Hechos 28

1C'alal colemotiquix loq'uel ta mar ta jpisiltic, la caiytic stojol te bit'il Malta sbiil te q'uinal te joytaybil ta mare. 2C'axem to xan la xc'uxtayotic te mach'atic ainemic tey a. Melel la snup'ic c'ajc', jich la yic'otic ta sc'atinel ta scaj te ay siquil te q'uinale soc te ja'al te yac ta yalele. 3Jich te Pablo la stsob tel jtebuc taquin si'. C'alal la yac' ochel ta c'ajc', loc' tel ta anel cojt' jti'awal chan yu'un xq'uixnal te c'ajq'ue. Tsacbot ta ti'el sc'ab yu'un te Pabloe. 4La yilic te mach'atic ainemic tey a te bit'il jipil ta sc'ab jti'awal chan te Pabloe. Jich caj yalbey sbaic yu'un: —Ja' in winic to, mero jmilawal niwan. Manchuc teme colix ta lajel ta mar, ja'uc me to, ma x'ac'ot cuxinuc xan yu'un te chajbanel yu'un te dios cu'untique —xiic. 5Ja'uc me to, te Pablo la slilan ochel ta c'ajc' te jti'awal chane. Xujt' ma'yuc bila pasbot yu'un. 6Spisilic la smaliy yilic teme ya sijt' jajch'el, o teme ya xt'uxaj ta lajel ta ora naxe. Jalajic ta smaliyel yilic, ja'uc me to, ma'yuc bi pasbot yu'un xujt'uc te jti'awal chane. Jich yanaj snopjibal yu'unic. La yalic te ja' niwan dios te Pabloe. 7Nopol ay tey a te sq'uinal te ajwalil yu'un te Maltae te Publio sbiile. Ja' la yic'otic ochel ta sna. Bin nax yo'tan la smac'linotic oxeb c'aal. 8Te stat te Publio ay ta chamel. Chawal ta swayib yu'un tulan c'ajc', soc ay ta ch'ich'-tsa'nel. Te Pabloe ba yil, soc la sc'oponbey Dios ta stojol. La scajanbey sc'ab ta sjol, jich lamaj te xchamele. 9Jich talic spisilic te mach'atic ayic ta chamel te ainemic tey a ta bay sq'uinal Malta, soc la yich' lamantesel xchamelic ta spisilic. 10Jich la yac'botic bayal jmajt'antic. Soc ta patil te c'alal bootic ta barcoe, la yac'botic bael spisil te bila ya xtuun cu'untic ta beele. 11Jalajotic oxeb u tey a ta bay te ch'in q'uinal joytaybil ta mare. Jich ochotic ta yan barco te talem ta lum Alejandría, tey la smaliy c'ax a te invierno te yajwale. Ta sjol te barcoe tey loc'taybil yu'unic a te diosetic Cástor soc Pólux te sbiilique. 12Jich c'ootic ta lum Siracusa. Tey jalajotic oxeb c'aal a. 13Jajch'otic xan ta beel ta barco. Tey beenotic bael ta sti'il-ti'il te q'uinale. Jich c'ootic ta lum Regio. Ta yan c'aal la quiltic te ay lequil ic' tal ta stojol sur. Jich cheb nax c'aal c'ootic ta lum Puteoli. 14Tey la jtatic quermanotactic te la yalbotic wocol te yacuc jointic junuc semana. Patil jajch'otic ta beel, bootic ta lum Roma. 15Te quermanotactic ta lum Roma loq'uic tel staotic ta be te bit'il la yaiyiquix stojol te ayotic tel ta beele. Tey la staotic a ta bay ch'in lum te Foro de Apio sbiile soc uuc ta bay wayibal-na te Tres Tabernas sbiile. Te Pablo la yalbey wocol Dios yu'un te c'alal la yilbey sitique, soc muc'ub q'uinal la yaiy. 16Te c'alal c'ootic ta lum Roma, te centurión c'o yac'bey ta sc'ab te comandante te jchuqueletic te yic'oj tele. Ja'uc me to, te Pabloe ac'bot permiso te q'uejel ya x'ain stuquele. Ja' nax jtul soldado la yich' canantayel yu'un spisil ora. 17Ta yoxebal c'aal sc'oel ta lum Roma a, te Pablo la sticun ta iq'uel te jwolwanejetic yu'un te judioetic te ainemic ta lum Roma. Te c'alal la stsob sbaiquix tele, jich caj yal ta stojolic: —Quermanotac, te jo'one ma'yuc bila jpasoj ta stojol te jlumaltic judioetique soc ma'yuc bay jcontroinej te costumbreetic yu'un te jme'-jtatique. Ja'uc me to, ta Jerusalén ac'oton ta sc'ab te romanoetique. 18Te c'alal la sjojc'obonic ta lec te bit'il ay te aiyej cu'une, jich yo'tanic te c'an scoltayonic ta chuquele, yu'un ma ba la stabonic te bila ya xju' te ya x'ac'oton ta lajel yu'une. 19Ja'uc me to, te jlumaltique ma jichuc yo'tanic stuquel. Ja' swentail te puersa la jc'an te ya xchajbanon te muc' ajwalil Cesare. Ja'uc me to, ma yu'unuc tal cal te ay smulic te jlumale. 20Jich yu'un la quiq'uex tel te ya xc'opojon ta atojolique. Melel te bit'il chuculon ta cadena ya awilique, ja' nax ta scaj te bila smuc'ulinej co'tantic ta smaliyel jo'otic te israelotique —xi' te Pabloe. 21La yalic te judioetique: —Te jo'otique, ma'yuc bay staojotic carta yu'un te jlumaltic ta Judea te tey cholbil ac'oplal a. Soc ni jtuluc quermanotactic te tal yalbotic teme ay bila amen apasoje. 22Ja'uc me to, co'tan caiytic stojol te nopjibal awu'une, yu'un caiyojtic stojol te controinbil ta bayuc te mach'atic yac'oj sbaic ta xch'uunel te ach' nopjibale —xiic. 23Jich la xchapic te bi c'aalil ya xtal yaiyic stojole. C'alal la sta sc'aalelal, tsobol ta jtul tal stsob sbaic tey a ta banti smajanej na te Pabloe. Sab to jajch' ta c'op, ja' to c'alal malix a te c'aale. Ja' la xcholbey yaiyic te bit'il ay ta ajwalinel te Diose. Yu'un yo'tanuc ya yac' xch'uunic Jesús ta swenta te bila ts'ibubil jilel sc'oplal ta bay te mandalil yu'un te Moisese soc ta bay sjun te j'alwanejetique. 24Ay c'ot ta yo'tanic te bila la yal te Pabloe, soc ay te ma la sc'an xch'uunique. 25Jich ma junuc nax yo'tanic yu'un te bi la yal te Pabloe. C'an jajch'uquic bael, ja'uc me to, jich albotic xan yu'un te Pabloe: —Melel nix a te bi la yal te Ch'ul Espíritu ta stojol te antiguo jme'-jtatique, ta swenta te Isaías te j'alwanej yu'un Dios te jich la yale: 26“Baan, c'opona te lume, jich me xawalbey yaiyic: ‘Ya awaiy stojol ta achiquinic, ja'uc me to, ma xc'ot ta awo'tanic. Ya awil ta asitic, ja'uc me to, ma x'ataic ta ilel', uta me. 27Melel te yo'tanic te lume, pimuben ta jc'axel; wocol ya sc'an ya yaiyic stojol ta xchiquinic. Smuts'oj sitic, yu'un ma sc'an yilic ta sitic. Soc ma sc'an yaiyic stojol c'op ta xchiquinic, soc ma xyac' te ya xc'ot ta yo'tanique. Soc ma sc'an sujt'es yo'tanic ta jtojol te ya jlamantesbey xchamelic, xi' te Diose”, te xie. 28Na'aic me stojol jiche: Ja' me ya xc'ot ta swentaic te jyanlumetic te bit'il ay colel yu'un te Diose. Ja' me ya yaiyic stojol stuquelic —xi' te Pabloe. 29[C'alal jich la yal te Pabloe, loq'uic bael te judioetique. Bayal bila caj sjac'bey sbaic yu'un.] 30Ja'uc me to, te Pablo cheb ja'wil ain tey a ta bay smajanej te nae. La yic' ochel spisil te mach'atic talic ta ilel yu'une. 31Jamal la xcholbey yaiyic te bit'il ay ta ajwalinel te Diose, soc la yac'bey snopic te bit'il ay sc'oplal te Cajwaltic Jesucristoe. Jtul ma'yuc mach'a comot ta yalel yu'un.


Copyright
Learn More

will be added

X\