Efesios 1

1Jo'on Pabloon. Ayon ta jpuc-c'op yu'un Jesucristo ta swenta sc'anjel yo'tan te Diose. Ya jpatbeyex awo'tanic ja'ex te ch'ul lumex yu'un Dios soc te jun awo'tanic ta swenta Cristo Jesús te ayex ta lum Efeso. 2Ac'a yac'beyex yutsil yo'tan te Jtatic Dios soc te Cajwaltic Jesucristoe. Lamaluc me q'uinal ya awaiyic yu'un spisil ora. 3Jelawen yutsil te Diose, te Stat te Cajwaltic Jesucristoe, te la yac'botiquix spisil ta jchajp bendición te ay ta ch'ulchan ta swenta te Cristoe. 4Namey tsabilotic yu'un Dios ta swenta Cristo te c'alal ma to chicanuc a te balumilale, swenta yu'un ya xch'ultesotic soc ma'yuc bila ts'ilajemotic yu'un a te ya jtejc'an jbatic ta stojole. 5Ta swenta xc'uxul yo'tan, te xjajch'ibal to chapal yu'un Dios te ya yic' yal-snich'aninotic ta swenta te Jesucristoe. Bayal sbujts' yo'tan te la yic'otic ta swenta te sc'anjel yo'tane. 6Swenta yu'un ya jc'ajintaybeytic yutsilal te Diose, yac'ojbotic bayal bendición ta swenta te Snich'an te bayal c'ux ta yo'tane. 7La smanbotiquix jcoleltic ta swenta te xch'ich'ele. Jich la spasbotiquix perdón yu'un jmultic ta scaj te bayal yutsil yo'tan cu'untique. 8Soc la yac'botic ta c'axem to xan spisil te sp'ijil co'tantic soc sp'ijil joltic. 9La yac'botiquix jna'tic stojol te sc'anjel yo'tan te muquen aye, ja' bi, ja' te bila la xchap stuquele. 10Ja' la xchap te c'alal ya sta yorail yu'une, ya me x'och ta swenta Cristo spisil te bitic ay ta ch'ulchane soc ta balumilal. 11Ta swenta bit'il jun c'oemotic soc Cristo, namey tsabilotic yu'un Dios te ya yac'botic quich'tic soc Cristo te sc'ulejale. Jich la xchap ta xjajch'ibal te Diose, soc ya yac' c'otuc ta pasel te sc'anjel yo'tan stuquele. 12Yu'un jich la sc'an yo'tan te Diose, swenta yu'un te jo'otic te neel la jch'uuntic te Cristoe, ya me calbeytic te smuc'ul yutsilale te jayeb c'aal cuxulotique. 13Wocol la yal te Cristoe, te la awaiyic stojol te smelelil c'ope, ja' bi, ja' te lec yach'il c'op yu'un te jcoleltique. Soc te c'alal la ach'uunic te Cristoe, la awiq'uic te Ch'ul Espíritu te ja' aselloilic te la yal Dios te ya yac'beyexe. 14Te Ch'ul Espiritue, ja' seña te bila ya yac'botic quich'tic te Diose te c'alal ju'ix yu'un scoltayel spisil te mach'atic yu'une, swenta yu'un jich me ya jc'ajintaybeytic te yutsilale. 15La caiyix stojol te bit'il ay xch'uunjel awo'tanic ta swenta te Cajwaltic Jesuse soc te bit'il c'ux ya awaiy ta awo'tanic spisil te mach'atic ch'ul lum yu'un te Diose. 16Ja' swentail te spisil ora ya me calbey wocol Dios ta awentaic, soc ya me jna'ex a te c'alal ya jc'opon te Diose. 17Ya jc'anbey te Dios yu'un te Cajwaltic Jesucristo, ja' te Jtatic te bayal yutsilale, te yacuc yac'beyex te Espíritu yu'une. Ja' me ya yac'beyex sp'ijil awo'tanic, soc ya me yac'beyex ana'ic stojol ta lec, swenta yu'un jich me ya ana'beyic xan sba ta melel a. 18Soc ya jc'anbey Dios te yacuc sjambeyex asitic soc te ya yac'beyex sp'ijil awo'tanic, swenta yu'un jich me ya ana'ic stojol te bit'il ya xc'ootic yu'un ta jpisiltic te ic'bilotic yu'une, soc jich me ya xc'ot ta awo'tanic te bit'il jelawen yutsilal te sc'ulejal te ya yac'botic ta patil jo'otic te ch'ul lumotic yu'un te Diose, 19soc jich me ya xc'ot ta awo'tanic te bit'il ay yip yu'el ya x'at'ej ta c'axem to xan ta jtojoltic jo'otic te jch'uunejtique. Jich te bit'il at'ejem te yip yu'el ta jtojoltique, 20ja' nix te at'ej ta stojol Cristo te c'alal cha'cux tel ta bay te animaetique, soc te la yac' najc'ajuc ta swa'el sc'ab ta bay ch'ulchan. 21Jich cajal c'ot yu'un spisil te mach'a ay yu'el soc ay yat'el, ja' te jmandalteswanej soc te ajwalile. Spisil cajal c'ot yu'un te bitic aye, chican teme ja' ta ora to o teme ja' te patil baele. 22La yac'bey scajtijibin yacan Cristo spisil te bitic aye. Soc nix te Cristo ja' jolol c'ot yu'un spisil te jch'uunjeletique. 23Te jch'uunjeletique ja' sbaq'uetal te Cristoe, soc nojelic ta yutsilal te Cristoe. Soc nojel ta yutsilal Cristo spisil te bitic aye.


Copyright
Learn More

will be added

X\