Galatas 3

1Te ja'ex galaciaetic, ¿bi la apas te ma x'ana'iquix q'uinale? ¿Mach'a la sboltesbeyex awo'tanic te ma ba ya ac'an ya ach'uuniquix te smelelil c'ope? Melel jamal la jcholbeyex awaiyic ta melel. Jich la cac'beyex awilic ta asitic ta comon c'oem te bit'il la yich' jijp'anel ta cruz ta jwentatic te Jesucristoe. 2Ya me awalbonic caiy jiche: ¿Ja' bal la awiq'uic te Espíritu yu'un ta swenta xch'uunel te mandalil yu'un te Moisese, o ja' bal yu'un te la ach'uunic te sc'op Dios te la awaiyic stojole? 3Mero ma x'ana'ic te q'uinale. Neel jajch' ach'uunic ta swenta te Espíritu, ja'uc me to, ya alajinbeyiquix sc'oplal ta swenta nax te abaq'uetalique. 4¿Tojol bal te c'axix bayal awocolic yu'une? Ma niwan jichuc te ma'yuc sc'oplal ya xc'ot awu'unique. 5¿Bi yu'un la yac'beyex Dios te Ch'ul Espiritue? ¿Soc bi yu'un te la yac' c'otuc ta pasel te jchajp at'eliletic ta atojolique? Melel ma ja'uc ta swenta te ya ac'otesic ta pasel te bila ya yal te mandalile, melel ja' nax ta swenta te la ach'uunic te sc'op Dios te la awaiyic stojole. 6Jich bit'il te Abrahame: “La xch'uun te Diose, jich toj ilot yu'un Dios”, te xie. 7Jich yu'un ya sc'an ya ana'ic stojol in to: Te mach'atic te mero yal-snich'an Abrahame, ja' te mach'a ya yac' xch'uunjel yo'tan ta stojol te Diose. 8Melel namey chicnaj ta Sjun Dios te bit'il toj ya x'ilot yu'un Dios te jyanlumetic ta swenta bit'il ya yac' xch'uunjel yo'tanique. Dios la yal ta neelal to ta stojol Abraham te lec yach'il c'ope, ja' bi: “Ya me staic bendición spisil nacionetic ta awenta”, te xie. 9Jich pajal ay bendición ta stojolic soc Abraham spisil mach'atic te pajal ay xch'uunjel yo'tanic ta stojol te Diose. 10Melel spisil te mach'atic ja' smuc'ulinej yo'tanic spasel te bila ya yal te mandalile, ay ta swentaic ch'ayel. Melel jich ts'ibubil jilel ta Sjun te Diose: “Ch'ayel me ya xbajt'ic te mach'a ma jc'axeluc ya xch'uunic spisil te bila ts'ibubil ta sjunal te mandalile”, te xie. 11Jamal chican te ma'yuc mach'a toj ya x'ilot yu'un Dios yu'un te bit'il yat'elinej spasel te bi ya yal te mandalile. Melel jamal ts'ibubil jilel ta Sjun te Diose: “Te mach'a toj ya x'ilot yu'un Dios ta swenta te xch'uunjel yo'tane, ja' me ya xcuxin yu'un”, te xie. 12Ma'yuc sc'oplal ya xc'ot te xch'uunjel-o'tanil yu'un te mandalile. Melel jich ts'ibubil jilel: “Ya me xcuxin te mach'a ts'acal ya spas te bi ya yal te mandalile”, te xie. 13Ja'uc me to, te Cristoe la yac'otic ta libre te bit'il ayotic ta ch'ayel yu'un te mandalile. Ja' la jelolintic ta ch'ayel. Melel jich ts'ibubil ta Sjun te Diose: “Ch'ayel bajt'ix te mach'a a te ya yich' jojc'anel ta te'”, te xie. 14Jich c'ot ta pasel te bit'il albot yu'un Dios te Abraham te ya xc'ot ta swentaic bendición uuc te jyanlumetic ta swenta Cristo. Soc ta swenta xch'uunjel co'tantic ya quich'tic te Espíritu te yaloj Dios te ya yac'botique. 15Quermanotac, ja' ya calbeyex awaiyic te bila ya yich' pasel ta balumilal. Jich bit'il teme ay jtul winic te ya spas trato soc te yane, ya me yac' sfirmaic. Jtul ma'yuc mach'a ya yac' ch'ayuc, soc jtul ma'yuc mach'a ya yesmantes. 16Te Abraham albot yu'un Dios te bi yilel ya xc'ot soc te sts'umbale. “Ta spisil te ats'umbale”, ma xiuc te Sjun Diose, melel ma ja'uc la yalbey sc'oplal ta spisilic. “Ats'umbal” xi', melel jtul nax te ay sc'oplal te sts'umbale. Ja' nax te Cristoe. 17Ja' ya cal in to: Te Dios la spas trato soc te Abrahame, ja' swentail te ma teyuc laj sc'oplal a te bit'il lajuneb xcha'winic xcha'bajc' (430) ja'wil ta patil, chicnaj te mandalile. Melel te mandalil te patil chicnaje, ma ja'uc la slajinbey sc'oplal te bila la yal Dios ta stojol te Abrahame. 18Jich yu'un teme ta swenta mandalil te ay bendicione, jich ma ja'uquix ta swenta te bila la yal Dios ta stojol te Abrahame. Ja'uc me to, te Abraham ac'bot bendición yu'un Dios ta swenta nax te bit'il jich albot yu'une. 19Jich yu'un, ¿bila ya xtuun xan a te mandalile? Ja' la yich' aq'uel ta patil yu'un te tey me ya xchicnaj ta jamal a te smulic te mach'atic ya sc'axintayic te mandalile. Ja' to te c'alal tal te sts'umbal Abrahame, ja' te mach'a la yalbey sc'oplal te Diose. Te mandalile la yich' aq'uel ta swenta ch'ul abatetic, soc ay jtul winic te la sc'ases c'op ta stojol te lume. 20Ja'uc me to, ma yejt'aluc te ay jc'asesej-c'op teme jtul nax te mach'a ya xc'opoje. Jich bit'il te Diose, stuquel nax c'opoj. 21Te mandalile, ¿ya bal xch'aybey sc'oplal te bila yaloj Dios ta trato? ¡Ma jichuc! Te yu'unuc ayuc mandalil te ya xju' ya xcuxinotic yu'une, jich toj ya yilotic Dios yu'un xch'uunel te mandalil te jichuque. 22Ja'uc me to, ya yal te Sjun Dios te chuculotic yu'un te mulile. Jich yu'un ja' nax ya xju' ya quich'tic te bila yaloj Dios teme ya cac'tic xch'uunjel co'tantic ta stojol te Jesucristoe. 23Te c'alal ma to sta yorail a te ya cac' xch'uunjel co'tantic ta stojol te Jesucristoe, ayotic ta wentainel yu'un te mandalile, ja' to te c'alal chicnaj te ja' ya sc'an ya cac'tic xch'uunjel co'tantic ta stojol te Jesucristoe. 24Jich yu'un ja' jwentainwanej cu'untic te mandalile, te ya yic'otic bael ta bay te Cristoe, swenta yu'un toj ya yilotic Dios ta swenta te xch'uunjel co'tantique. 25Te bit'il la staix yorail te ya cac' xch'uunjel co'tantique, jich ma'yucotiquix ta wentainel yu'un te mandalile. 26Jich yu'un apisilic yal-snich'anexix te Diose, ta swenta te xch'uunjel awo'tanic ta stojol te Cristo Jesuse. 27Melel te jayebex te awich'ojic ja' ta swenta te Cristoe, ja' ac'u'inejiquix te Cristoe. 28Jich ma'yuquix judio, o griego, soc ma'yuquix moso o teme ay ta libre, soc ma'yuquix sc'oplal teme winic o teme antse. Melel jun nax c'oemex ta apisilic ta stojol te Cristo Jesuse. 29Teme yu'unex te Cristoe, jich sts'umbal c'oemex te Abrahame. Jich me ya awich'ic te bendición te la yalbey sc'oplal ta trato te Diose.


Copyrighted Material
Learn More

will be added

X\