Efesios 2

1Jich te ja'exe, Dios la yac'beyex acuxlejalic te c'alal lajemex yu'un te la ac'axintayic mandal soc te la ale amulique. 2Melel c'aemex ta mulil ta neelal to. Ja' la anopic te bila ay ta pasel ta swenta nax in balumilal to, soc ja' la apasbeyic sc'anjel yo'tan te pucuje te yich'oj yat'el ta sjamalul q'uinal soc te yac ta at'el ta yo'tanic te jc'axintayej-mandaletique. 3Ta jpisiltic jich ayotic uuc ta neelal to. Ja' bajt' ta co'tantic spasel te bila la smulan spasel te jbaq'uetaltique. Ja' la jpasbeytic te bila ya sc'an yo'tan te jbaq'uetaltique soc te bila la jnop ta co'tantique. Ja' nax ayotic ta swenta yich'el tulan castigo, jich bit'il te yantique. 4Ja'uc me to, te Diose, mero Jc'uxtaywanej stuquel. Ta swenta smuc'ul xc'uxul yo'tan te la xcuxtayotique. 5Te bit'il lajemotic yu'un te mulile, jich la yac'botic jcuxlejaltic ta swenta Cristo. (Ta swenta nax yutsil yo'tan Dios te colemexe.) 6Jich la xcha'cuxesotic soc Cristo Jesús, soc ja' nanix jich la snajc'anotic soc Cristo Jesús ta bay ch'ulchan. 7Jich me ya xchicnaj ta ilel ta patilal bael, te ay bayal yutsil yo'tan cu'untic te la xc'uxtayotic ta swenta te Cristo Jesuse. 8Melel ta swenta nax yutsil yo'tan Dios te colemex ta swenta xch'uunjel awo'tanic. Ma ja'uquex te la acoltay aba atuquelique, melel amajt'anic yu'un Dios te colemexe. 9Ma ta swentauc awat'elic, swenta yu'un ma ba ya atoyes q'uinal awaiyic yu'un. 10Melel ja' yat'elotic stuquel te Diose. La xchicnantesotic ta swenta Cristo Jesús, swenta yu'un ya jpastic te lequil at'elil te chajbanbil ta neelal to yu'un te Diose, swenta yu'un ja' me ya jt'untic ta beel stuquel. 11Jich yu'un juluc me ta awo'tanic te bit'il ayex ta neelal toe. Melel jyanlumex ta swenta nax te abaq'uetalique, ja' abiilinejic te ma ba awich'oj circuncisión yu'un te mach'atic yich'ojic circuncisión ta sbaq'uetalic te pasbil ta c'abale. 12Ta neelal to, ma'yuquex ta swenta te Cristoe. Ma junuc ayex soc te lum Israele, soc ma'yuc ta awentaic te bila yaloj ta tratoetic te Diose. Jich nax cuxulex ta q'uinal. Ma'yuc smuc'ul awo'tanic soc ma'yuc Dios ta awo'tanic ta balumilal. 13Ta ora to ta swenta Cristo Jesús, manchuc teme q'uejel ayex ta neelal toe, ja'uc me to, la awich'iquix noptsanel ta swenta bit'il la smal xch'ich'el te Cristoe. 14Ja' mero Jlamantesej-q'uinal cu'untic te Cristoe. La yac'otiquix ta jun nax lum te cha'chajp ayotique. Melel la sjinix te ts'ajc' xatojotic te bit'il jcontroinej jbatique. Ta swenta sbaq'uetal, 15te Cristo la slajinbey sc'oplal te mandalil soc te bitic chapal yu'une. Jich jun nax la yac' ta yach'il te cha'chajp lume, jun nax c'ot ta stojol. 16Ta swenta bit'il la yac' sba ta lajel ta cruz te Cristo, jich la slajinbey sc'oplal te bit'il contro yiloj sbaic te cha'chajp lume. Soc tey la yac' junajuc yo'tan sbaic soc a te Diose, te bit'il la yac' ta jun naxe. 17Te Cristoe xtaluc yal ta bayuc te lec yach'il c'op swenta lamal q'uinal. La yal ta atojolic ja'ex te c'ubul ayexe soc ta stojol te mach'atic nopol ayique. 18Melel ta swenta Cristo, jcha'chajbaltic ya xju' ya x'ochotic ta stojol te Jtatic Dios ta swenta jun nax Espíritu. 19Jich yu'un te ja'exe, ma jyanlum ayuquexix te jbeomex nax te ayex ta bay ma ja'uc aq'uinalique. Pajal alumal abaiquix soc spisil te mach'atic ch'ul lum yu'un te Diose. Yal-snich'anexix Dios uuc te ja'exe. 20Ts'ajc'ubilex moel ta muc'ul na. Ta sba te yiptajib la yotsesic te jpuc-c'opetic soc te j'alwanejetic yu'un te Diose. Ja' mero smuc'ul stonil chiquin-na te Jesucristoe. 21Ja' ta swenta te ya x'ipaj moel sts'ajc'ul a te nae. Jich yac ta muc'ubel swenta yu'un ch'ul templo yu'un Dios ya xc'oex te bit'il jun nax ayex soc te Cajwaltique. 22Jich ta swenta nax Cristo te pajal yacalex ta ts'ajc'uyel soc te yantique, swenta yu'un ya xnain tey a te Dios ta swenta te Espíritu yu'une.


Copyright
Learn More

will be added

X\