Galatas 5

1Te Cristo la yac'otic ta libre swenta yu'un jc'axel libre ayotic ta melel. Jich yu'un ma me xawac' abaic xan ta yugo yu'un te mosoile. 2Jo'on Pabloon ya calbeyex awaiyic, teme ya ach'uunic yich'el te circuncisione, xujt' ma'yuquix stuul ya xc'ot awu'unic a te Cristoe. 3Te mach'a ya xch'uun yich'el te circuncisione, ya calbey xan yaiyic te puersa me ya xch'uun spasel spisil te bila ya yal te mandalile. 4Ma'yuquex ta stojol Cristo, teme ya awalic te ja' toj ya xc'oex ta swenta xch'uunel te mandalile. Jich ch'ayix sc'oplal awu'unic te bit'il ay yutsil yo'tan awu'unic te Diose. 5Yan te jo'otique ta swenta te Espíritu te ya cac' xch'uunjel co'tantic. Jich jun co'tantic ya jmaliytic te bit'il toj ya yilotic te Diose. 6Melel ta swenta te Cristo Jesuse, jich ma'yuc sc'oplal teme quich'ojtic circuncisión o teme ma ba quich'ojtique. Te bila ay sc'oplale, ja' te ay xch'uunjel co'tantique. In te xch'uunjel co'tantique, ya yac' cuxinucotic soc xc'uxul co'tantic. 7Ta neelal lec jajch'ex ta animal. ¿Mach'a me la scomex ta xch'uunel te smelelil c'ope? 8Ma ta swentauc Dios te bi ya yalique, melel ja' yic'ojex stuquel te Diose. 9Jich bit'il ay ta alel: “Jteb nax levadura ya spajubtes ta swolol te wots'bil harina”, te xie. 10Xch'uunej co'tan te ma'yuc yan te bila ya anopic ta swenta te Cajwaltique. Ja'uc me to, Dios me ya yac'bey castigo te mach'a ya xchebantesbeyex awo'tanique. Chican mach'a a. 11Jich yu'un, quermanotac, te yu'unuc ya to cac' ta ch'uunel te circuncisione, ma'yucon ta uts'inel yu'un judioetic te jichuque. Soc ma swentauc cojchinjibal ta stojolic te bit'il ay ta alel ta bayuc te laj ta cruz te Cristo te jichuque. 12Ja'uc me to, te mach'atic yacalic ta yuts'inbelex awo'tanic yu'un te circuncisione, ¡ja' lec te ayuc bit'il jc'axeluc ya sjosic loq'uel sc'olol te sbaq'uetalique! 13Melel te ja'ex quermanotac, Dios la yiq'uex ta stojol swenta yu'un jich me jc'axel libre ya x'ainex yu'un. In te bit'il libre ayexe, ¿yu'un bal lec teme ya xjajch' apasic spisil te bila stalel ya smulan spasel te jmulawil jbaq'uetaltique? Ja' lec teme talel c'axel ya awac' abaic ta abatinel ta swenta bit'il c'ux ya awaiy abaic ta awo'tanic. 14Melel jun nax c'oem sc'oplal spisil te mandalile, ja' bi: “C'ux me x'awaiy ta awo'tan te apat-axujq'ue, jich nix te bit'il c'ux ya awaiy aba atuquel te ja'ate”, te xie. 15Yan teme ya atsac abaic soc teme xtal xbajt' ya ati' abaique, tey me ya awil abaic teme ma yu'unuc jc'axel ya ajin abaic ae. 16Jo'on ya calbeyex xan in to: Ac'a me swentainex spisil ora te Espiritue. Jich ma ba ya apasic te bila ya smulan spasel te abaq'uetalique. 17Melel te bila ya smulan spasel te abaq'uetalique, ja' scontroinej sba soc te Espiritue. Ja' nanix jich te bila ya sc'an te Espiritue, ja' scontroinej sba soc te abaq'uetalique. Jich scontroinej sbaic ta xchebalic. Jich ma xju' awu'unic spasel te bila ya ac'an ya apasique. 18Jich yu'un teme ja' yic'ojex ta beel te Espiritue, jich ma'yuquex ta swenta te mandalile. 19Jamal chican ta ilel te yat'el te ch'ich'-baq'uete, ja'ic in to: mulwej, yalel ta mulil, te bila ilaybil sbae, xchijilil baq'uet, 20xch'uunel loc'omba, j'ac'chameletic, jcontroinwanejetic, jach-c'opetic, jpaichaletic, j'ilimbaetic, jtsactombaetic, jxatombaetic, jinwanejetic, 21jbic'tal-o'tanetic, jmilawaletic, jyacubeletic, jpas-q'uinetic, soc ay to xan yan te pajal soc te bila ya spasique. Ya jtac'uyex jich bit'il te la calbeyex ta neelale: Te mach'atic jich yat'elique, ma ba ya xc'o ainuquic tey a ta banti ay ta ajwalinel te Diose. 22Yan te sit stuquel te Espiritue, ja' te xc'uxul-o'tanil, sbujts'-o'tanil, lamal q'uinal, sts'iquel, yutsil-o'tanil, lequil-o'tanil, xch'uunjel-o'tanil, 23manso-o'tanil, nujul-o'tanil. Ja'ic in to, ma'yuc bi ora ya yich' controinel yu'un te mandalile. 24Te mach'atic yu'unix te Cristoe, la yaq'uix ta lajel ta cruz te bila ya smulan spasel te sbaq'uetalique. 25Jich yu'un teme cuxulotiquix ta swenta te Espiritue, ja' yacotiquix ta beel soc spisil ora te Espiritue. 26Ma me jpastic toytomba, soc ma me xtal-xbajt'ucotic ta xjajch'esel c'op. Ma me jbic'tal-o'tantay jbatic.


Copyright
Learn More

will be added

X\