Hechos 24

1Jo'eb c'aal ta patil c'ot ta lum Cesarea uuc te muc' sacerdote Ananiase. Sjoinej cha'oxtul te principaletic yu'un te lume soc uuc jtul licenciado te Tértulo sbiile. C'o yalic ta stojol ajwalil te bila smulinej ta sc'opic te Pabloe. 2- 3Te c'alal ic'otix tel a te Pabloe, te Tértulo jajch' yal te bila smulinej ta sc'opique. Jich la yal ta stojol te ajwalil Felix: —Ajwalil Félix, wocol awal yu'un te bit'il lamal q'uinal ya caiytic ta jpisiltique. Lec chapalotic awu'un ta swenta te sp'ijil awo'tane. Jich bin nax co'tantic awu'un. 4Ja'uc me to, swenta yu'un ma ba xch'ay c'aal awu'un, ya calbat wocol te yacuc awaiybotic stojol jc'optic cha'oxp'aluc nax soc te yutsil awo'tane. 5Yu'un in winic to, chican ta jamal te mero jbolteswaneje. Ja' yac ta xjajch'esel c'op ta bayuc te banti pujq'uemic te judioetique, soc ja' jolol yu'un te mach'atic jowejemic te st'unojic Jesús te Nazarete, 6soc c'an yac' bolobuc te temploe. Jich la jtsactic, [soc c'an jchajbantic ta swenta te mandalil cu'untique. 7Ja'uc me to, tal te coronele te Lisiase. Sc'ajc'al nax la spojbotic loq'uel ta jc'abtic, 8soc la yal mandal te ya xtal sc'oponat te mach'atic sna'ojic te ay smule.] Jich yu'un teme ya ajojc'obey awaiy stuquel te winique, jich me ya ana' te bit'il ja' smul ta melel spisil te bila la calbatixe —xi' te licenciadoe. 9Te judioetic te talemique la yalic uuc te jich nix a te smule. 10Jich te ajwalile la yac'bey seña yil te Pablo te ya xc'opoje. Jich caj ta c'op te Pabloe: —Bin nax co'tan te ya calbat awaiy te bit'il ayone, melel jna'oj stojol te ayix ja'wil awich'oj awat'el ta juez ta stojol te jlumale. 11Teme ya ajojc'o xan ta lec awaiye, jich me ya ana' stojol te bit'il ma to xloc' lajchayeb c'aal te xc'otuc jlajin jba ta stojol Dios ta Jerusalén. 12Ma'yuc bay la staonic te tulan yacon ta jc'op soc yantic ta templo. Ma'yuc la jajch'es c'op tey a, ni ja'uc ta sinagogaetic, ni ta yolil lum. 13In winiquetic to ma staic te bila ya yac' ta ilel te ay bila amen jpasoje. 14Ja'uc me to, ya calbat ta jamal te ja' jch'uunej te yach'il be yu'un Dios te scuyojic te jowejemon yu'une, soc ja' jch'uunej te Dios yu'un te antiguo jme'-jtate. Jich jch'uunej spisil te bila ya yal te mandalile soc te bila ts'ibubil jilel yu'un te antiguo j'alwanejetique. 15Pajal ay smuc'ul co'tan soc in winiquetic to, te melel jmaliyej uuc te ya xcha'cux tel te animaetique, chican teme lec yat'elic o teme amen te yat'elique. 16Ja' swentail te spisil ora ya jtsajtay jba ta stojol Dios soc ta stojol ants-winiquetic, swenta yu'un ma me jta jmul ta stojolic. 17“Te bit'il c'axemix che'oxeb ja'wil cu'un ta beel ta yantic lumlumtique, jich sujt'on tel ta bay te jlumale. La quich' tel taq'uin swenta scoltayel te jlumale, soc ba cac'bey smajt'an Dios ta templo. 18Jich yacon ta spasel a te la staonic ta yutil templo cha'oxtul judioetic te talemic ta Asia. Lajix co'tan ta utstesel a, soc ma yu'unuc ayuc tsobol jwinictac soc ma'yucon ta xjajch'esel c'op tey a. 19Ja' ya sc'an ya xtalic li'to ta yalel ta atojol te bila jmul jtaoj ta sc'opique, teme ay bila ma lecuc la jpas te la yilique. 20Ja'uc me to, teme ma'yuque, ja' ac'a yalic te mach'atic li' ayic to, teme ay jmul la stabonic te c'alal la quich' tejc'anel ta stojol te Muc'ul Tsoblej yu'unique. 21O teme ja' jmul te bila la cal ta jamal ta tulan c'op ta stojol te tsobleje: “Ta ora to ayon ta chajbanel awu'unic yu'un te bit'il ay smuc'ul co'tan ta smaliyel te ya xcha'cux te animaetic”, te xoon ta stojolique —xi' te Pabloe. 22Ja'uc me to, te Felixe yaiyojix stojol te bit'il ay te yach'il nopjibal yu'un te Jesuse. Jich la squejch'an ta chajbanel te aiyej yu'un te Pabloe. Soc la yal: —Te c'alal ya xtal te coronel Lisiase, ya me jojc'obey xan caiy te aiyej awu'unique —la yut te judioetique. 23Jich te Felixe la spas ta mandal te centurión te jich nax ya yich' canantayel yu'unic te Pabloe, ja' bi ja' te ma jc'axeluc ya yich' chuquel yu'unic soc ay permiso te ya xtal ta ilel yu'un te sjo'taque. 24C'axix che'oxeb c'aal a te tal te Félix soc te yinam Drusilae te judia-antse. La sticun ta iq'uel te Pabloe. Jich la yaiyic stojol ta lec te bit'il ay xch'uunjel yo'tan ta stojol te Jesucristoe. 25Te Pablo la yaanbey yaiy te bit'il ya sc'an te toj ya x'ainotic ta q'uinale, soc te bit'il ya sc'an ya jna'tic scomel jbatic ta jtuqueltique, soc te bit'il ya sta yorail te ya yilbotic cat'eltic juju-jtulotic te Diose. Tey nax caj ta xiwel yu'un a te Felixe. Jich la yalbey: —Lec ay, baanix. Ya me jticunat xan ta iq'uel te bi ora ya xjojch'ajone —la yut bael. 26Te Félix yo'tanuc te yacuc x'ac'bot taq'uin yu'un te Pablo swenta yu'un ya me scoltay bael te jichuque. Ja' swentail te bayal buelta la sticun ta iq'uel loq'uel tel ta sc'oponele. 27Cheb ja'wil jich la spasulay te Felixe. Jich loc' ta ajwalil. Ja' la sjelolin jilel ta ajwalil te Porcio Festo. Te Félix la sc'an yo'tan te lecuc yo'tan ya xjilic yu'un te judioetique, jich la yijq'uitay ta chucjibal te Pabloe.


Copyright
Learn More

will be added

X\