Hechos 6

1Jich ora te jajch' c'op yu'un te jnopojeletic te bit'il bayal yacalic ta esmajele. Te jayeb mach'atic griego te sc'opique, jajch' scomon yaanic te yermanotac te ya xc'opojic ta hebreo-c'ope. Yu'un la yalic te ma ba ya yich' c'uxtayel te me'ba antsetic yu'unic te c'alal ya spucbeyic swe'elic ta jujun c'aale. 2Jich te lajchaytul jpuc-c'opetique la stsobic spisil te jnopojeletique. Jich la yalbeyic: —Ma lecuc teme ya jcom jbatic ta yalel sc'op Dios ta scaj spuquel te we'elile. 3Jich yu'un, quermanotac, leaic juctul winiquetic ta awolilic te lec sc'oplalique, soc te ay sp'ijil yo'tanic, soc te nojel ta yo'tanic te Ch'ul Espiritue. Ja' me ya cac'beytic swentainic in at'el to. 4Yan te jo'otique, ja' me ya cat'elintic sc'oponel Dios soc yalel te sc'op Diose —xiic. 5Spisilic lec la yaiyic te c'ope. Jich la stsaic te Esteban te ay bayal xch'uunjel yo'tane soc te nojel ta yo'tan te Ch'ul Espiritue, soc uuc te Felipe, te Prócoro, te Nicanor, te Timón, te Parmenas, soc te Nicolás te talem ta Antioquía te yac'ojix sba ta judioile. 6Te jch'uunjeletique la stec'anic ta stojol te lajchaytul jpuc-c'opetique, soc la sc'oponbeyic Dios ta stojol te juctule, soc la scajanbeyic sc'abic ta sjolic. 7Pujc' te sc'op Diose. Bayal esmaj te jnopojeletic ta bay Jerusalén. Ay tsobol sacerdoteetic te la yac' xch'uunjel yo'tanique. 8Te Esteban ay bayal yutsil yo'tan soc yu'el ta spasel bayal jchajp at'eliletic ta stojol te lume. 9Ja'uc me to, ay la stejc'an sbaic jajch'el te mach'atic ayic ta sinagoga te sbiilinejic te Libre Ayique, soc ay mach'atic talemic ta lum Cirene soc ta lum Alejandría soc ta sq'uinal Cilicia soc ta smaquen-q'uinal Asia te jajch'ic ta c'op soc te Estebane. 10Ja'uc me to, ma ju' yu'unic te la stsalic ta c'ope, melel ac'bot bayal sp'ijil yo'tan yu'un te Ch'ul Espíritu te c'alal yac ta c'ope. 11Jich yu'un la stojic jlotil-testigoetic te la yalic ta lot te yac ta stoybac'optayel Moisés soc te Dios te Estebane. 12Jich te mach'atic c'an stsalic ta c'op te Estebane, la sjachbeyic slab yo'tan te lume soc te principaletique soc te jts'ibojometique. Jich la sjumtayic ta tsaquel te Estebane, soc la yiq'uic bael ta stojol te Muc'ul Tsobleje. 13La stec'anic te jlotil-testigoetique. Jich la yalic: —Ja' in winic to, ma scom sba ta sbolc'optayel in ch'ul templo to soc te mandalile. 14Soc caiyojtic stojol te la yal te ja' ya sjin in templo to te Jesús te Nazarete, soc ya syantesbotic te costumbreetic cu'untic te la yalbotic jilel te Moisese —xiic. 15Jich te mach'atic nacalic ta Muc'ul Tsobleje, spisilic la stojlinbeyic ta ilel sit te Estebane. La yilic te pajal sit yelaw soc ch'ul abat yu'un Dios te site.


Copyrighted Material
Learn More

will be added

X\