Hechos 20

1Te c'alal lamajix a te c'ope, te Pablo la sticun ta iq'uel te jnopojeletique. La stac'uy ta spisilic soc la spatbey jilel yo'tanic. Jich bajt' ta sq'uinal Macedonia. 2Xmelmon c'ax yil ta chajbalchajp te jnopojeletique. Bayal la stac'uy ta spisilic. Jich c'ot ta sq'uinal Grecia, 3ta banti jalaj oxeb u te Pabloe. C'an ochuc ta barco, yu'un ya xbajt' ta sq'uinal Siria, ja'uc me to, la yaiy stojol te chapal sc'oplal ta milel yu'un te judioetique. Jich la snop te ya sujt' bael ta yacane. Jich c'ax bael yan buelta ta sq'uinal Macedonia. 4Ja' la sjoin bael te Sópater te snich'an Pirro te talem ta Berea, soc Aristarco soc Segundo te talemic ta Tesalónica, soc Gayo te talem ta Derbe, soc Timoteo soc uuc te Tíquico soc Trófimo te talemic ta smaquen-q'uinal Asia. 5Ja' in quermanotactic to, jelawic bael stuquelic. Tey c'o smaliyotic ta lum Troas. 6Yan te jo'otique, la jmaliytic c'ax te q'uin te ya swe'ic waj te ma ba yich'oj levadurae. Jich jil cu'untic te lum Filipose. Ochotic ta barco. Ta yo'ebal c'aal, ta lum Troas la jta jbatic soc te mach'atic jelawic tele. Tey jalajotic juqueb c'aal a. 7Ta sbabial c'aalil yu'un te semanae, la jtsob jbatic soc te jnopojeletic ta swe'el waj ta swenta te Cajwaltique. Te Pablo jajch' sp'ijubtes te jnopojeletique. La sna' te ya xbajt' te pajele, jich jalaj ta c'op ja' to c'alal ta olil ajc'ubal. 8Ay bayal c'ajq'uetic yac ta tilel tey a ta yoxcajal na te banti jtsoboj jbatique. 9Ay jtul querem te Eutico sbiil te nacal ta ventana. Te bit'il jalaj ta yalel sc'op Dios te Pabloe, jich och swayel te quereme. Jc'axel ch'ay ta q'uinal yu'un te swayele. Jich ch'ay coel c'alal ta yoxcajal te nae. Lajemix a te la sjachic jajch'ele. 10Jich co bael ta yilel ta ora te Pabloe. La spajc'an sba ta sba te quereme soc la smey ta petel. Jich la yal: —Ma me xamel awo'tanic. Cuxulix —xi'. 11Jich te Pablo cha'sujt' moel ta yoxcajal na. La xejt' te waje, we' soc te jnopojeletique. Jalaj xan ta c'op te Pabloe ja' to c'alal sacub te q'uinale. Jich a bajt'. 12Jich te querem te ch'ay coele, cuxul la yiq'uic bael ta sna. Bayal muc'ub q'uinal la yaiyic yu'un. 13Te jo'otique jelawotic bael. Bootic ta barco c'alal ta lum Asón. Tey c'ax quic'tic a te Pabloe, yu'un la sc'an te been ta yacane. 14C'alal la jta jbatic soc ta lum Asón, la sjoinotic ochel ta barco. Jich talotic c'alal ta lum Mitilene. 15Ochotic ta barco tey a. C'axotic bael ta spat sq'uinal Quío ta xchebal c'aal. Ta yoxebal c'aal c'ootic ta lum Samos. Tey cootic ta barco ta bay Trogilio. Ta xchanebal c'aal c'ootic ta lum Mileto. 16La snop te Pablo te ma ba ya xjalajotic ta sq'uinal Asia, jich ma ba ochotic ta lum Efeso, yu'un la sc'an yo'tan te yacuc xc'ot ta Jerusalén ta ora nax te Pabloe, swenta yu'un tey me ayix a ta yorail te q'uin Pentecostés teme ya xju' yu'une. 17Te c'alal ayotiquix ta lum Mileto, te Pablo la sticun tel ta iq'uel te ancianoetic yu'un te jch'uunjeletic te ayic ta lum Efeso. 18Te c'alal juliquixe, te Pablo jich la yalbey yaiyic: —Ana'ojic stojol te bit'il ayon la awilic te jayeb c'aal ayon ta awolilic, ja' to c'alal ta xjajch'ibal te la joinex ta sq'uinal Asia. 19Spisil ora peq'uel la cac' jba te bit'il ayon ta abatinel yu'un te Cajwaltique. Bayal bi la coq'uetay jba yu'un, soc c'ax jwocol ta ilel co'tan yu'un te bila c'an spasbonic te judioetique. 20Xujt' ma la jcom jba ta yalel ta atojolic te bila ya xlecubex yu'une. La jp'ijubtesex ta comon ta bay atsoboj abaic soc uuc ta bay anaic juju-jtul. 21Jamal la calbey yaiy te judioetique soc te jyanlumetique, te ya sc'an ya sujt'es yo'tanic ta stojol Dios soc te ya yac' xch'uunjel yo'tanic ta stojol te Cajwaltic Jesucristoe. 22Ta ora to ya xboon ta Jerusalén, yu'un ya yic'on bael ya caiy te Espiritue. Ma jna' te bila ya xc'o pasbotucon tey a. 23Jna'oj stojol te ya yalbon jc'oplal te Ch'ul Espíritu ta bay spisil te lumlumtic te yacon ta beel te ya smaliyon chuquel soc woclajel. 24Ja'uc me to, ma ba ya jmel co'tan yu'un. Ma'yuc sc'oplal te bit'il ay te jcuxlejale. Ja' nax ay sc'oplal ta co'tan te bin nax co'tan ya jloq'ues te jayeb c'aal ay ta jwenta, ja' to c'alal te ya xc'ot coraile, soc te ya ju'tes cat'el te yac'ojbon ta jwenta spasel te Cajwaltic Jesuse, ja' bi ja' te la yac'bon ta jwenta yalel sc'oplal te jcoleltic ta swenta nax yutsil yo'tan cu'untic te Diose. 25“Ta ora to, jna'oj stojol te bit'il ma ba ya awilbonic xan jsit te ja'exe soc te banti beenon ta yalel te bit'il ay ta ajwalinel te Diose. 26Jich yu'un ya calbeyex ta jamal ta ora to, te ma jwentauquix teme ch'ayel ya xbaexe, 27melel spisil la calbeyex ta jamal te bila chapal yu'un te Diose. Ma'yuc bila la jmuc ta co'tan xujt'uc. 28Jich yu'un tsajtaya me abaic ja'ex, soc canantayaic ta stsojbol te chijetic ta banti yac'ojbeyex awat'elic ta scanantayel te Ch'ul Espiritue. Canantayaic te jch'uunjeletic yu'un te Cajwaltic te manbil ta xch'ich'el yu'une. 29Jna'oj stojol te ay ya xtal yantic te c'alal baemonix ae, te ya xtal yuts'inex jich bit'il ya yuts'in chijetic te jti'awal ja'mal ts'i'etique. 30Soc ta awolilic ay me ya xjajch' te mach'atic ya yaq'uic ta nopel lotil c'op te jich ya slo'layic a te jnopojeletic te q'uejel ya xbajt'ic soque. 31Wic'a me asitic jiche. Na'ulaya me spisil ora te oxeb ja'wil te c'aal ajc'ubal ma la jcom jba ta jtac'uybelex juju-jtulexe. Bayal oc'on yu'un te yacuc c'otuc ta awo'tanique. 32“Ta ora to, quermanotac, ya caq'uex jilel ta canantayel yu'un te Diose soc te sc'op Dios te ayotic ta c'uxtayel yu'une. Ja' ay yip yu'el te ya xmuc'ubex yu'un ta swenta te Diose, soc ya me yac'beyex spisil bendición te yaloj te ya yac'bey te mach'atic ch'ultesbilique. 33Ma'yuc mach'a la jbic'tal-o'tantaybey plata yu'un soc oro yu'un soc te sc'u'-spaq'ue. 34Te ja'exe ana'ojic stojol ta lec te at'ejon ta jc'ab ta sleel te bila tuun cu'un soc te jo'taque. 35Spisil ora la cac'beyex awilic te bit'il ya sc'an ya x'at'ejotic ta lec ta jpisiltique, swenta yu'un jich me ya jcoltaytic te mach'atic ay swocolic te ma'yuc bi ay yu'unique. Ac'a juluc ta awo'tanic te jich la yal te Cajwaltic Jesuse: “Ja' me bin nax yutsil te mach'a ay bila ya yaq'ue, ma ja'uc te mach'a ay bila ya yich'e”, te xie —xi' te Pabloe. 36Te c'alal laj yo'tan ta c'ope, la squejan sba ta sc'oponel Dios soc te ancianoetique. 37Bayal oq'uic ta spisilic. La smey sbaic soc te Pabloe, soc la sbujts'iy sbaic. 38Ja' c'axem to xan la smel yo'tanic yu'un te bit'il la yal te Pablo te ma ba ya yilbeyix xan sit ta yan buelta. Jich la sjoinic bael ta banti ay te barcoe.


Copyright
Learn More

will be added

X\