Hechos 9

1Te Saulo ma ba xquejch'aj ta yalel smilel te jnopojeletic yu'un te Cajwaltique. Jich ba sc'opon te muc' sacerdotee. 2La sc'anbey carta te ya xc'o yac'bey te mach'atic swentainejic te sinagogaetic ta bay lum Damasco, swenta yu'un jich me ya sle te mach'atic xch'uunejic te yach'il nopjibale, chican teme winiquetic o antsetic, te jich me chucul ya yic' tel ta Jerusalén. 3Ja'uc me to, te c'alal yac ta beel ta be te Sauloe, nopol xc'otix ta Damasco a te ajc' nax ora xojobaj tel q'uinal ta stojol te tal ta ch'ulchane. 4Jich te Sauloe t'uxaj coel ta lum. Ay mach'a c'opoj la yaiy te jich la yale: —Saulo, Saulo, ¿bistuc ya awuts'inon? —xi'. 5La yal te Sauloe: —¿Mach'aat a, Cajwal? —xi'. Jich la yal te mach'a yac ta c'ope: —Jo'on Jesuson te ya anutsone. Atuquel ya awuts'in aba te ya alombey ta teq'uel sni' te atojtesjibale —xi'. 6Te Saulo jajch' ta nijq'uel yu'un xiwel. Jich la yal: —Cajwal, ¿bila ya sc'an awo'tan te ya jpase? —xi'. La yal te Cajwaltique: —Jajch'an, ochan bael ta lum. Tey me ya xc'o awich' alel a te bila ya sc'an ya apase —la yut. 7Te winiquetic te sjoinej ta beele, xiwic yu'un, melel la yaiyic stojol te mach'a c'opoje, ja'uc me to, ma'yuc mach'a la yilic. 8Te Saulo la stam sba jajch'el ta lum. Te c'alal c'an swic' te site, ma la yilix te q'uinale. Te sjo'taque la snitic ochel ta sc'ab ta bay lum Damasco. 9Oxeb c'aal ma la yil q'uinal, soc ma ba we' xujt'uc, ni ayuc bi la yuch' jtebuc. 10Ay jtul jnopojel tey a ta lum Damasco te Ananías sbiile, c'oponot yu'un Cajwaltic ta stelemal yilele. Jich albot yu'un: —Ananías —xi'. La sjac' te Ananiase: —Li' ayon to, Cajwal —xi'. 11Jich albot yu'un te Cajwaltique: —Jajch'an, baan ta bay Toj Calle xi' te sbiile. Baan lea ta bay sna Judas jtul winic te Saulo sbiil te talem ta lum Tarso. Tey yac ta sc'oponel Dios ya xc'o ata, 12yu'un ac'botix yil ta stelemal yilel jtul winic te Ananías sbiile, te ya xba scajanbey sc'ab ta sjole, yu'un ya xjam a te site —xi'. 13C'alal jich la yaiy te Ananiase, jich la yal: —Cajwal, tsobol mach'a yalojbon sc'oplal te bit'il ay te winique te bayal bila amen spasojbeyix te mach'atic ch'ul lum awu'un ta bay Jerusalén. 14Ta ora to ja' talem yu'un te yich'oj tulan mandal yu'un te jwolwanej-sacerdoteetic te ya xchuc bael spisil te mach'a ya yalbat wocol ta atojole —xi'. 15La yal te Cajwaltique: —Baan, melel tsabilix te ya xtuun cu'un te winique, swenta yu'un ya me yalbon jc'oplal ta stojol te jyanlumetic soc te ajwaliletique soc ta stojol te yal-snich'an israeletique. 16Jo'on ya me cac'bey sna' stojol spisil ta jchajp swocol te ya sta ta jwentae —xi'. 17Jich bajt' te Ananiase, soc och ta na ta banti ay te Sauloe. C'o scajanbey sc'ab ta sjol. Jich la yalbey: —Quermano Saulo, te Cajwaltic Jesús te la stejc'an sba ta be ta atojol ta banti yacat tel ta beel te c'alal talate, ja' la sticunon tel swenta yu'un ya me xjam te asite, soc swenta yu'un ya xnoj ta awo'tan te Ch'ul Espiritue —xi' te Ananiase. 18Ta ora nax ch'ay loq'uel te bila macbil sit yu'une, jich yilel te bit'il sulil chay. Jich la yil xan te q'uinale. Jajch' te Sauloe, soc ac'bot yich' ja'. 19Patil we', soc la xcha'yich' xan yip te sbaq'uetale. Ay c'aal jalaj ta sjoinel te jnopojeletic te ayic ta lum Damasco. 20Te Saulo ta ora nax jajch' ta yalel ta bay sinagogaetic te ja' Snich'an Dios te Jesuse. 21Spisil te mach'a la yaiyic stojole, jchajp nax q'uinal la yaiyic yu'un. Jich jajch' yalic: —¿Ma bal ja'uc in winic to te la yuts'in spisil te mach'atic ya yalbeyic wocol ta stojol Cajwaltic Jesús ta bay Jerusalén? ¿Ma bal ja'uc talem yu'un li'to, swenta yu'un ya xchuc bael te jnopojeletique, yu'un ya xc'o yac'bey ta sc'abic te jwolwanej-sacerdoteetic? —xiic ta yaanel. 22Ja'uc me to, te Saulo c'axem to xan la yich' yip yo'tan ta c'op. La yac' ta na'el ta jamal te ja' Cristo te Jesuse. Te judioetic te ainemic ta lum Damasco, ma la sna' te bi ya yalic yu'une. 23C'axix bayal c'aal a, te judioetique la xchajbanbeyic sc'oplal ta milel te Sauloe. 24Ja'uc me to, la yaiy stojol te c'aal ajc'ubal yac ta mujc'tayel yu'unic ta bay te yochibal ts'ajc' yu'un te lume, swenta yu'un ya me smilic. 25Jich yu'un te jnopojeletique, ta ajc'ubal la sliquic coel ta moch ta spat sts'ajc'ul te lume. 26Te c'alal c'ot ta Jerusalén te Sauloe, c'an sjoin sba soc te jnopojeletique. Ja'uc me to, la xi'ic spisilic, yu'un scuyojic te ma jnopojeluc yu'un Jesús te Sauloe. 27Jich yu'un te Bernabé, la yic' tel te Sauloe, soc la stejc'an ta stojol te jpuc-c'opetique. La xcholbey yaiyic te bit'il la yil ta be te Cajwaltique, soc te bit'il c'oponot yu'une, soc te bit'il tulan la yalbey sc'oplal Jesús ta bay lum Damasco te Sauloe. 28Jich te Saulo la sjoin sba soc te jnopojeletic ta Jerusalén. Bayuc beenic soc ta spamal lum. Jamal la yalbey sc'oplal te Cajwaltique. 29La stsal sbaic ta c'op soc te judioetic te ya xc'opojic ta griego-c'op, ja' swentail te c'an smilique. 30C'alal la sna'ic stojol te quermanotactique, la yiq'uic bael c'alal ta Cesarea. Jich la sticunic bael ta lum Tarso. 31Jich yu'un, lamal nax q'uinal la yaiyic spisil te jch'uunjeletic ta spamal sq'uinal Judea soc ta sq'uinal Galilea soc ta sq'uinal Samaria. Jich la sta yip yo'tanic ta lec soc la xi'ic spisil ora te Cajwaltique, soc esmajic xan ta swenta bit'il la yich'ic coltayel yu'un te Ch'ul Espiritue. 32Te Pedro yac ta yilel bael ta chajbalchajp te jch'uunjeletique. Jich c'ot ta bay te mach'atic ch'ul lum yu'un Dios te nainemic ta lum Lida. 33Tey la sta jtul winic te Eneas sbiil te ayix xwaxaquebal ja'wil xchawajel ta swayib te chamen xchial yoc-sc'abe. 34Te Pedro la yalbey: —Eneas, ya scoltayat te Jesucristoe. Jajch'an, chajbana jilel te awayibe —la yut. Ora tejc'aj jajch'el te Enease. 35Spisil mach'atic nainemic ta lum Lida soc ta bay te q'uinal Sarón la yilic te Enease. Jich la sujt'es yo'tanic ta stojol te Cajwaltique. 36Ta lum Jope ay jtul jnopojel tey a te Tabita sbiil te Dorcas sbiil ta griego-c'ope. Yat'elinej spasel lequil at'elil soc la sq'uebanbey me'baetic te sbiluque. 37Jich ora a, tsajc' ta chamel te Dorcase, soc laj. C'alal la spocbeyiquix a te sbaq'uetale, la stixanic ta xcha'cajal na. 38Te lum Jope nopol yiloj sba soc te Lida. Te jch'uunjeletique, yaiyojiquix stojol te tey ay a te Pedroe. Jich la sticunic bael cheb winiquetic ta yalel wocol: —Wocoluc, ya me xtalat ta ora te banti ayotique —xiic. 39Jich te Pedro la sjoin bael ta ora. Te c'alal c'otic ta Jope, la yiq'uic bael ta xcha'cajal na ta banti tixil sbaq'uetal te Dorcase. Tey c'o staic spisil te me'ba antsetique. La sjoytayic te Pedroe, soc yacalic ta oq'uel, soc la yac'beyic yil te sc'u'-spaq'uic te pasbilic yu'un te Dorcas te c'alal cuxul to ae. 40Te Pedro la sticun loq'uel ta spisilic. Jich la squejan sba ta sc'oponel Dios, soc la sujt'es sba ta yilel te animae. Jich la yalbey: —Tabita, jajch'an —xi'. Jich wijc' sit te antse. La yil te tey ay a te Pedroe. Jich la snajc'an sba. 41Te Pedro la stsacbey te sc'abe, la stejc'an jach'el soc la yic' tel spisil te mach'atic ch'ul lum yu'un Dios soc te me'ba antsetique. La yac'bey yilic te bit'il cuxulix te Dorcase. 42Spisil te yajwal lum Jope la yaiyic stojol te bila c'ot ta pasele. Jich ay tsobol la xch'uunic te Cajwaltique. 43Te Pedro bayal c'aal jalaj ta lum Jope ta bay sna te Simón te jc'a'tesej-nujc'ule.


Copyright
Learn More

will be added

X\