Efesios 5

1Te bit'il yal-snich'anex Dios te bayal c'uxex ta yo'tane, nopbeyaic me te yo'tane. 2C'ux me x'awaiy abaic spisil ora, jich te bit'il c'ux la yaiyotic te Cristo te la yac' sba ta lajel ta jwentatique. Melel la yac' sba ta milbil majt'anil te xuq'uet nax sbujts' yic' ta stojol te Diose. 3Te bit'il ch'ul lumex yu'un te Diose, ma snujp'in te ya awaanic te mulweje soc spisil ta jchajp te chijil-o'tanile soc te bic'tal-o'tanil yu'un te taq'uine. 4Ma me xawalic bol c'op, soc te jowil c'ope, soc te bila ma ich'biluc swentail ta alele. Ja' lec bajt'uc me ta awo'tanic yalel wocol ta stojol te Diose. 5Melel ana'ojic stojol te bit'il ya xc'ot te mach'a ya xyal ta mulile, soc spisil ta jchajp chijil-o'tanil soc te bic'tal-o'tanil yu'un taq'uin te ja' pajal soc te xch'uunel loc'ombaetique. Ma xju' te ya xc'o ainuquic tey a ta banti ay ta ajwalinel te Cristoe soc te Diose. 6Ma me xawac' abaic ta lo'layel yu'un lotil c'op te ma'yuc swentaile. Melel ja' ta swenta in muliletic to te ya x'ac'bot yich'ic tulan castigo yu'un Dios te mach'atic yal-snich'an te jch'ay-mandale. 7Jich yu'un ma me xajoin abaic soc ta spasel te bila ya spasique. 8Melel ta neelal to ainemex ta ijc' q'uinal te ja'exe. Yan ta ora to sacuben q'uinal awu'unic ta swenta te Cajwaltique. Jich me xcuxinex te bit'il mach'atic yal-snich'an te saquil q'uinale. 9Melel te sit ya yac' te Espiritue ja' te yutsil co'tantique, soc te bila toje soc te bila melele. 10Tsajtaya me awil te bila lec yo'tan yu'un te Cajwaltique. 11Ma me xajoin abaic soc ta spasel te bila ma'yuc swentail ya spasic te mach'atic ayic ta ijc' q'uinale. Alaic ta jamal te bit'il amen te bila ya spasique. 12Melel q'uexlaltic sba ta alel te bila ya spasic ta muquene, 13ja'uc me to, te c'alal jamal ya yich' alel ta saquil q'uinal te bila ya spasique, tey me ya xchicnaj a te bila amene. 14Ja' swentail te jich ay ta alele: “Wic'a asit, ja'at te wayalate, jajch'an tel ta bay te animaetique. Ya yac' tiluc saquil q'uinal ta atojol te Cristoe”, te xie. 15Jich yu'un, tsajtaya abaic ta lec te bit'il ya sc'an ya xcuxinex ta q'uinale. P'ijanic me. Ma me jichuquex te bit'il mach'atic ma'yuc bi sna'ique. 16Na'aic me stuuntesel te jujun c'aale, te melel ay amen ya xc'ax te jujun c'aale. 17Jich yu'un ma me boluquex. Na'aic me spasel te bila ya sc'an yo'tan te Cajwaltique. 18Ma me xyacubex yu'un te vinoe, te melel swenta abolteselic stuquel. Ja'uc me nojeluc ta awo'tanic te Ch'ul Espiritue. 19Ja' lec tsoba abaic ta yalel salmoetic, soc c'ayojetic ta swenta yich'el ta muc' te Diose, soc c'ayojetic ta swenta Espíritu. C'ajintayaic soc albeyaic yutsilal soc spisil awo'tanic te Cajwaltique. 20Spisil te bila yac'ojbeyex te Jtatic Diose albeyaic wocol ta swenta sbiil te Cajwaltic Jesucristoe. 21Jech ich'a abaic ta muc' ta swenta bit'il awich'ojic ta muc' ta melel te Cristoe. 22Te antsetic te nujbinemique, ac'a me yich' ta muc' te smamlalique, jich bit'il ya sc'an te Cajwaltique. 23Melel ja' sjolinejic te smamlalique; jich bit'il te Cristoe, ja' jolol yu'un te jch'uunjeletique, te ja' sbaq'uetal, soc ja' Jcoltaywanej yu'unic. 24Jich bit'il te jch'uunjeletique, ya xch'uunbey smandal te Cristoe, ja' nix jich uuc te antsetic te nujbineme, ac'a me xch'uunbeyic spisil smandal te smamlalique. 25Winiquetic, te nujbinemexe, c'ux me x'awaiy ta awo'tanic te awinamique; jich bit'il te Cristoe, c'ux la yaiy ta yo'tan te jch'uunjeletique. Melel la yac' sba ta lajel yu'unic. 26Jich la spas swenta yu'un ya xch'ultes soc ya spoc ta ja' ta swenta te sc'ope. 27Swenta yu'un jich ay bayal yutsilal te jch'uunjeletic te ya stejc'an ta stojole. Ma'yuc bay ts'ilajem soc ma'yuc bay boloben, soc xujt' ma'yuc chican te bila ma lecuque. Jich ch'ultesbil ya xc'ot, soc ma'yuc te smule. 28Jich te winiquetic te nujbinemique ya sc'an te c'ux ya yaiy ta yo'tan te yinamique, jich bit'il c'ux ya yaiy stuquel te sbaq'uetale. Te mach'a c'ux ya yaiy ta yo'tan te yiname ja' nix c'ux ya yaiy sba a. 29Melel jtul ma'yuc mach'a ya sp'aj te sbaq'uetale. Ya smac'lin soc ya scanantay. Ja' nanix jich ya spas te Cristo ta stojol te jch'uunjeletique, 30melel ja' yoc-sc'abotic ta bay te sbaq'uetale. Mero sbaq'uetalotic soc sbaquelotic. 31“Ja' swentail te ya yijq'uitay sme'-stat te winique, jun nax ya xc'ot soc te yiname. Jich ta xchebalic jun nax sbaq'uetal ya xc'otic”, te xie. 32Ja' in to, mero bayal sc'oplal te ma ba na'ot stojol ta neelale. Ja' sc'oplal Cristo soc te jch'uunjeletique. 33Ja'uc me to, ja' sc'oplal uuc te c'ux me x'awaiy ta awo'tanic juju-jtulex te awinamique, jich te bit'il c'ux ya awaiy aba atuquele. Te antse ac'a yich' ta muc' te smamlale.


Copyright
Learn More

will be added

X\