach'a ya sts'un ta swenta baq'uet, ja' nix ya sc'aj ta swenta baq'uet te ya xlaje. Yan te mach'a ja' ya sts'un te bila swenta te Espiritue, ja' nix ya sc'aj ta swenta Espíritu te ay cuxlejal yu'un stuquele. 9Jich yu'un ma me xlubotic ta spasel te bila lec ta pasele. Melel ya me sta yorail ya jc'ajtic, teme ma xpejc'aj te co'tantique. 10Jich yu'un, te bay c'alal ya xju' cu'untique, ac'a me jpastic jpisiltic te bila leque. Ja' c'axem to xan ac'a jpastic ta stojol te quermanotactic te pajal ay xch'uunjel co'tantic soque. 11Ilawil, quermanotac, jo'on la jts'ibubeyex jtuquel te buen muc'ul letraetic ya awilic li'to ta cartae. 12Spisil te mach'atic ya sc'anic te ya x'ich'ot ta muc' ta swenta sbaq'uetalic, ja' ya sujex ta yich'el te circuncisione, swenta yu'un ma'yuquic ta controinel yu'un te bit'il xch'uunejic te laj ta cruz te Cristoe. 13Ja'uc me to, te mach'atic yich'ojic te circuncisione ma xju' ta pasel yu'unic spisil uuc te bi ya yal te mandalile. Ja' nax ya sc'an yo'tanic te yacuc awich'ic te circuncisione, swenta yu'un jich me toyol q'uinal ya yaiyic yu'un te ya sujex ta yich'el te circuncisione. 14Yan te jo'one, ma'yuc bi yan te toyol q'uinal ya caiy yu'une, ja' nax toyol q'uinal ya caiy yu'un stuquel te scruz te Cajwaltic Jesucristoe. Ja' ta swenta stuquel, te lajemix sc'oplal cu'un te balumilale, soc jich lajemonix ta stojol uuc te balumilale. 15Melel ta swenta Cristo Jesús, ma'yuquix sc'oplal teme quich'ojtic circuncisión, o teme ma ba quich'ojtique. Ja' ay sc'oplal teme ach'ubenotiquixe. 16Spisil mach'a xch'uunejic in c'op to, pajal me lamal q'uinal ya yaiyic soc pajal me ya yich'ic c'uxtayel soc spisil te lum Israele. 17Jich ta ora bael to, ma me ayuc mach'a ya yuts'inon xan, melel quich'oj ta jbaq'uetal smarcail te Cajwaltic Jesuse. 18Quermanotac ta apisilic, ja' ac'a yac'beyex yutsil yo'tan ta atojolic te Cajwaltic Jesucristoe. Jichuc.


Copyright
Learn More

will be added

X\