Hechos 21

1Jich la quijq'uitaytic jilel te quermanotactique. Ochotic ta barco. Toj bootic ta sq'uinal Cos. Ta yan c'aal c'ootic ta sq'uinal Rodas. Jich c'ootic ta lum Pátara. 2Tey la jtatic yan barco te ya xbajt' ta sq'uinal Fenicia. Tey ochotic ta barco a, jich bootic. 3Te c'alal yacotic ta baele, c'axotic ta stojol Chipre. Ta xq'uexen jc'abtic jil. Toj bootic ta sq'uinal Siria. Noptsajotic bael ta lum Tiro, tey la quijq'uitaybetic yijc'ats a te barcoe. 4Tey la jtatic jnopojeletic a. Jich la jointic juqueb c'aal. Te jnopojeletique la yalbeyic te Pablo ta swenta te Espíritu te manchuc ya xbajt' ta Jerusalén. 5C'axix a te juqueb c'aale, jich bootic. Jich la sjoinotic bael spisil te jnopojeletique soc yinamic yal-snich'anic c'alal ta patlum. Ta bay te ti'mare, la jquejan jbatic ta sc'oponel Dios, 6soc la jpatbeytic jilel yo'tanic. Jich ochotic ta barco te jo'otique. In te jnopojeletique sujt'ic bael ta snaic stuquelic. 7Beenotic xan ta barco. La quijq'uitaytic te lum Tiroe. Bootic ta lum Tolemaida. C'o jpatbeytic yo'tanic te quermanotactic tey a. Jun c'aal la jointic. 8Ta yan c'aal loc'otic bael soc te Pabloe. C'ootic ta lum Cesarea. Tey ochotic ta sna te Felipe te yat'elinej yalel ta bayuc te lec yach'il c'ope, te ja' jtul ta sjuctulul te la yich'ic tsael ta Jerusalene. Tey ainotic a. 9Te Felipe ay chantul yantsil-nich'nab te ma ba nujbinemic te ya yaiyic j'alwanej yu'un te Diose. 10Ayix che'oxeb c'aal tey ayotic a te coj tel jtul j'alwanej yu'un Dios te Agabo sbiile, te tal ta sq'uinal Judea. 11Tal yilotic ta banti ayotique. La stsacbey xchujq'uil xch'ujt' te Pabloe, la xchuc ta sc'ab soc ta yacan. Jich la yal: —Jich la yal te Ch'ul Espiritue: “Te yajwal in chujq'uil ch'ujt'ul to, jich me ya xc'o yich' chuquel ta Jerusalén yu'un te judioetique, soc ya me yac'beyic ta sc'ab te jyanlumetique”, xi' te Ch'ul Espiritue —xi' te Agaboe. 12Te c'alal la caiytic stojol te jo'otique soc te quermanotactic ta Cesareae, jpisiltic la calbeytic wocol te Pablo te manchuc ya xmo bael ta Jerusalén. 13Ja'uc me to, la yal te Pabloe: —¿Bi yu'un ya x'oq'uex? ¿Bi yu'un ya awac'bonic jmel co'tan? Te jo'one, jun co'tan chican teme chuquel o milel ya xc'o quich' ta Jerusalén ta swenta te Cajwaltic Jesuse —xi'. 14Te bit'il ma ju' cu'untic scomele, jich ma ba c'opojotic xan. —Jichuc. Ac'a pasuc sc'anjel yo'tan te Cajwaltique —xootic yu'un. 15Jich ay che'oxeb c'aal te jalajotic tey a. Patil la jchajban jbatic te mootic bael ta Jerusalén. 16Ay la sjoinotic bael te jnopojeletic ta Cesarea, soc la yic'otic bael ta sna jtul quermanotic te Mnasón sbiil te xjajch'ibal to xch'uunej te Jesuse, te talem ta sq'uinal Chipre. Ja' la jmajanbeytic te snae. 17C'alal c'ootic ta lum Jerusalén, bin nax yo'tanic la yic'otic ta stojolic te quermanotactique. 18Ta yan c'aal, la jointic bael te Pablo te ba yil te Jacoboe. Tey stsoboj sbaic ta spisilic a te ancianoetique. 19Te Pabloe la spatbey yo'tanic, soc la xcholbey yaiyic ta cumulcum te bila spasoj Dios ta stojolic te jyanlumetique, soc te yat'el spasoje. 20Te c'alal la yaiyic stojole, la yalbeyic wocol Dios yu'un. Jich la yalbeyic te Pabloe: —Ilawil, quermano Pablo, ayix tsobol ta jmil te jlumaltic judioetic te xch'uunejiquix Jesús te bayal sc'oplal ta yo'tanic ta xch'uunel te mandalil yu'un te Moisese. 21Soc yaiyojic stojol te jich yacat ta sp'ijubtesel spisil te jlumaltic judioetic te ainemic ta banti yantic lumetique, te ja'at la awalbey te ma me xch'uunic te mandalil yu'un Moisés, soc te ya awalbey te ma me xyac'bey yich' circuncisión te yal-snich'anique, soc te ma yejt'aluc ya xch'uunic te costumbre cu'untique. 22¿Bila lec ya jpastic? Melel ya me yaiyic stojol te jlumaltic te julematixe. 23Ja' lec jich ya apas in to: Ay chantul winiquetic cu'untic te ay bi xchapojic ta stojol te Diose. 24Ic'a bael, joina ta utstesel ta stojol Dios, soc tojbeya te jayeb ya xlaj yu'unic te ya yac' ta joxel te sjolique. Jich me ya sna'ic stojol te ach'uunej te mandalile. 25Yan te mach'atic jyanlumetic te xch'uunejiquix te Cajwaltique, la calbeytiquix ta carta te bila jnopojtiquix te ma yejt'aluc ya xch'uunic te mandalile. Ja' nax ma me sti'ic ti'bal te yich'oj milel smajt'anin te loc'ombaetique, soc ma me stuuntesic te ch'ich'e, soc ma me sti'ic ti'bal ta bay ts'otbil nax snuc' te yich'oj milele, soc te ma me xyalic ta mulil —xiic. 26Jich te Pablo la sjoin sba soc te chantul winiquetique. Ta yan c'aal la sjoin ta utstesel ta stojol Dios. Jich och bael ta templo yu'un tey ya yalic a te jich yipal c'aal sc'an ts'acaj te yutsteselique, ja' bi, ja' te bi c'aalil ya sc'an ya xc'o yaq'uic juju-jtul te milbil smajt'an Diose. 27Ja'uc me to, te c'alal yaquix ta ts'acajel a te juqueb c'aale, ay judioetic te talemic ta smaquen-q'uinal Asia te la yilic ta yutil templo te Pabloe. Jich la stic'beyic c'op te lume, soc la sjumtayic ta tsaquel te Pabloe. 28Jich la yalic ta aw: —¡Jlumal israeletic, la' coltayawotic! Li' ay to te winic te beenemix ta bayuc ta yaq'uel ta nopel ta stojol spisil ants-winiquetic te ma'yuquix sc'oplal te jlumaltique, soc te mandalil yu'un te Moisese, soc te templo cu'untique. Soc ta ora to la yiq'uix ochel ta templo te jyanlum winiquetique. Jich bolobix a te ch'ul templo cu'untique —xiic ta aw. 29Jich la yalic, yu'un ay la yilic ach' to nax te Pabloe te sjoinej ta beel ta yolil lum jtul efesio-winic te Trófimo sbiile. Jich scuyojic te ja' la yic' ochel ta templo. 30Ora jajch'ic ta ch'inch'onel spisil te lume, soc animajic tel. Jich la stsaquic te Pabloe. La stasic loq'uel tel ta bay yamac'ul te temploe. Ora nax la yich' maquel te ti'nailetic yu'un te temploe. 31Te bit'il ya sc'an smiliquixe, c'ot aiyej ta stojol te coronel yu'un te soldadoetic te bit'il jajch'emix bayal c'op ta lum Jerusalén. 32Ora nax te coronel la stsob te soldadoetic soc te centurionetique. Animal c'otic tey a ta banti stsoboj sbaic te lume. Te c'alal la yilic tal te coronel soc te soldadoetique, jich la scom sbaic ta smajel te Pabloe. 33Te c'alal c'ot te coronele, la yac' ta tsaquel ta ora te Pabloe. La yal mandal ta chuquel ta cha'lijc' cadena, soc la sjojc'obey te mach'a a te winique soc te bila amen spasoje. 34Ja'uc me to, te lume ma pajaluc nax te bila la yalic ta awe. Te coronel ma ju' yu'un yaiyel stojol sc'opic scaj te xch'inch'onic nax ta c'op ta spisilique. Jich la yalbey mandal te soldadoetic te ya yiq'uic bael ta scuartelic te Pabloe. 35Te c'alal c'otic ta bay cajalcaj moel sbelal te scuartelique, te soldadoetic la sq'uechic moel te Pabloe, scaj te tenbilic yu'un spisil te lume, 36melel ts'acalic tel ta spatic spisil te lume. Yacalic ta aw ta spisilic: —¡Bajt'uc ta milel! —xiic ta aw. 37Te c'alal yacalic ta yochesel ta scuartelic te Pabloe, jich la sc'opon ta ora te coronele: —¿Ya bal xju' ya jc'oponat? —xi'. Te coronel jich la yal: —¿Ya bal ana' griego-c'op jiche? 38Ma ja'ucat jiche te egipto-winic te ayix ora te la sjajch'es bayal c'op, soc te la yic' bael ta jochol taquin q'uinal chanmil (4,000) te querrilleroetique —xi'. 39La yal te Pabloe: —Te jo'one judio-winicon. Ayinon ta lum Tarso, ja' jlumal te muc'ul lum te bayal sc'oplal te ay ta smaquen-q'uinal Cilicia. Ya calbat wocol te yacuc awac'bon permiso te ya jc'opon te lume —xi' te Pabloe. 40Te coronel la yac'bey permiso te ya xc'opoje. Jich tejc'aj te Pablo ta bay cajalcaj moele. La sjim sc'ab ta scomel ta c'op te lume. C'alal lamajic ta c'op, jajch' sc'opon ta hebreo-c'op. Jich caj yal:


Copyright
Learn More

will be added

X\