Galatas 4

1Te bila la calixe, ja' pajal soc in to: Teme peq'uel to ya'wilal a te alal te ya yich'bey jilel sbiluc te state, pajal sc'oplal soc te mosoe, manchuc teme ja' yu'un spisil te sbiluque. 2Ja'uc me to, ay ta wentainel yu'un te yantique, ja' to teme la sta yorail te bi ora yaloj jilel te state. 3Jich jc'oplaltic uuc te jo'otique. Te c'alal alalotic to ae, ayotic ta mosoil yu'un te mandal te ay ta alel ta balumilale. 4Ja'uc me to, te c'alal la sta yorail yu'un te Diose, la sticun tel ta balumilal te Snich'ane. Alatayot yu'un jtul ants soc swentainot yu'un te mandalile. 5Swenta yu'un tal yac'otic ta libre te bit'il wentainbilotic yu'un te mandalile, swenta yu'un jich me ya yic'otic ta yal-snich'an te Diose. 6Ta swenta te bit'il yal-snich'anex te Diose, la sticun tel ainuc ta awo'tanic uuc te Espíritu yu'un te Snich'ane. Ja' swentail te jich ya xc'opoje: “¡Abba, Jtat!”, xi' ta stojol te Diose. 7Jich yu'un ma'yuquexix ta mosoil, yal-snich'anexix Dios uuc te ja'exe. In te bit'il yal-snich'anex te Diose, jich ta swenta Cristo ya me yac'beyex awich'ic te bila yalojbey sc'oplale. 8Ta namey tel ma la ana'beyic sba te Diose, ja' la awac' abaic ta abatinel yu'un te bitic ay ta balumilal te ma diosuque. 9Ja'uc me to, te bit'il la ana'beyiquix sba te Diose, soc te ja' la sna'beyex abaic stuquele, ¿bi la spas te awo'tanique, te ya sujt'ex xan ta mosoil yu'un te bila ma'yuc yip soc ma'yuc sc'oplal ta ch'uunele? 10Melel ya acanantayic biluc c'aaliluc, soc biluc uiluc, soc te biluc yajtalul te ja'wiletique. 11Ya jmel co'tan awu'unic teme repente tojol ya xch'ay te cat'el jpasoj ta atojolique. 12Quermanotac, ya calbeyex bayal wocol te jichuc ya xc'oex te bit'il ayone, te melel jich nix ayon uuc te bit'il ayexe. Ma'yuc la awac'bonic jwocol. 13Melel te c'alal la jcholbeyex awaiyic ta xjajch'ibal te lec yach'il c'ope, ana'ojic stojol ta scaj jchamel te ju' cu'un te la calbeyexe. 14Te chamel te la stsacone, yiljibal co'tan. Ja'uc me to, ma la awilayonic, ma la ap'ajonic. Bin nax awo'tanic la anajc'anonic. Jich c'oon ta awo'tanic te bit'il ch'ul abat yu'un te Diose soc jich c'oon ta awo'tanic te bit'il Jesucristoe. 15¿Bit'il ch'ay awu'unic te sbujts' awo'tanique? Melel testigoon awu'unic te c'an aloq'uesbon asitic te ya awac'bonic sjelolin te jsite. 16Yan ta ora to, ¿yu'un bal awajcontro c'oonix yu'un te bit'il la calbeyex te smelelil c'ope? 17Te yantique bin nax yo'tanic ta atojolic, ja'uc me to, ma lecuc te bila snopojic ta yo'tanique. Yo'tan ya sloq'uesex ta jtojol, swenta yu'un jich me bin nax awo'tanic ya xc'oex ta stojolic stuquelic. 18Lec naax teme ay sc'oplal ta co'tantic te yantique. Ja'uc me to, ya sc'an te ayuc slequil co'tantic ta spisil ora, ma me ja'uc nax te c'alal ayon ta awolilique. 19Cal-jnich'nab, yan buelta ayon ta woclajel ta awentaic. Jichon te bit'il jtul ants te ayinelix te yale. Ma xquejch'aj jwocol ja' to teme ain ta awo'tanic te Cristoe. 20Jich co'tan te ayuconix ta awolilic ta ora to, swenta yu'un ya me jyanates te bit'il ya xju' ya jc'oponexe. Yu'un ma jna' te bit'il ayex ta leque. 21Albonic caiy, te ja'ex te ya ac'an ya awac' swentainex xan te mandalile: ¿Yu'un bal ma ba awaiyojic stojol te mandalile? 22Melel jich ts'ibubil jilel tey a te ay cheb snich'nab te Abrahame. Te jtul snich'ane, ja' yal te scriadae. Te yane, ja' yal te yinam te ay ta libree. 23Te yal te scriadae, ayin ta swenta ch'ich'-baq'uet. Yan te yal te mach'a ay ta libree, ayin ta swenta te bit'il yaloj te Diose. 24Te bila la calixe, seña-c'op ta jtojoltic. Te cheb antsetique pajalic soc te cheb tratoetique. Te jun tratoe chicnaj ta wits Sinaí. Ja' pajal soc te Agare. Te mach'atic ayic ta swenta in trato to ayic ta mosoil. 25Melel te Agare ja' pajal soc te wits Sinaí te ay ta bay sq'uinal Arabia. Ja' sc'oplalic uuc te muc'ul lum Jerusalén, te ayic ta mosoile. 26Yan te Jerusalén te ay ta ch'ulchane, ja' me'il cu'untic ta jpisiltic te ay ta libre stuquele. 27Melel jich ts'ibubil jilel ta Sjun te Diose: “Ac'a bujts'najuc awo'tan ja'at te ma x'alajat, te jtul ma'yuc awale. Awunan me yu'un te sbujts' awo'tane, ja'at te ma ba awaiyojbey xc'uxul te alajele. Yu'un te ants te ijq'uitaybile c'axem to xan ay yalatac ya xc'ot, c'ax jich te bit'il te yan ants te ay smamlale”, te xie. 28Jich yu'un, quermanotac, pajalotic soc te Isaaque, melel ayinotic jich te bit'il yaloj te Diose. 29Ja' nanix jich ta ora to: Te mach'a ya x'ayin ta swenta ch'ich'-baq'uete, ya yuts'in te mach'a ayin ta swenta te Espiritue. 30Ja'uc me to, jich ya yal te Sjun Diose: “Ticuna loq'uel te acriada soc te yale. Melel ma spas te pajal ya yu'uninbat yutsil ac'ulejal soc te yal te mach'a ay ta libree”, te xie. 31Jich yu'un, quermanotac, ma ja'uc yalotic te mach'a ay ta criadaile, ja' yalotic te mach'a ay ta libree.


Copyright
Learn More

will be added

X\