Hechos 5

1Ja'uc me to, ay jtul winic Ananías sbiil, Safira sbiil te yiname. Ay sq'uinal la xchonic. 2Te winique la yijq'uitay jilel olil te stojol sq'uinale, soc sna'oj stojol uuc te yiname. Te yan olile tal yac'bey ta stojol te jpuc-c'opetique. 3Te Pedro caj yalbey: —Ananías, ¿bi yu'un te Satanás la snojesbat awo'tan ta spasel ta lot te Ch'ul Espíritu te bit'il la awijq'uitay jilel olil te stojol aq'uinale? 4Te c'alal ay to ta awenta a te q'uinale, ¿ma bal awu'unuc? Soc te c'alal la achone, ¿ma bal ja'ucat awu'un te stojole? ¿Bistuc jich la anop ta awo'tan? Ma ja'uc la apas ta lot te winique, ja' la apas ta lot te Diose —xi' te Pedroe. 5Te c'alal la yaiy stojol in to te Ananiase, laj ta ora, jawts'uj bael. Spisil te mach'atic la yaiybeyic stojol sc'oplale, bayal xiwic yu'un. 6Te jch'iel winiquetique tal spotsbeyic te sbaq'uetale, la sq'uechic bael soc ba smuquic. 7Ay niwan oxeb ora ta patil, och tel te yinam te Ananiase. Xujt' ma sna' stojol te bila c'otix ta pasele. 8Te Pedro la yalbey: —Albon caiy teme jich nix stojol te aq'uinalic la achonique —xi'. La yal te antse: —Jich nix a —xi'. 9Te Pedro la yalbey: —¿Bistuc la achap ac'op ta achebalic te la awilbeyic yo'tan te Espíritu yu'un te Cajwaltique? Aiya awaiy stojol, ayix ta ti'nail te mach'atic c'o smucbat jilel te amamlale. Ja' nix ya yich'bat bael abaq'uetal te ya smucbate —xi'. 10Te antse ora jawts'uj bael ta yacan te Pedroe, laj uuc. Te c'alal och tel te jch'iel winiquetique, lajemix la staic. Jich la sq'uechic bael. Ba smuquic ta bay nix smuquenal te smamlale. 11Bayal xiw yo'tanic yu'un spisil te jch'uunjeletique soc spisil yantic te la yaiyic stojol te bila c'ot ta pasele. 12Te jpuc-c'opetique ju' yu'unic spasel bayal señailetic soc jchajp at'eliletic ta stojol te lume. Spisilic jun yo'tanic la stsobilay sbaic ta bay Scorredor Salomón. 13Jtul ma'yuc mach'a jowil nax tal slaq'uic, ja'uc me to, te lume lec nax yo'tanic ta stojolic. 14Yanyan ta esmajel te jch'uunjeletique, melel tsobol ta jtul winiquetic soc antsetic tal xch'uunic te Cajwaltique. 15Soc ay la sloq'uesic bael ta calleetic te jchameletic yu'unique, la xchawanic soc swayibic swenta yu'un te c'alal ya xc'ax tey a te Pedroe, ya me xtaotic yu'un cha'oxtuluc te squeawile. 16Soc ay tsobol ta jtul te talic ta bay lumetic te ayic ta sjoylejal te Jerusalene. La yiq'uic tel te mach'atic ayic ta chamel yu'unique soc te mach'atic ayic ta uts'inel yu'un te pucujetique. Spisilic la yich'ic coltayel yu'un. 17Jich te muc' sacerdote soc te mach'atic sjoinej sbaic soque te ja' ayic ta swenta te saduceoetic sbiile, lijc' bayal slab yo'tanic. 18La stsaquic te jpuc-c'opetique, soc la yaq'uic ochel ta bay chucjibal yu'un te lume. 19Ta ajc'ubal tal jtul ch'ul abat yu'un te Cajwaltique. La sjambey sti' te chucjibale, soc la yic' loq'uel te jpuc-c'opetique. Jich la yalbey yaiyic: 20—Baan tejc'ana abaic ta templo. Albeya yaiyic spisil lum te bit'il ay sc'oplal in yach'il cuxlejal to —xi'. 21Te bit'il jich albotic la yaiyique, ta sacubel to q'uinal a ochic ta templo. Jajch'ic ta p'ijubteswanej. Te c'alal ayiquix ta templo a, te muc' sacerdote soc te mach'atic sjoinej sba soque, la yal mandal te ya stsob sba te Muc'ul Tsobleje, ja' bi ja' spisil te principaletic te yich'oj yat'elic yu'un te lum Israele. La sticun ta iq'uel loq'uel tel ta chucjibal te jpuc-c'opetique. 22C'alal c'otic ta bay chucjibal te policiaetique, ma'yuc mach'a la staiquix tey a. Jich sujt'ic tel. 23Jich c'o yalic: —Macal ta lec c'o jtatic te chucjibale. Te jcanan-chuqueletic tey teq'uelic ta scanantayel ta bay sti' te chucjibale. Te c'alal la jamtic ochel te sti' chucjibale, ma'yuc mach'a la jtatic jtuluc tey a ta bay te yutil te chucjibale —xiic. 24Te c'alal la yaiyic stojol in to, te muc' sacerdote soc te jwolwanej-canan-templo soc te jwolwanej-sacerdoteetique, jajch' yaanic bit'il ya xc'ot ta loq'uel. 25Ja'uc me to, ay mach'a tal yalbey yaiyic: —Te winiquetic te la awaq'uic ta chucjibale, ayiquix ta templo ta sp'ijubtesel te lume —xi'. 26Jich yu'un te jwolwanej-canan-templo bajt' ta ora soc te policiaetic yu'une. Sbelal la yiq'uic tel te jpuc-c'opetique, yu'un la xi'ic teme ay bit'il ya xch'ojotic ta ton yu'un te lume. 27Te c'alal c'otic soque, la stec'anic ta stojol te Muc'ul Tsobleje. Te muc' sacerdote la sjojc'obey: 28—¿Ma bal tulanuc mandal la caltic ta atojolic te ma x'awaiyiquix p'ijubteswanej ta swenta sbiil te Jesuse? Ja'uc me to, amen te bila la apasique, melel ta spamal Jerusalén, la apuquiquix te nopjibal awu'unique, soc ya ac'an awac'botic jcuchtic te bit'il laj ta milel te winique —xi'. 29Te Pedroe soc te yantic jpuc-c'opetic la yalic: —Puersa me ja' ya jch'uunbeytic smandal te Diose, ma ja'uc te winiquetique. 30Te Dios yu'un te namey q'uinal jme'-jtatique, la xcha'cuxes tel te Jesuse. Ja' nix te mach'a la awaq'uic ta milel ta jijp'anel ta cruz-te'e. 31Dios la yaq'uix ta ich'el ta muc' ta swa'el sc'ab yu'un la yaq'uix ta Ajwalil soc ta Coltaywanej, swenta yu'un ya me yac'bey sujt'es yo'tanic ta stojol Dios te israeletique. Jich me ya spasbey perdón yu'un te smulique. 32Jo'otic testigootic yu'un in to soc uuc te Ch'ul Espíritu te ac'botix yu'un Dios te jayeb mach'a yat'elinejic xch'uunel te smandale —xi' te Pedroe. 33Te c'alal la yaiyic stojole, la smich' sba yo'tanic yu'un. C'an smilic. 34Ja'uc me to, ay jtul fariseo ta Muc'ul Tsoblej, te Gamaliel sbiil, te maestro yu'un te mandalile soc te ich'bil ta muc' yu'un te lume. Ja' tejc'aj jajch'el ta c'op. La yac' ta ticunel loq'uel ajc'uc te jpuc-c'opetique. 35Jich jajch' yalbey te tsobleje: —Jlumal, tsajtaya me abaic te bila ya apasic yu'un in winiquetic to. 36Te ja'exe, ya sc'an ya ana'ic te Teudas te ayix ja'wil te la yac' sba ta ich'el ta muq'ue. La stsob swinictac te ay niwan bajc' (400) ta jtul winiquetic te tal ta joinel yu'une. Ja'uc me to, la yich' milel stuquel. Jich pujq'uic bael spisil te sjo'taque, soc tey laj sc'oplal a. 37Patil jich la spas uuc ta yorail censo te jtul Galileo-winic te Judas sbiile. La slo'lay tsobol ta jtul te ba sjoin sbaic soque, ja'uc me to, ja' nanix jich laj ta milel uuc. Spisil pujq'uic bael te swinictaque. 38Ta ora to, ja' lec te ma'yuc bi ya apasbeyic in winiquetic to. Ijq'uitayaic me. Yu'un teme swenta nax ants-winiquetic te c'op ya yalic soc te bila ya spasique, ya me xlaj sc'oplalic. 39Yan teme ja' ta swenta te Diose, ma xju' ta comel. Tsajtaya me abaic teme ma ja'uc ya acontroinic a te Diose —xi' te Gamaliele. 40Spisil te mach'atic ayic ta tsobleje, c'ot ta yo'tanic. Jich la yiq'uic ochel te jpuc-c'opetique, soc la yalic mandal te ya yich'ic majele, soc la scomic te ma me xyalbeyic xan sc'oplal sbiil te Jesuse. Jich la scoltayic bael. 41Te jpuc-c'opetic loq'uic tel ta stojol te Muc'ul Tsobleje. Bayal sbujts' yo'tanic yu'un te bit'il Dios la yac' c'otuc ta swentaic te ya xc'ax swocolic ta uts'inel ta swenta te Jesuse. 42Jujun c'aal ma la scom sbaic ta p'ijubteswanej soc ta yalel sc'oplal te Jesucristo ta bay templo soc ta bay naetic.


Copyright
Learn More

will be added

X\