Hechos 26

1Jich te Agripa la yalbey te Pabloe: —Ya me awal caiytic te bit'il ayate —xi'. Jich la stoy sc'ab te Pabloe. Caj ta c'op: 2—Muc' ajwalil Agripa, bin nax co'tan te ya calbat awaiy spisil te bila jmulinej ta sc'opic te jlumal judioetique. 3Melel te ja'ate ana'oj stojol spisil te jcostumbretique soc te bit'il ma jchajbuc nax nopjibal cu'untique. Ja' swentail te ya calbat wocol te ya awaiybon stojol spisil te bila ya cal ta atojole. 4“Sna'ojic stojol te judioetic te bit'il ay te jcuxlejale. Ta jqueremil to tel ainon ta yolilic, ta jlumal soc ta Jerusalén. 5Te yacuc sc'an yo'tanique, ya xju' ya yalic te bit'il ta jqueremil to tel fariseoon. C'ax jich ya jtsajtay jba a te bila ch'uunbil yu'unic te jlumale. 6Ta ora to ja' ic'bilon ta chajbanel yu'un te bit'il ay smuc'ul co'tan ta smaliyel te bila xchapoj Dios ta stojol te antiguo jme'-jtatique. 7Ta jpisiltic te lajchaychajp sts'umbalotic Israel yacotic ta smaliyel te bi ora ya xc'ot ta pasel te bila yaloj te Diose. Ja' swentail te c'aal ajc'ubal ya jlajin jbatic ta stojol te Diose. Muc' ajwalil Agripa, ma'yuc yan swentail te sleojbonic jmul te judioetic ta Jerusalén, ja' nax te bit'il ay smuc'ul co'tan ta smaliyel te bila yaloj te Diose. 8¿Bi yu'un ma ba ya ach'uunic te Dios ya xcha'cuxes tel animaetique? 9“Ta neelal la jcuy te ya sc'an controinel te Jesús te Nazarete. 10Jich nix la jpas ta Jerusalén. La quich' cat'el yu'un te jwolwanej-sacerdoteetic te ya cac' ta chucjibal te mach'atic ch'ul lum yu'un te Diose. Teme ay ac'ot ta lajele, jich co'tan yu'un uuc. 11Bayal buelta la cac'bey castigo ta sinagogaetic. La cac' puersa ta stoybac'optayel. Scaj te bayal jajch'em slab co'tan yu'unique, jich boon ta yuts'inel ta bay slumalic te jyanlumetique. 12“Te bit'il jich ayon ta spasele, boon ta lum Damasco. Ay cat'el quich'oj soc ticunbilon bael yu'un te jwolwanej-sacerdoteetique. 13Ja'uc me to, muc' ajwalil Agripa, olilix c'aal a te yacon ta beel ta be, lem tel ta ch'ulchan xojobal q'uinal te c'ax jich yip te bit'il yip xojobil te c'aale. Xojobaj nax q'uinal c'ot ta sjoylejal te banti ayon soc te mach'atic sjoinejon ta beele. 14Jich t'uxajotic coel ta lum, soc la caiybey stojol sc'op te mach'a la sc'oponon ta hebreo-c'op: “Saulo, Saulo, ¿bistuc te ya awuts'inone? Atuquel ya awuts'in aba te ya alombey ta teq'uel c'oem te sni' atojtesjibale”, la yuton. 15Jich la calbey: “¿Mach'aat a, Cajwal?”, xoon. Jich la yalbon te Cajwaltique: “Jo'on Jesuson te ya awuts'inone. 16Ja'uc me to, jajch'an, tejc'ana aba, yu'un ja' swentail te la cac' jba ta ilel awu'une te ja' ya cabatinat ta testigo te bit'il la awilone soc te bila ya cac'bat xan awil ta patile. 17Ya me jcoltayat ta sc'ab te alumale soc ta stojol uuc te jyanlumetique, te ja' ya jticunat bael ta stojolique. 18Yu'un ya me xc'o ajambey sitic, swenta yu'un ya yijq'uitayic te ijc' q'uinale, jich me ya xbeenic ta saquil q'uinal. Soc swenta yu'un ma me ayuc xan ta sc'ab te Satanase, ja' me ya yac' sbaic ta sc'ab te Diose. Jich me ya xch'uunonic, soc ya me jpasbey perdón yu'un te smulique, soc ya me yac' ainuquic tey a ta banti ainemic te mach'atic ch'ultesbilique”, xi' ta yalbelon te Jesuse. 19“Jich yu'un, muc' ajwalil Agripa, ma la jch'aybey smandal te mach'a la quil ta stelemal yilel te chicnaj tel ta ch'ulchane. 20Ja' sbabial la cal ta lum Damasco, soc ta patil ta lum Jerusalén, soc ta spamal sq'uinal Judea, soc ta stojol te jyanlumetique. La calbey te ya sc'an te ya yijq'uitayic te smulique, soc te ya sujt'es yo'tanic ta stojol te Diose, soc te ya sc'an xyanaj xcuxlejalic ta stojol te Diose, soc te ya sc'an ya xchicnaj ta yat'elic te bit'il sujt'emix yo'tanic ta melele. 21Ja' swentail te la stsaconic ta templo te judioetic ta Jerusalén soc te c'an smilonique. 22Ja'uc me to, te bit'il la scoltayon te Diose jich jun co'tan yacon ta yalel sc'oplal ta ora to ta stojol spisil muc'-biq'uit. Ma'yuc yan te bila ya cal, ja' nix ya cal te bila yalojic te antiguo j'alwanejetic soc te Moisese. Jich la yalic te ya xc'ot ta pasel 23te ya xc'ax swocol te Cristoe soc te ja' sbabial te ya xcha'cux tel ta bay te animaetique, swenta yu'un ya yalbey judioetic soc jyanlumetic te bit'il ay sc'oplal te saquil q'uinale —xi' te Pabloe. 24Te bit'il jich yac ta yalel a te Pabloe, te Festo tulan c'opoj yu'un: —Pablo, bolobix ajol yu'un te bayal junetic la anopixe —la yut. 25Jich la yal te Pabloe: —Ajwalil Festo, ma ba boloben te jole. Ay swentail te jc'ope, soc smelelil te bila yacon ta yalele. 26Te muc' ajwalil Agripa te nacal li'to, sna'oj stojol spisil in to. Ja' swentail te jamal co'tan yacon ta c'op ta stojole. Melel xcal te yaiyoj stojol spisil in to, melel ma muquenuc te bay c'ot ta pasele. 27Te ja'ate muc' ajwalil Agripa, ¿ach'uunej bal te bila yalojic te j'alwanejetic yu'un te Diose? Ya jna' te ach'uuneje —xi' te Pabloe. 28La yal te Agripae: —Jteb xanix ya sc'an te ya x'ochon ta cristiano awu'une —xi'. 29La yal te Pabloe: —Teme jich yo'tan Dios, chican teme ora naxe, o teme jal to c'aale, co'tanuc jichucat te bit'ilone. Soc ma atuqueluc nax te ja'ate, soc spisil te mach'a li' ay to te ya yaiybonic stojol te jc'ope. Ma yu'unuc ya cal te ya awich'ic chuquel ta cadena jich bit'il te jo'one —xi' te Pabloe. 30C'alal laj yo'tan ta c'op te Pablo la stejc'an sbaic jajch'el te muc' ajwalil Agripa soc te ajwalil Festo soc te Berenice soc spisil mach'atic sjoinejic ta naclej. 31Te c'alal loq'uiquix bael tey a, jich caj yalbey sbaic: —Ma'yuc bi spasoj te winique te ya xju' xlaj yu'une, ni ya xju' ta chuquel yu'un —xi' sc'oplal yu'unic te Pabloe. 32Te Agripa jich la yalbey te Festoe: —Ya stac' xcol bael te winic te manchuc ja'uc la sc'an stuquel te ja' ya xchajbanot yu'un te muc' ajwalil César —xi'.


Copyright
Learn More

will be added

X\