Hechos 4

1Te Pedro soc te Juane yacalic to ta c'op ta stojol a te lume, talic te sacerdoteetic soc te jwolwanej yu'un te jcanan-temploe soc uuc te saduceoetique. 2La yilintayic te Pedro te Juane, te bit'il yacalic ta sp'ijubtesel te lume, yu'un ja' yacalic ta yalel te ay cha'cuxel ta bay animaetic, jich bit'il cha'cux tel te Jesuse. 3Jich yu'un la xchuquic bael. La yaq'uic ta chucjibal. La yijq'uitayic ta swenta yan c'aal, yu'un malix a te c'aale. 4Ja'uc me to, la xch'uunic Cristo bayal te mach'atic la yaiyic stojol te sc'op Diose. Jich esmaj xan te jch'uunjeletique. Ay niwan jo'mil (5,000) ta jtul te winiquetique. 5Ta yan c'aal la stsob sbaic ta Jerusalén te jwolwanejetique soc te principaletic yu'un te lume soc te jts'ibojometique. 6Tey ay a te muc' sacerdote Anás, te Caifás, te Juan, te Alejandroe, soc spisil te mach'a sts'umbal sbaic soc te muc' sacerdotee. 7La sticunic ta iq'uel loq'uel tel ta chucjibal te Pedro te Juane. La stec'anic ta olilal, soc jajch' yich'beyic sc'opic: —¿Mach'a la yac'bat tulan awat'el ta spasel in to? ¿Mach'a ta swenta sbiil te jich ya apasique? —xiic. 8Jich yu'un te Pedroe, noj ta yo'tan te Ch'ul Espiritue. Jich la yal: —Lec ay, ja'ex te jwolwanejexe, te principalex yu'un te Israele, 9teme ja' ya ajojc'obotic te lequil at'elil la yich' pasel ta stojol te coxo-winic te lecub yu'une, 10jamal me ya calbeyex ta atojolic, swenta yu'un ya me ana'ic stojol soc spisil te jlumaltic israeletique. Melel ja' nax ta swenta sbiil te Jesucristo te Nazarete, te ja'ex nix la ac'anbeyic slajel ta cruz, soc te Dios cha'cuxesotix tel yu'un ta bay te animaetique, ja' coltayotix yu'un te winic colemix ya awilique. 11Ja' in Jesús to, ja' “te ton te xujt' ma tuun yu'unic te albañiletique, ja' yiptajib xujc' na c'otix stuquele”, te xi' sc'oplale. 12Ma'yuc yan te mach'a ay colel ta swenta, melel ma'yuc yan ta spamal balumilal te yac'ojbotic sbiil te Diose te ya xju' ya xcolotic ta swentae —xi' te Pedroe. 13Te jwolwanejetic la yilic te ma ba yacalic ta xiwel te Pedro te Juane, soc la sna'ic te ma'yuc banti p'ijubtesbilic ta yilel te june, soc te joch-winiquetic naxe. Jich bayal ayan yo'tanic yu'un, soc la sna'ic te ma'yuc banti p'ijubtesbilic ta leque soc te joch-winiquetic naxe. 14Te bit'il teq'uel ta sitic te winic te colemixe, majc' sti'ic yu'un. 15Jich te Muc'ul Tsobleje la sticunic loq'uel ta stojolic te Pedro te Juane, yu'un ya xchapic te bi ya yutique. 16Jich caj yalbey sbaic: —¿Bi ya cutic in winiquetic to? Melel spisil lum Jerusalén yaiyojiquix stojol te jchajp at'elil la spasique. Ma xju' cu'untic smaquel ta c'op te ma meleluque. 17Ja'uc me to, swenta yu'un ma xpujc' ta stojol lum in c'op to, ja' lec ya calbeytic tulan mandal, swenta yu'un jich ma xyalbeyic xan sc'oplal sbiil te Jesuse ni ta ora to ni ta patilal bael —xiic ta snopel. 18Jich la yiq'uic xan ochel. Tulan mandal la yalbeyic te ma ba ya spuquic xan ta alel soc ta nopel sc'oplal te Jesuse. 19Te Pedro te Juane jich la yalbeyic te tsobleje: —Te ja'exe nopa awaiyic teme lec ta stojol Dios te ja' ya jch'uuntic te bila ya awalique, o ja' ya jch'uuntic te bila ya yal te Diose. 20Melel ma xju' ya jcom jbatic ta yalel te bila quilojtique soc te bila caiyojtic stojole —xiic. 21Te jwolwanejetique tulan la sbalic ta utel soc la scoltayic bael. Melel ma la staic te bila ya yac'beyic castigo yu'un ta scaj te lume. Melel spisil yacalic ta yalbel wocol Dios yu'un te bila c'ot ta pasele. 22Melel te winic te lecub ta swenta te jchajp at'elile, c'axemix ta cha'winic ja'wil te ya'wilale. 23C'alal colic ta libre te Pedro te Juane, bajt'ic ta banti ay te sjo'taque. C'o xcholbey yaiyic spisil te bila albotic yu'un te jwolwanej-sacerdoteetic soc te mamaletique. 24C'alal la yaiyic stojol, jun nax te bi la yalbeyic te Diose, jich la yalic: —Cajwaltic, muc' Diosat atuquel, ja'at la apas ch'ulchan balumilal soc te mare soc spisil te bitic aye. 25Te ja'ate la awal ta swenta te Ch'ul Espíritu ta swenta sti' te awabat Davide: “¿Bi yu'un te ya xjajch'ic ta ch'inlajanel te jyanlumetique? Soc ¿bi yu'un te tojol nax te bila ya snopic te ma'yuc swentaile? 26La stsob sbaic te muc' ajwaliletic ta balumilale, soc la stsob sbaic uuc te jwolwanejetique, yu'un ya scontroinic te Cajwaltic Dios soc te Cristo yu'une”, te xie. 27“Jich nix la spas a te Herodese soc te Poncio Pilatoe. La stsob sbaic li'to ta lum soc te jyanlum winiquetique soc uuc te jlumaltique. La scontroinic te Ach'ul-nich'ane te ja' te Cristo awu'une. 28Jich la spasic spisil te bila neel to chapal ta awo'tan te puersa jich ya xc'ot ta pasele. 29Ta ora to, Cajwal, ya me awilbotic te bila yalojbotic ta tulan mandale, soc ya me awac'botic stulanil co'tantic, jo'otic te awabatotic, te manchuc ya xiwotic ta yalel te ac'ope. 30Soc ta swenta awu'el ac'a coluc jchameletic soc pasuc señailetic soc jchajp at'eliletic ta swenta te Ach'ul-nich'an Jesús —xiic ta sc'oponel te Diose. 31Te c'alal laj yo'tanic ta sc'oponel te Diose, nijc' la yaiyic te banti na stsoboj sbaique, soc noj ta yo'tanic ta spisilic te Ch'ul Espiritue. Jich ma ba xiwic ta yalel te sc'op Diose. 32Te jich yipal xch'uunejiquix te Jesuse, jun nax yo'tanic soc jun nax xch'ulelic ta spisilic. Ma'yuc mach'a la yal te stuquel yu'un te sbiluque. Comon tuun yu'unic te bila ay yu'unique. 33Te jpuc-c'opetique ay bayal yipic ta yalel ta testigo te bit'il cha'cux tel te Cajwaltic Jesuse. Dios la yac'bey bendición ta c'axem to xan. 34Soc ma'yuc mach'a ay ta me'bal ta yolilic, melel te mach'atic la xchon sq'uinalic soc sbiluquic, ts'acal la yich'ic tel te stojole, 35la yac'beyic ta stojol te jpuc-c'opetique. Jich la spuquic te taq'uine, chican te bit'il tuun yu'unic juju-jtul te jch'uunjeletique. 36Jich bit'il te jtul levita-winic te José sbiil te ja' slumal te Chipre. Bernabé sbiil c'oemix yu'unic te jpuc-c'opetique, ja' bi, “Jmuc'tesej-q'uinal”, xi' c'oem te sbiile. 37Ja' in winic to, ay sq'uinal la xchon. Te stojole la yich' tel, la yac'bey ta stojol te jpuc-c'opetique.


Copyright
Learn More

will be added

X\