Galatas 2

1Xchanlajunebalix ja'wil ta patil te boon xan yan buelta ta Jerusalén. La sjoinon bael te Bernabee, soc te Titoe. 2Jich boon, melel Dios la yac'bon jna' te puersa ya xboone. Soc te bit'il ayonix ta Jerusalén a, la jtsob jba soc te mach'atic na'bil sbaique te yich'oj yat'elic ta jwolwaneje, soc la jcholbey yaiyic te sc'oplal colel te la cal ta stojol te jyanlumetique. Jich la jpas in to, yu'un ma jc'an te tojol ya xch'ay te cat'el te yacon ta spasele. 3Manchuc me griego-winic te Tito te sjoinejone, ma la sujic ta yich'el te circuncisione. 4Ay lotil quermanotactic te jich nax ochic tel ta coliltic te banti ayotique, yu'un talemic ta tsajtaywanej tey a ta banti jtsoboj jbajtic. Yo'tanuc te yacuc yac'otic xan ta mosoil te bit'il libre colemotic ta swenta bit'il jun ayotic soc te Cristo Jesuse. 5Ja'uc me to, ma la jch'uuntic te bila la yalique, swenta yu'un ma xyanaj te lec yach'il c'op te ja' smelelil soc te jc'axel ya sc'an ya ach'uunique. 6Yan te mach'atic ich'bilic ta muq'ue, xujt' ma'yuc bi yach'il la yalbonic te ya sc'an ya jchole. (Ma yu'unuc ay sc'oplal ta co'tan te bila at'el yich'ojique, melel ma ja'uc ay sc'oplal ta yo'tan Dios te bi yilelique.) 7Ja'uc me to, la yilic te bit'il Dios yac'ojbon ta jwenta xcholel te lec yach'il c'op ta stojol te mach'atic ma ba yich'ojic circuncisión, jich bit'il te Pedroe ja' ac'bil ta swenta xcholel ta stojol te mach'atic yich'oj te circuncisione. 8Melel ja' Dios te la sticun bael ta jpuc-c'op te Pedro ta stojol te judioetique, soc ja' nix jich la sticunon ta jpuc-c'op ta stojol te jyanlumetique. 9Te bit'il la sna'iquix stojol te bit'il Dios la yac'bonix ta jwenta in at'el to, jich la stsacbon jc'ab soc te Bernabé ta swa'el sc'abic te ja'ic te yiptajibic c'oem te jch'uunjeletique. Jich la spasic swenta seña te bit'il joy jbajtic ta at'el soque, swenta yu'un ya me xba at'ejucotic ta bay te jyanlumetique. Yan stuquelic, ya me xba at'ejuquic ta bay te mach'a yich'ojic te circuncisione. 10Ja' nax la yalbotic wocol yu'un te ya me xjul ta co'tantic scoltayel te me'baetique. Ja' nix te toyol co'tan ta spasel spisil orae. 11Ja'uc me to, te c'alal tal ta lum Antioquía te Pedroe, tey la cut jba soc ta comonsitil a, te melel ma lecuc te bila la spase. 12Yu'un ta neelal la sjoin ta we'el te jyanlumetique. Ja'uc me to, te c'alal talic te mach'atic ticunbilic tel yu'un te Jacoboe, jich jajch' spijt'es sba ta stojolic, ma ba la sjoinix ta we'el. Yu'un ja' la xi' te mach'atic talic te ay sc'oplal ta yo'tanic te circuncisione. 13Jich te yantic judioetic te xch'uunejic te Jesucristoe, caj sc'ainbeyic te cha'lam yo'tan te Pedroe. Jich nix te Bernabee, jich c'an spas uuc te bit'il te yantique. 14Ja'uc me to, te c'alal la quil te ma tojuc ya spasic te bi ya yal ta melel te lec yach'il c'ope, jich la calbey ta comonsitil te Pedroe: “Judio-winicat te ja'ate, ja'uc me to, ja' ya apasix te costumbre yu'un te jyanlumetique. ¿Bistuc ya ac'an asuj ta spasel te costumbre cu'untic te mach'atic jyanlumetique?”, xoon ta yalel. 15Te jo'otique, judiootic ta cayinabtic to, ma ba jmulawilotic jich bit'il te jyanlumetique. 16Ja'uc me to, jna'ojtic stojol te jo'otique, ma ja'uc toj ya yilotic Dios ta swenta spasel te bila ya yal te mandalile. Ja' nax ta swenta xch'uunjel co'tantic ta stojol Jesucristo te toj ya yilotique. Melel la jch'uuntic Jesucristo swenta yu'un jich me toj ya yilotic Dios ta swenta nax xch'uunjel co'tantic ta stojol te Cristoe, ma ja'uc ta swenta spasel te bila ya yal te mandalile. Melel ma'yuc mach'a toj ya x'ilot yu'un Dios ta swenta bit'il yat'elinej spasel te bila ya yal te mandalile. 17Jich yu'un, teme ya jletic te libre ya xc'ootic yu'un jmultic ta swenta te Cristoe, soc teme tey ya xchicnaj a te bit'il pajal jmulawilotique, ¿yu'un bal ya yal te ja' ya yac'otic ta jmulawil te Cristoe? ¡Ma jichuc! 18Melel teme ya jcha'pas xan te bila lajix sc'oplal cu'une, tey me chican a te jch'ay-mandalone. 19Te jo'one lajemonix ta swenta mandalil te bit'il lajix sc'oplal ta co'tane, swenta yu'un jich me ya xcuxinon ta stojol te Diose. 20Jich pajal lajemon soc ta cruz te Cristoe. Cuxulon ts'iin, ja'uc me to, ma jo'oconix te cuxulone. Ja' cuxulix ta co'tan te Cristoe. In te bit'il cuxulon to ta q'uinal soc te jbaq'uetale, ja' cuxulon yu'un te xch'uunjel co'tan ta swenta te Snich'an Diose, ja' te mach'a c'ux la yaiyon ta yo'tan soc te la yac' sba ta lajel ta jwentae. 21Ma ba ya jp'aj te yutsil yo'tan te Diose. Melel teme toj ya yilotic Dios yu'un spasel te bila ya yal te mandalile, jich tojol laj Cristo abi.


Copyright
Learn More

will be added

X\