Colosenses 1

1Jo'on Pabloon, ayon ta jpuc-c'op yu'un Jesucristo ta swenta sc'anjel yo'tan te Diose, sjoinejon uuc te quermanotic Timoteo. 2Ya jpatbeyex awo'tanic quermanotac, te ch'ul lumex yu'un te Diose soc te jun awo'tanic ach'uunejic te Cristo te ayex ta lum Colosae. Ac'a yac'beyex yutsil yo'tan soc lamal q'uinal ta atojolic te Jtatic Diose. 3Spisil ora ya jc'oponbeyex Dios ta atojolic soc ya calbey wocol te Diose, te Stat te Cajwaltic Jesucristoe. 4Yu'un la caiytiquix stojol te bit'il ay xch'uunjel awo'tanic ta stojol te Cristo Jesuse, soc te bit'il c'ux ya awaiy abaic ta awo'tanic soc spisil te mach'atic ch'ul lum yu'un te Diose. 5Jun awo'tan amaliyejic te bila q'uejbil yu'un Dios ta ch'ulchane, ja' to jajch'ex ta smaliyel a te c'alal la awaiyic stojol te smelelil c'ope, ja' bi ja' te lec yach'il c'ope. 6Ja' nix in c'op to te julemix ta atojolique, ta ora to pujq'uemix ta bayuc ta spamal te balumilale. Yaquix ta sit ta bayuc, jich te bit'il jajch' sitinuc ta awolilic uuc ja'ex te c'alal la awaiyic stojol te bit'il ay yutsil yo'tan cu'untic ta mero melel te Diose. 7Ja' la yac'beyex anopic te quermanotic Epafras, te joy jba soc ta at'el te bayal c'ux ta co'tane, soc te lequil abat yu'un Cristo ta atojolique. 8Ja' la yalbotiquix caiytic te bit'il ayexe soc te bit'il ay bayal xc'uxul awo'tanic ta swenta te Espiritue. 9Ja' swentail te jajch' jc'oponbeyex Dios te bi c'aalil la caiytic stojole. Xujt' ma jcom jbatic ta sc'anel ta stojol Dios te yacuc yac'beyex ana'ic ta lec te sc'anjel yo'tane, soc te yacuc yac'beyex ana'ic stojol spisil ta jchajp te bila ya xju' ta na'el stojol awu'unique, soc te yacuc yac'beyex sp'ijil awo'tanic ta swenta te Espiritue. 10Swenta yu'un jich ya xju' awu'unic te toj ya x'ainex ta q'uinal te bit'il yu'unex te Cajwaltique, soc te jich ya xju' awu'unic spasel spisil ora te bila lec yo'tan yu'une. Ac'a sitinuc awu'unic spisil ta jchajp te lequil at'elile, jich me ya x'esmaj xan te bit'il ya ana'beyic sba te Diose. 11Soc ya jc'anbeytic te Diose te yacuc yac'beyex yip awo'tanic ta swenta te yutsil yu'ele, jich me ya xcujch' awu'unic soc ya sts'ijc' awu'unic spisil ta swenta yip awo'tanic. 12Soc sbujts' awo'tanic ya me awalbeyic wocol ta stojol te Jtatic Diose. Ja' la xchapanotic swenta yu'un ya quich'tic te bila ya yac'botic te jayebotic te ch'ul lumotic yu'un Dios te ayotic ta bay te saquil q'uinale. 13Melel ta swenta yu'el Dios la scoltayotiquix loq'uel ta bay ainotic ta ijc' q'uinale, soc tey la yac'otiquix c'axel ta banti ay ta ajwalinel te Snich'an te bayal c'ux ta yo'tane. 14Ja' ta swenta xch'ich'el te la sman jcoleltique, jich la spasbotic perdón yu'un te jmultique. 15Te Diose ma chicanuc ta ilel. Ja'uc me to, ja' sloc'omba Dios te Cristoe. Ja' sbabial ay yu'un spisil te bitic aye. 16Ja' ta swenta Cristo te la xchicnantes spisil a te Diose, te bitic ay ta ch'ulchane soc te bitic ay ta balumilale, te bila chican ta ilele soc te bila ma chicanuc ta ilele, jich bit'il te jmandalteswanejetic, soc ajwaliletic, soc te mach'atic tulan yat'el yich'ojique, soc spisil te mach'atic ay yu'elique. Spisil la yich' chicnantesel ta swenta te Cristoe, soc spisil ay ta swenta stuquel. 17Melel te Cristoe, stalel ayix a te c'alal ma to ayuc a te bitic aye, soc ja' swentainej spisil. 18Te Cristoe ja' jolol yu'un te jch'uunjeletique te ja' sbaq'uetal c'oeme. Ja' xjajch'ibal ay stuquel. Ja' sbabial te cha'cux tel ta bay te animaetique, swenta yu'un jich me c'ax jich ich'bil ta muc' ya xc'ot yu'un spisil te bitic aye. 19Melel te Cristoe yich'ojbey spisil te yutsilal te Tatile, yu'un jich la sc'an te Diose. 20Soc ja' ta swenta Cristo te ya yac' junajuc ta stojol Dios spisil te bitic ay ta balumilale soc uuc te bitic ay ta ch'ulchane. Tey la yac' lamajuc q'uinal a ta swenta bit'il la smal xch'ich'el ta cruz. 21Te ja'exe q'uejel ayex ta neelal to, soc contro la awil abaic ta awo'tanic soc te Diose, yu'un c'aemex ta spasel spisil te bila ma lecuque. 22Ta ora to, ta swenta Cristo te la yac' junajuc awo'tanic ta stojol Dios ta swenta bit'il c'ax swocol ta lajel soc sbaq'uetal. Jich te c'alal ya stejc'anex ta stojol te Diose, ch'ultesbilex soc ma'yuc bila boloben soc ma'yuc amulic ta stojol. 23Jich me ya xc'oex teme jc'axel ya xjunaj awo'tanic ta melele, soc teme ja' ipajemex ta lec a te xch'uunjel awo'tanique, soc teme ma xawijq'uitay ta awo'tanic smaliyel te bila ya yal te lec yach'il c'op awaiyojiquix stojole. Ja' te sc'oplal colel te yaquix ta cholel ta bayuc ta sjoylejal balumilal, te quich'oj abatinel ta xcholel uuc jo'on te Pabloone. 24Ta ora to ay sbujts' co'tan yu'un te bit'il yac ta c'axel jwocol ta awentaique. Yu'un jich me ya jts'actes xan ta jbaq'uetal ta bay ay to sc'an te ya xc'ax swocol Cristo yu'un te jch'uunjeletic, te ja' sbaq'uetale. 25Ja' swentail te ayon ta abatinel yu'un te jch'uunjeletic yu'un Dios te la yac'bon quich' cat'el ta scoltayele. Ja' bi, ya me ju'tes ta cholel spisil te sc'op Diose, 26te ja' te c'op te muquen ay ta neelal to tel te ma'yuc ta na'el yu'un bayal ta jcum te ants-winiquetique. Ja'uc me to, la yac'botiquix jna'tic stojol te jayebotic te ch'ul lumotic yu'un te Diose. 27Jich la sc'an yo'tan Dios te ya yac'botic jna'tic in c'op to te muquen aye, ja' te c'op te jelawen yutsil ta aiyel stojol yu'un spisil te jyanlumetique: Ja' te bit'il ya x'ain ta awo'tanic te Cristoe, swenta yu'un jun awo'tanic ta smaliyel te ya awich'ic ta patil te yutsilal te Diose. 28Te jo'otique ya jcholbeytic sc'oplal ta bayuc te Cristoe. Ya jtac'uytic soc ya jp'ijubtestic ta lec ta spisilic te ants-winiquetique, swenta jich me tojobenic ta stojol Cristo ya xc'otic. 29Ja' swentail te tulan yacon ta at'el. Ya quiptay spasel ta swenta yu'el Cristo te yac ta at'el ta co'tane.


Copyright
Learn More

will be added

X\