Hechos 25

1Jich och ta ajwalil ta lum Cesarea te Festoe. Oxeb c'aal ta patil bajt' ta Jerusalén. 2Te jwolwanej-sacerdoteetic soc te principaletic te buen ich'bilic ta muc' yu'un te judioetique, la stsob sbaic tel ta stojol te ajwalile. Tal yalbeyic aiyej ta swenta te Pabloe. 3La yalbeyic wocol te yacuc pasbotuc te bila ya sc'anique, ja' bi, ja' te yacuc sticun ta iq'uel tel ta Jerusalén te Pabloe, yu'un snopojic te muquen ya sticunic ta milel ta be. 4Ja'uc me to, la yal te Festoe: —Chucul ta lum Cesarea te Pabloe, soc nopol ya xboon tey a. 5Jich yu'un te mach'a jayeb awich'oj awat'elique, ya me ajoinonic bael ta Cesarea. Tey me ya xc'o awalic ta jtojol a teme ay bila amen spasoj te winique —la yut. 6Te Festoe, ay niwan waxaquebuc c'aal o lajunebuc c'aal te ay ta Jerusalén. Jich sujt' bael ta lum Cesarea. C'alal c'ot tey a, ta yan c'aal c'o najc'ajuc ta bay te chajbajibal yu'une, soc la sticun ta iq'uel tel te Pabloe. 7C'alal och tel te Pabloe, te judioetic te talic ta Jerusalén la sjoytayic. Jich jajch' yalic spisil te bila muc' sc'oplal smulinej ta sc'opique. Ja'uc me to, ma ba ju' yu'unic yaq'uel ta ilel teme melel te ay smule. 8Jich yu'un la yal te Pabloe: —Te jo'one ma'yuc banti la jc'axintay te mandalil yu'un te jlumale, soc ma'yuc banti la jboltesbey te temploe, soc ma'yuc banti la jcontroin te muc' ajwalil César ta Roma —xi' te Pabloe. 9Ja'uc me to, te Festo la sc'an yo'tan te ya spasbey te bila lec yo'tanic yu'un te judioetique. Jich la sjojc'obey yaiy te Pabloe: —¿Ya bal ac'an xmoat bael ta Jerusalén, swenta yu'un ya awich' chajbanel cu'un tey a? —xi' te Festoe. 10La yal te Pabloe: —Li' ayon to ta bay chajbajibal yu'un te muc' ajwalil César, te banti ya sc'an te ya quich' chajbanele. Ana'oj stojol ta melel te xujt' ma'yuc jmul ta stojol te jlumal judioetique. 11Teme ay bila muc' amen jpasoj te ya sc'an ya quich' milel yu'une, ac'a lajucon abi. Yan teme ma meleluc xujt'uc spisil te bila jmulinej ta sc'opique, ma'yuc mach'a ya xju' ya yac'on ta sc'abic. Ja' ya jc'an te ya xba quich' chajbanel yu'un stuquel te muc' ajwalil César —xi' te Pabloe. 12Jich te Festoe la yaan soc te sjo'tac ta at'ele. Patil la yalbey te Pabloe: —Te bit'il ja' ya ac'an te ya awich' chajbanel yu'un te Cesare, ya me xbaat ta stojol jiche —xi'. 13Bayal c'aal ta patil talic ta lum Cesarea te muc' ajwalil Agripa soc te Berenicee. Tal spatbeyic yo'tan te Festoe. 14Te bit'il jalajic bayal c'aal tey a, jich te Festoe caj xcholbey yaiy te muc' ajwalil Agripa te bit'il ay sc'oplal te Pabloe. Jich la yalbey: —Ay jtul winic li'to te chucul jilel yu'un te Felix. 15Te c'alal c'oon ta Jerusalén, la stsob sbaic tel ta jtojol te jwolwanej-sacerdoteetic soc te principaletic yu'un te judioetique. La sc'anbonic te yacuc cac' ta milele. 16La calbey te ma c'aemuquic te romanoetic te ya yaq'uic ta lajel jtul winic teme ma neeluc ya situy sba ta c'op soc te mach'a jle-muliletique, swenta yu'un ya me xc'opoj uuc te winique. 17Jich yu'un te c'alal talique, la jnop te ma ba ya cac' c'axuc xan c'aale. Jich la jnajc'an jba ta chajbajibal ta yan c'aalil, soc la jticun ta iq'uel tel te winique. 18Ja'uc me to, te c'alal jajch' yalic te bila smulinej yu'unic ta sc'opique, ma ja'uc la yalic te bit'il jcuyoj te ya yalique. 19Ja' nax smul c'oem yu'unic te bit'il ay c'op jajch'em yu'unic soc te Pablo ta swenta te bila xch'uunejique, soc ta swenta jtul anima-winic Jesús sbiil te cuxulix ta sc'op stuquel te Pabloe. 20Te bit'il ma la jna' te bi ya cut ya jchajbane, jich la jojc'obey te Pabloe teme ya sc'an xbajt' ta Jerusalén, swenta yu'un tey me ya yich' chajbanel a. 21Ja'uc me to, scaj te ja' la sc'an te ya yich' chajbanel yu'un te muc' ajwalil Cesare, jich la cal mandal te chucul ya xjil ja' to te bi ora ya xju' cu'un te ya jticun bael ta stojol te muc' ajwalil Cesare —xi' te Festoe. 22Te Agripa la yalbey te Festoe: —Co'tan caiybey stojol sc'op te winique —xi'. La yal te Festoe: —Ya me awaiybey stojol sc'op pajel —xi'. 23Ta yan c'aal tal te Agripa soc te Berenicee. Jelawen yutsilic la xchol sbaic ochel ta bay stsobjibal soc te coroneletic soc te mach'atic ich'bilic ta muc' yu'un te lume. Jich te Festoe la yal mandal ta iq'uel tel te Pabloe. 24Jich jajch' ta c'op te Festoe: —Ja'at muc' ajwalil Agripa soc uuc te ja'ex winiquetic te atsoboj abaic li'to, li' ayix ta jtojoltic te winique. Tsobol judioetic te la sc'opononic yu'un li'to ta bay Cesarea soc ta Jerusalén, ma xlaj yo'tanic ta sc'anel slajel te winique. 25Yan te jo'one, ma'yuc bay jtaojbey smul xujt'uc te ya stac' ya xlaj yu'une. Soc te bit'il la sc'anix stuquel te ya yich' chajbanel yu'un te muc' ajwalil Cesare, jich jnopojix te ya jticun bael tey a. 26Ja'uc me to, scaj te ma'yuc bi stac' ya calbey sc'oplal ta carta te ajwalil Cesare, ja' swentail te la quiq'uix loq'uel tel ta atojolic ta apisilic te ja'exe, soc ta atojol ja'at muc' ajwalil Agripa. Ya me awaiybonic teme ya xwejt' te bila ya jts'ibubey bael ta scarta te Cesare. 27Yu'un ma spas ya caiy te tojol nax ya jticun bael jtul jchuquel, teme ma jna' te bila ya cal bael ta carta te bila smulineje —xi' te Festoe.


Copyright
Learn More

will be added

X\