Hechos 8

1Te Saulo lec yo'tan yu'un uuc te laj ta milel te Estebane. Jich ora jajch' ta uts'inel te jch'uunjeletic te ayic ta lum Jerusalene. Spisilic pujq'uic bael ta sq'uinal Judea soc ta sq'uinal Samaria. Ja' xanix jilic ta Jerusalén te jpuc-c'opetique. 2Te mach'atic jun yo'tanic xch'uunejic te Diose, la smucbeyic sbaq'uetal te Estebane. Bayal la yoq'uetayic. 3Te Saulo ma ba laj yo'tan ta yuts'inel te jch'uunjeletique. Been ta nanatic. La stsac loq'uel tel te winiquetique soc te antsetique. La yac' ta chucjibal ta spisilic. 4Te mach'atic pujq'uic bael ta anel ta bayuc, tey la yalic a te lec yach'il c'op te banti c'otique. 5Jich te Felipe co bael ta bay lum Samaria. Tey c'o xcholbey sc'oplal a te Cristoe. 6La stsobilay sbaic te ants-winiquetique. Spisilic jun yo'tanic ta yaiyel stojol te bila la yal te Felipe soc ta yilel te jchajp at'eliletic te la spase. 7Melel ay tsobol ta jtul mach'atic ay pucujetic ta yo'tanic te la yich'ic coltayel yu'un te Felipee. Te c'alal loq'uic te pucujetic tulan awunic. Soc ay tsobol mach'atic chamen xchial yoc-sc'abic soc coxoetic te la yich'ic coltayele. 8Jich yu'un te mach'atic ayic ta lume, bin nax yo'tanic yu'un ta spisilic. 9Ja'uc me to, ay jtul winic tey a te Simón sbiil te la yat'elin spasel mágia ta neelal ta bay te lume. Jich lo'laybilic yu'un te samariaetique, yu'un muc' scuyoj sba tey a. 10Spisil muc' biq'uit yich'ojbeyic ta muc' te bi ya yale. Jich la yalbeyic sc'oplal: —Ja' in to, ja' mero yich'ojbey te smuc'ul yu'el te Diose —xiic yu'un. 11Jich yich'ojic ta muc', melel ayix bayal ja'wil te lo'laybilic yu'un ta swenta mágia te ya spase. 12Ja'uc me to, te lume la xch'uunic te lec yach'il c'op la yal te Felipe te bit'il ay ta ajwalinel stuquel te Diose, soc te sc'oplal te Jesucristoe. Jich la yich'ic ja' te winiquetique soc te antsetique. 13Ja' nix jich uuc te Simone, la xch'uun soc ac'bot yich' ja' uuc. Spisil ora la sjoin te Felipee. Jchajp nax q'uinal la yaiy yu'un te jchajp at'eliletic soc te muc' señailetic la spas te Felipee. 14C'alal la yaiyic stojol te jpuc-c'opetic ta lum Jerusalén te bit'il la xch'uuniquix sc'op Dios te samariaetique, la sticunic bael tey a te Pedro soc te Juane. 15Te c'alal c'otic tey a, la sc'oponbeyic Dios swenta yu'un ya me x'ac'bot yiq'uic ta yo'tanic te Ch'ul Espiritue. 16Yu'un ma to xjul ta swentaic jtuluc te Ch'ul Espiritue. Ja' nax yich'ojic ja' ta swenta sbiil te Jesuse. 17Jich te Pedro te Juane la scajanbey sc'abic ta sjolic. Jich ac'bot yiq'uic ta yo'tanic te Ch'ul Espiritue. 18C'alal la yil te Simón te ac'bot yiq'uic ta yo'tanic te Ch'ul Espíritu ta swenta bit'il te jpuc-c'opetic la scajanic sc'abic ta sjolic te jnopojeletique, jich c'an yac' taq'uin yu'un. 19Jich la yal: —Ac'bon cu'el uuc, swenta yu'un spisil mach'a ya jcajanbey jc'ab ta sjol te jo'one, jich me ya x'ac'bot yiq'uic ta yo'tanic uuc te Ch'ul Espiritue —xi'. 20Te Pedro la yalbey: —Pajal lajan soc te ataq'uine, yu'un acuyoj te ay ta manel ta taq'uin te majt'anil te ya yac' jpastic te Diose. 21Te ja'ate xujt' ma'yuc ta awenta spasel in to, melel ma tojuc awo'tan ta stojol te Diose. 22Sujt'esa awo'tan ta stojol Dios yu'un te bila amen ay ta awo'tane. Albeya wocol Dios te yacuc spasbat perdón yu'un te bila anopoj ta awo'tane. 23Melel chican ya quil te mich'il nax awo'tan soc te chucbil awo'tan yu'un te mulile —xi' te Pedroe. 24La yal te Simone: —C'oponbonic me Cajwaltic ta jtojol te ja'exe, swenta yu'un ma me xc'ot ta jwenta te bila la awalique —xi'. 25Jich te jpuc-c'opetique laj yo'tanic ta yalel testigo c'op soc ta yalel te sc'op Diose, sujt'ic bael ta Jerusalén. Te c'alal yacalic ta beel baele, la yalic te lec yach'il c'op ta bay ch'in lumetic te ayic ta sq'uinal Samariae. 26Ay jtul ch'ul abat yu'un Cajwaltic, c'oponot yu'un te Felipe, jich albot: —Jajch'an, baan ta stojol sur ta banti be te ya xjajch' tel ta lum Jerusalén te coel ya xbajt' ta lum Gaza —xi'. Ja' in be to, ja' te ya xc'ax ta jochol taquin q'uinale. 27Jich jajch' ta beel te Felipee, la sta bael ta be jtul etiope-winic. Eunuco te winique te yich'oj tulan yat'el ta tesoreroil yu'un te Candace, ja' te antsil muc' ajwalil yu'un te etiopeetique. Te winique xc'otuc ta Jerusalén ta slajinel sba ta stojol Dios. 28Te bit'il yaq'uix sujt'el bael ta slumale, nacal ta yutil scarreta ta beel. Ja' yac ta yilel te sjun Isaiase, te j'alwanej yu'un Diose. 29Te Felipe albot yu'un te Ch'ul Espiritue: —Noptsajan bael ta bay te carretae. Joina bael —xi'. 30Te c'alal noptsaj bael tey a te Felipe, la yaiy stojol te ja' yac ta yilel te sjun Isaiase. Jich la yalbey: —¿Ya bal xc'ot ta awo'tan te bila yacat ta yilele? —la yut. 31La yal te winique: —¿Bit'il c'an c'otuc ta co'tan te melel ma'yuc mach'a ya yac'bon jnop ta lec? —xi' te winique. Jich yu'un la yalbey wocol te Felipe te yacuc xmo sjoin ta nacleje. 32Ja' yac ta yilel te Sc'op Dios te jich ts'ibubile: “Ic'ot bael ta milel jich bit'il chij. Soc jich bit'il alal chij te ma x'awun te c'alal ya yich' joxel te stsotsile, jich nix ma ba c'opoj uuc. 33La yich' pejc'anel, soc ma la sta lequil chajbanel. ¿Mach'a c'an sna'bey yaanel te sts'umbale? Melel ora pojbot xcuxlejal ta balumilal”, te xie. 34Te eunucoe la sjojc'obey te Felipee: —Wocoluc albon caiy te mach'a sc'oplal in to, te la yal te j'alwaneje. ¿Ja' bal sc'oplal la yal stuquel, o yan bal a te mach'a la yalbey sc'oplale? —xi'. 35Jich te Felipe ja' nix jajch' yalbey te bila ts'ibubil ta Sjun Dios te yac ta yilele. Jich la xcholbey yaiy te lec yach'il c'op yu'un te Jesuse. 36Te c'alal yacalic ta beele, ay ja' la staic. Jich la yal te eunucoe: —Ilawil, ay ja' li'to. ¿Ya bal xju' te ya quich' ja'e? —xi'. [ 37Te Felipe la yalbey: —Teme spisil awo'tan ya ach'uune, ya nax xju' te ya cac'bat awich' ja'e —xi'.] Jich la yal: —Jch'uunej te ja' Snich'an Dios te Jesucristoe —xi'. 38Jich yu'un la yal mandal ta comel ta beel te scarretae. Co bael xchebalic ta bay te ja'e. Te Felipe la yac'bey yich' ja' te eunucoe. 39Te c'alal loq'uic tel ta ja'e, ora nax ic'ot bael te Felipe yu'un te Espíritu yu'un te Cajwaltique. Jich te winique, ma la yilbey xan sit, ja'uc me to, bayal sbujts' yo'tan te cha'jajch' xan ta beele. 40Yan te Felipe, tey taot ta lum Azoto. Jich been c'axel ta lumlumtic. Yac ta yalel bael te lec yach'il c'op yu'un te Jesuse. C'ot c'alal ta lum Cesarea.


Copyright
Learn More

will be added

X\