Hechos 2

1Te c'alal c'ot sc'aalelal te q'uin Pentecostés, spisilic te jnopojeletic jun nax yo'tan sbaic te banti stsoboj sbaique. 2Ajc' nax ay bila la yaiyic c'opoj tel ta ch'ulchan, jich bit'il tulan ic' te xpumumet nax ya xbeene. Chicnaj sc'op ta swolol na te banti najc'ajtique. 3Soc chicnaj la yilic tsobol ch'in c'ajq'uetic te jich yilel te bit'il cac'tique, la spuc sbaic ta stojolic ta juju-jtul. 4Ta spisilic noj ta yo'tanic te Ch'ul Espiritue. Jich jajch'ic ta c'op ta yantic c'opiletic chican bit'il ac'bot yalic yu'un te Espiritue. 5Ay judioetic te nainemic ta Jerusalén te jun yo'tanic xch'uunejic te Diose te talemic ta bay yantic nacionetic ta spamal balumilal. 6Te c'alal la yaiyic stojol te bila tulan c'opoje, la stsob sbaic spisilic. Ch'ay nax q'uinal la yaiyic yu'un, melel juju-jtul la yaiyic stojol ta sc'opic nix te bila albotique. 7Jchajp nax q'uinal la yaiyic yu'un soc bayal ayan yo'tanic. Jich la yalic: —¿Ma bal ja'uc galileoetic ta spisilic in to te yacalic ta c'ope? 8¿Bit'il ay a te ya caiytic stojol ta mero jc'optic ta cayinabtic te bila yacalic ta yalele? 9Melel ay talemotic ta sq'uinal Partia, Media, Elam soc ta sq'uinal Mesopotamia soc ta Judea, Capadocia, Ponto, soc ta smaquen-q'uinal Asia, 10soc ta Frigia, Panfilia, Egipto, soc ta smaquen-q'uinal Africa ta sjelawel lum Cirene. Soc ay talemotic ta lum Roma te li' nainemotic. Ay sts'umbalotic te judioetique soc jyanlumetic te yac'ojix sbaic ta judioile. 11Soc ay talemotic ta Creta soc Arabia. Ja'uc me to, jpisiltic yacalotic ta yaiyel stojol ta mero jc'optic nix te bila muc' spasojix te Diose —xiic. 12Jchajp nax q'uinal la yaiyic yu'un soc c'axem to xan ayan yo'tanic yu'un. Xtal xbajt' nax la sjojc'obey sbaic: —¿Bi swentailuc in to? —xiic. 13Ay yantic jajch'ic ta slabanel: —Yu'un yacubenic —xiic. 14Jich te Pedro tejc'aj jajch'el soc te buluchtul sjo'tac ta jpuc-c'opile. Tulan c'opoj ta yalel sc'oplal ta jamal: —Te ja'exe, judioetic, soc ta apisilic uuc ja'ex te nainemex ta Jerusalén, aiya me awaiyic stojol te bila ya calbeyexe. Ac'a c'otuc ta awo'tanic te bit'il ay in to. 15Melel ma ba yacalic ta yacubel in winiquetic to, jich te bit'il acuyojique, yu'un baluneb to nax ora te c'aale. 16Yan in to, ja'ix te bila la yalbey sc'oplal te j'alwanej Joel, te jich la yale: 17“Jich ya yal te Diose: Ta nopol slajibal c'aal ya me jmal te Espíritu cu'un ta stojol spisil ch'ich'-baq'uet. Te aquerem-nich'anic soc awantsil-nich'anic, ya me yalic te sc'op Diose. Te jch'ieletic awu'unique ay me bi ya x'ac'bot yilic ta stelemal, Soc te mamaletique, ay me bi ya swaichinic. 18C'alal ya sta yoraile, ya me jmal te Espíritu cu'un ta stojol te abatetic cu'une, chican teme ants o teme winique, ya me yalic te sc'op Dios ta jwenta. 19Ta stoyolil ch'ulchan ya me cac' ta ilel jchajp at'eliletic, soc ta balumilal ya me cac' ta ilel señailetic, ay me ch'ich' soc c'ajc' soc bayal te ch'aile. 20Te c'aale ya me xc'atp'uj ta ijc' q'uinal; in te ue ya me xtsajub jichuc ch'ich'. Jich me ya xc'ot ta pasel te c'alal ma to sta sc'aalelal a te xtal te Cajwaltique, muc' me sc'oplal te bila ya xchicnaje, soc ay me bayal yutsilal. 21Spisil mach'atic ya sc'anic coltayel ta stojol te Cajwaltique, ya me xcolic”, te xie. 22“Te ja'exe, jlumal israeletic, aiya me awaiyic stojol te bila ya calbeyexe. Te Jesús te Nazarete, chican la awilic te lec sc'oplal yu'un te Diose, melel ja' ta swenta te la spas jchajp at'eliletic soc señailetic ta awolilic te Diose, jich bit'il te ana'ojic stojol ta mero melele. 23Ja'uc me to, ta xjajch'ibal to tel ay ta yo'tan Dios te bit'il jich snopoj stuquele, la yac'beyex ta ac'abic te Jesús te la awac'beyic smilic ta cruz te mach'atic ma sna'beyic sba te Diose. 24Ja'uc me to, Dios la xcha'cuxes tel te la scoltay loq'uel ta bay xc'uxul te lajele, melel te lajele, ma xju' te jc'axel ya yu'unine. 25Te muc' ajwalil David jich la yalbey sc'oplal uuc: “La quil ta jsit spisil ora te Cajwaltic te ay ta jtojole, teq'uel ta swa'el jc'ab swenta yu'un ma'yuc bi ya xju' ya yac' nijc'uc co'tan yu'un. 26Ja' swentail te bayal sbujts' co'tan soc te ay bayal yutsil jc'op caiyej ta quee. Jich me ay smuc'ul co'tan te ya yich' lewa te jbaq'uetale, 27melel ma ba ya apijt'esbon jilel jch'ulel ta bay te muquenale, soc ma xawac' c'a'uc jbaq'uetal tey a te Ach'ul-nich'anone. 28Melel la awac'bon quil te sbelal cuxinele. Bayal ya xbujts'naj co'tan yu'un te bit'il ajoinejone”, te xie. 29“Quermanotac, ya calbeyex ta jamal te laj te namey q'uinal jtatic Davide, soc la yich' muquel te sbaq'uetale, soc chican to ta coliltic ta ora to te smuquenale. 30Te Davide, j'alwanej yu'un te Diose. Jich sna'oj te bila yaloj Dios ta stojol te ja' ta swenta sts'umbal ya yich' chicnantesel yu'un Dios te Cristoe, te ja' sjelol ta smuc'ul nactijib ya xc'ote. 31Te Davide yac ta yilel ta sit c'oem te bila ya spas ta patil te Diose. Jich la yalbey sc'oplal te bit'il ya xcha'cux tel te Cristoe. Soc la yal te ma xpijt'esbot jilel xch'ulel ta bay stsobjibal te animaetique, soc te bit'il ma x'ac'ot ta c'a'el te sbaq'uetale. 32Ja' bi ja' te Jesuse, te cha'cuxesot tel yu'un te Diose. In te jo'otique, jpisiltic testigootic yu'un te jich c'ot ta pasele. 33Ic'ot moel c'alal ta swa'el sc'ab te Diose, soc ac'bot ta swenta te Ch'ul Espíritu yu'un te State. Jich la smalix ta jtojoltic te bit'il albil sc'oplale. Ja' meix te yacalex ta yilele soc te yacalex ta yaiyel stojole. 34Melel te Davide ma ja'uc te mo bael ta stoyolil ch'ulchane, melel ja' nix David te jich la yale: “Te Cajwaltic Diose jich la yalbey te Cajwale: ‘Naclan ta bay swa'el jc'ab 35ja' to teme la cac'bat apech' ta teq'uel te acontroe’, xi'”, te xie. 36“Jich yu'un te ja'exe soc spisil te jlumaltic israeletique, na'aic me stojol ta melel ta apisilic te ja' ya calbeyex sc'oplal te Jesuse. Te ja'exe, la amilic ta cruz. Yan te Diose, la yaq'uix ta ilel te ja' Cajwaltic soc ja' te Cristoe —xi' te Pedroe. 37Te c'alal la yaiyic stojol in to, bayal la smel yo'tanic yu'un, soc la yalbeyic te Pedroe soc te yantic jpuc-c'opetique: —Quermanotac, ¿bi ya sc'an ya jpastic te jo'otique? —xiic. 38La yal te Pedroe: —Sujt'esa awo'tanic ta stojol Dios, soc ac'a abaic ta ich'ja' juju-jtulex ta swenta sbiil te Jesucristoe. Jich me ya spasbeyex perdón yu'un te amulique, soc jich me ya yac'beyex te Ch'ul Espiritue. 39Melel ja' awu'unic te albil sc'oplale, soc uuc te awal-anich'anique, soc ta spisil te mach'atic c'ubul ayique, chican te jayeb mach'a ya x'ic'ot yu'un te Cajwaltic Diose —xi'. 40Te Pedro la to yalbey xan yaiyic ta lec te sc'op Diose, soc la stac'uy. Jich la yalbey yaiyic: —Ac'a abaic ta coltayel. Ma me xbaex ta ch'ayel soc te mach'atic cuxulic ta q'uinal ta ora to te amen yo'tanique —xi'. 41Jich yu'un te mach'atic jich yipal la xch'uunic te sc'op Diose, ac'bot yich'ic ja' ta spisilic. Ay niwan oxmil (3,000) te esmajic ta jun nax c'aal te jch'uunjeletique. 42La yat'elinic snopel te bila la yaq'uic ta nopel te jpuc-c'opetique, jun nax yo'tan la yaiy sbaic ta spisilic. Soc la stsobilay sbaic ta swe'el waj soc ta sc'oponel Dios. 43Jchajp nax q'uinal la yaiyic yu'un te ants-winiquetic, ta scaj te bayal jchajp at'eliletic soc señailetic te chicnaj ta swentaic te jpuc-c'opetique. 44Yan te mach'atic xch'uunejic te Jesuse, jun nax yo'tan la yaiy sbaic; soc spisil te bila ay yu'unic juju-jtule, comon tuun yu'unic. 45Jich ay la xchon sq'uinalic soc ay la xchon sbiluquic, jich la spucbey sbaic spisilic te stojole, chican te bit'il ya xtuun yu'unic juju-jtule. 46Jujun c'aal jun nax yo'tan la stsob sbaic ta templo, soc la sjoin sbaic ta swe'el waj ta bay te snaique. Bayal sbujts' yo'tanic ta we'el, soc jun yo'tan sbaic. 47Spisil ora la sc'ajintaybeyic yutsilal te Diose, soc lec sc'oplalic yu'un spisil te lume. Te Cajwaltique yan yan ta esmajel yu'un jujun c'aal te jch'uunjeletique, chican jich yipal te ya staic scolelique.


Copyright
Learn More

will be added

X\