Galatas 1

1Jo'on Pabloon, jpuc-c'opon. Ma ta swentauc nax ants-winiquetic te la yac'bon cat'ele, ja' la yac'bon cat'el te Jesucristoe soc te Jtatic Diose, te la xcha'cuxes tel ta bay animaetic te Jesucristoe. 2Jo'on soc spisil te quermanotactic te joinej jba soc li'to, ya jpatbeyex awo'tanic ja'ex te jch'uunjelex te ayex ta smaquen-q'uinal Galacia: 3Ac'a yac'beyex yutsil yo'tan te Jtatic Diose soc te Cajwaltic Jesucristoe. Lamaluc me q'uinal ya awaiyic yu'un spisil ora. 4Ja' nix te Jesucristo te la yac' sba ta lajel yu'un te jmultique, swenta yu'un jich la yac'otic ta libre yu'un te bila amen ta balumilale, jich te bit'il ay sc'anjel yo'tan stuquel te Jtatic Diose. 5Ac'a chicnajuc yutsilal ta bayuc sbajt'el q'uinal. Jichuc. 6Ja'uc me to, bayal la yaan co'tan yu'un te bit'il ora nax yacalex ta yijq'uitayel ta awo'tanic te Diose, te la yiq'uex ta swenta nax yutsil yo'tan te Cristoe. Ta ora to, ja' ya ach'uuniquix yan c'op te cuybil ta lec yach'il c'ope. 7Ma yu'unuc ay yan te lec yach'il c'ope. Ja' nax te ay mach'atic te ya xchebantesbeyex awo'tanique. Jich yo'tanic te ya syantesic te bit'il ay sc'oplal te lec yach'il c'op yu'un te Cristoe. 8Manchuc teme jo'otic o teme ch'ul abat ta ch'ulchan te ya xtal yalbeyex awaiyic yan c'op te ma ja'uc te lec yach'il c'ope, ac'a bajt'uc ta ch'ayel. 9Te bila la calixe, ja' nix ya cha'calbeyex xan: Teme ay mach'a ya xtal yalbeyex awaiyic yan c'op te ma pajaluc soc te lec yach'il c'ope, ac'a bajt'uc ta ch'ayel jiche. 10Te bit'il jich la calixe, ¿yu'un bal ja' ya jle awaiyic te bit'il lecuc jc'oplal ya xc'oon ta stojol te ants-winiquetique? ¿O ja' bal ya jle te lecuc jc'oplal ya xc'oon ta stojol Dios? ¿Yu'un bal acuyojic te ja' ya jmulan te lecuc jc'oplal yu'un te ants-winiquetique? Melel teme ja' ya jc'ane, yu'un nanix ma ja'uc yabaton a te Cristoe. 11Ja'uc me to, quermanotac, ya cac'beyex ana'ic in to: Te lec yach'il c'op te yacon ta xcholel ta bayuque, ma ja'uc sc'op te ants-winiquetique. 12Melel ma teyuc la jta ta swenta te ants-winiquetique, soc ma'yuc mach'a la yac'bon jnop. Ja' la yac'bon jna' stojol te Jesucristoe. 13Melel te ja'exe, awaiyojiquix stojol te bi yilel cat'el ta neelal te c'alal jun ayon ta xch'uunel soc te bila xch'uunejic te judioetique. C'axem to xan la cuts'inlay ta spisil te jch'uunjeletic yu'un te Diose. Jich jc'axel c'an jlajin ta spisilic. 14Ju'em cu'un xch'uunel te bila xch'uunejic te judioetique, c'ax jichon a te mach'atic pajal jch'iel soc ta bay te jlumale. C'axem to xan ma xcac' yanajuc te costumbre yu'un te me'il-tatiletique. 15Ja'uc me to, Dios la stsaon te c'alal ayon to ta xch'ujt' a te jme'e. La yic'on ta swenta nax te yutsil yo'tane. 16Te c'alal jich la sc'an yo'tan, la yac'bon jna'bey sba te Snich'ane, swenta yu'un jich me ya jchol te sc'op Dios ta stojol te jyanlumetique. Ma ja'uc ba jojc'obey te ants-winique, 17soc ma ja'uc ba jc'opon ta lum Jerusalén te mach'atic neel yich'oj yat'elic cu'un ta jpuc-c'ope. Toj boon ta sq'uinal Arabia. Patil sujt'on tel ta lum Damasco. 18Yoxebalix ja'wil ta patil te boon ta Jerusalén. Tey la jna'bey sba a te Pedroe. Jich la join jba soc jo'lajuneb c'aal. 19Ja'uc me to, ma'yuc yantic jpuc-c'opetic te la quilbey site, ja' nax te Jacobo te yijts'in te Cajwaltique. 20Melel xcal ta stojol te Diose, ma yu'unuc jlotuc te bit'il la jts'ibubeyex awilique. 21Ta patil boon ta sq'uinal Siria soc ta sq'uinal Cilicia. 22Spisil te jch'uunjeletic yu'un Cristo ta sq'uinal Judea, ma la sna'bonic jba. 23Ja' nax la yaiybonic stojol te jc'oplale: “Te mach'a la yuts'inotic ta neelal, yo'tic yaquix ta beel ta xcholel te bit'il ya cac' xch'uunjel co'tantic ta stojol te Jesucristoe, te c'an stup' ta ch'uunel ta neelal”, te xi' jc'oplal yu'unique. 24Jich la yalbeyic bayal wocol Dios yu'un te bit'il jch'uunejixe.


Copyright
Learn More

will be added

X\