Hechos 23

1Te Pabloe la yilbey sit te mach'atic ayic ta Muc'ul Tsobleje. Jich la yal: —Quermanotac, te jo'one, jun co'tan cuxinemon tel ta stojol te Diose, ja' to c'alal ta ora to —xi'. 2Jich te muc' sacerdote Ananiase la yalbey mandal te mach'a nopol teq'uel soc te Pabloe te ya spac'bey ta majel te yee. 3La yal te Pabloe: —¡Dios ya me smajat uuc ja'at te cha'lam awo'tane! ¿Ja'at bal te nacalat ta chajbanwanej ta swenta te mandalile? Melel contra mandalil te la awac'on ta majele —xi' te Pabloe. 4Jich te mach'atic tey ayic a la yalbeyic te Pabloe: —¿Bi yu'un te ya atoybac'optay te muc' sacerdote yu'un te Diose? —la yutic. 5La yal te Pabloe: —Quermanotac, ma la jna' teme ja' te muc' sacerdotee, melel ya yal te ts'ibubil ta Sjun te Diose: “Ma me xabolc'optay te mach'a yich'oj yat'el ta alumale”, te xie —xi' te Pabloe. 6Te Pablo la sna' te ay saduceoetic soc fariseoetic te capalic ta Muc'ul Tsobleje. Jich la stoy xan sc'op ta sc'oponel: —Quermanotac, te jo'one fariseoon soc snich'anon fariseo. Ja' ayon ta chajbanel yu'un te bit'il ay smuc'ul co'tan ta smaliyel te ya xcha'cux tel te animaetique —xi' te Pabloe. 7Te c'alal jich la yal te Pabloe, jajch' bayal c'op yu'unic a te fariseoetique soc te saduceoetique. Jich ma junuc nax yo'tan sbaic c'ot te tsobleje. 8Yu'un te saduceoetic ya yalic te ma'yuc cha'cuxel, soc te ma'yuc ch'ul abatetic, soc ma'yuc ch'ulelaletic ta sc'opic. Yan te fariseoetique, ya yalic te spisil aye. 9Jich xch'inch'onic nax ta c'op ta spisilic. Ay la stejc'an sbaic ta c'op te jts'ibojometique soc uuc te fariseoetique, tulan c'opojic: —Ja' in winic to, ma'yuc bila amen spasoj. Ma jna'tic teme ay c'oponotix yu'un ch'ulelal o teme ch'ul abate. Ma me teyuc ya jcontrointic a te Diose —xi' sc'oplal yu'unic. 10Te bit'il c'ax bulan te c'ope, jich jajch' ta xiwel te coronele. Ja' la sna' teme ya xlaj ta sesanel ta milel yu'unic te Pabloe. Jich la sticun coel soldadoetic te ya xba sloq'uesic tel ta yolil tsoblej te Pabloe, soc te ya yiq'uic ochel yan buelta ta bay te cuartele. 11Ta ajc'ubal te Cajwaltique la stejc'an sba ta stojol te Pabloe. Jich albot yu'un: —Pablo, ac'a stulanil awo'tan. Jich te bit'il la awalbonix jc'oplal li'to ta Jerusalén, ja' nanix jich ya xc'o awalbon jc'oplal ta lum Roma —utot yu'un. 12Ta yan c'aal ay judioetic te la xchap sc'opic te bit'il ya smilic te Pabloe: —Ya me yac'botic castigo te Dios teme ya xwe'-x'uch'ajotic te bit'il ma to xlaj ta milel cu'untic a te Pabloe —xiic ta xchapel. 13C'axem ta cha'winic (40) ta jtul te winiquetique te jich xchapojic ta comone. 14Jich la sc'oponic te wolwanej-sacerdoteetic soc te principaletic yu'un te judioetique, jich c'o yalic ta stojol: —Te jo'otique la jchaptiquix jc'optic te ya me yac'botic castigo te Diose teme ya xwe'-x'uch'ajotic te bit'il ma to xlaj ta milel cu'untic a te Pabloe. 15Jich yu'un te ja'exe soc te yantic te ay awat'elic ta Muc'ul Tsobleje, c'anbeyaic te coronele te yacuc yic' loq'uel tel pajel ta atojolic te Pabloe. Ya me awalbeyic te yu'un ay bi ya ajojc'obey xan awaiyic te Pabloe. In te jo'otique, chapalotic meix te ya jmiltic ta ora te ma to xjul tel tey a ta banti ya atsob abaique —xiic. 16Ja'uc me to, te yal xwix te Pabloe la yaiy stojol te jich chapalix sc'oplal yu'unic te Pabloe. Jich a bajt' ta cuartel. Ba yalbey yaiy te yichane. 17Jich te Pabloe la yic' tel jtul te centurión yu'un soldadoe. Jich la yalbey: —Ic'bon bael ta stojol coronele in querem to, yu'un ay bi ya yalbey yaiy —xi'. 18Jich te centurión yu'un soldado la yic' bael ta stojol coronel te quereme. Jich c'o yalbey: —Te Pablo te ay ta chuquele, la yalbon wocol te ya quic'bat tel ta atojol in querem to, yu'un ay laj bi ya yalbat awaiy —xi' te centurione. 19Te coronel la stsacbey sc'ab te quereme, la yic' bael sjojc'obey ta muquen: —¿Bila a te ya awalbone? —xi'. 20Jich caj yal te quereme: —Yu'un te judioetic la xchapix sc'opic te ya sc'anbat te pajel ya awic' loq'uel Pablo ta bay te Muc'ul Tsoblej yu'unique. Ya laj me yalbat te yu'un ay to bi ya sc'an ya sjojc'obeyic xan te Pabloe. 21Ja'uc me to, ma me xach'uunbey sc'opic, yu'un c'axem ta cha'winic (40) ta jtul winiquetic te ya smaquic ta milel te Pabloe. Xchapojiquix ta stojol Dios te ma xwe'-x'uch'ajic xujt'uque ja' to teme la smilic te Pabloe. Chapaliquix ta ora to. Ja' xanix ya smaliy yaiyic te bila ya awale —xi' te quereme. 22Jich te coronele la sticun bael te quereme, soc la yalbey mandal te ma me ayuc mach'a ya yalbey yaiy jtuluc te bit'il xtaluc yal jilele. 23Jich te coronele la yic' tel cheb te centurionetic yu'une. La yalbey mandal te ya xba xchajban lajunwinic (200) ta jtul soldadoetic te ya xbeenic ta yacane, soc lajuneb xchanwinic (70) ta jtul soldadoetic te cajal ta caballo ya xbeenique, soc lajunwinic (200) ta jtul te yich'oj slanzaique, swenta yu'un ya me xbajt'ic ta lum Cesarea ta baluneb ora ajc'ubal. 24Soc la yal mandal ta chajbanel caballo te ya scajtijibin te Pabloe. Jich la yac' ta iq'uel bael, swenta yu'un cuxul me ya xc'o ac'otuc ta sc'ab te ajwalil Felixe. 25Jich te coronele la spasbey bael scarta te ajwalil Felixe. Jich la yal: 26“Ajwalil Félix te ich'bilat ta muc' cu'untique, ya jpatbat awo'tan jo'on te Claudio Lisiasone. 27Yu'un ya calbat awaiy te bit'il la stsaquic in winic to te judioetique. C'an smilic, ja'uc me to, te jo'one te c'alal la caiy stojol te ja' romano te winique, jich ba jcoltay loq'uel ta sc'abic soc te soldadoetic cu'une. 28La jc'an caiy stojol te bila mulil staoj ta sc'opique. Jich la quic' bael jtejc'an ta stojol te Muc'ul Tsoblej yu'unique. 29Tey la caiy stojol te ja' smulinej yu'unic te bit'il ay ta ch'uunel te mandalil yu'unique, ja'uc me to, ma ja'uc te bila ya xju' ya yich' milel yu'un, ni yacuc stac' te ya yich' chuquel yu'une. 30Soc la caiy stojol te chapal sc'oplal yu'unic ta milel. Jich la jticunbatix tel ta atojol. Soc la calbeyix mandal te mach'atic sleojbeyic smul te ya xtal xchajbanic ta atojole. Ja' nax ya calbat abi”, xi' bael ta scarta. 31Te soldadoetique jich la spasic te bit'il yich'ojic mandale. La yiq'uic bael ta ajc'ubal te Pablo c'alal ta lum Antípatris. 32Te c'alal sacubix a te q'uinale, te soldadoetic te yacalic ta beel ta yacanique, sujt'ic bael ta Jerusalén ta scuartelic. Yan te soldadoetic te cajajtic ta caballoetique, la sjoinic xan bael te Pabloe. 33Jich c'otic ta lum Cesarea. C'o yac'beyic scarta te ajwalile soc la yac'beyic ta sc'ab uuc te Pabloe. 34C'alal la yil te carta te ajwalile, la sjojc'obey te Pablo te banti lumiluc taleme. C'alal la yaiy stojol te talem ta smaquen-q'uinal Cilicia, 35jich la yalbey: —Ja' to me ya jchajbanat teme tal te mach'atic la yalic te ay amule —xi' te ajwalile. Jich la yal mandal ta canantayel ta bay palacio yu'un te Herodese.


Copyright
Learn More

will be added

X\