Hechos 17

1Te Pablo soc te Silase c'axic bael ta lum Anfípolis soc ta lum Apolonia. Jich c'otic ta lum Tesalónica ta banti ay sinagoga yu'un te judioetique. 2Te Pablo bajt' ta sinagoga ta sc'aalelal cux-o'tan, jich bit'il te c'aem ta spasele. Jich la spasulay oxeb semana ta sc'aalelal te cux-o'tane. Tey la yaan soc a te bila ts'ibubil ta Sjun te Diose. 3Jamal la xcholbey yaiyic te bit'il puersa c'ax swocol te Cristoe, soc te bit'il laje, soc te bit'il cha'cux tele. Soc jich la yalbey yaiyic: —Te Jesús te ya calbeyex sc'oplale, ja'ix te Cristoe —xi' ta yalel. 4Ay judioetic te c'ot ta yo'tanic te bila la yal te Pabloe. Jich la sjoinic te Pablo soc te Silase. Soc c'ot ta yo'tanic tsobol te griegoetic te yich'ojic ta muc' te Diose soc tsobol uuc te jc'ulej-antsetic te ich'bilic ta muq'ue. 5Yan te judioetique jajch' slab yo'tanic yu'un. Jich la yiq'uic tel ch'ajil winiquetic te jo'wil nax xtec'lajanic ta calle te amen yo'tanique, la yac' stsob sbaic tel ta yawtayel te lume. Jich jajch' bayal c'op ta bay spamal te lume. Jich la yochintaybeyic sna te Jasone ta sleel te Pablo soc te Silase, yu'un ya yiq'uic loq'uel yaq'uic ta sc'ab te ants-winiquetique. 6Ja'uc me to, ma la staic tey a. Jich la stasic bael ta nitel te Jasón soc cha'oxtul te quermanotactique. Ba stec'anic ta stojol te mach'atic yich'oj yat'elic ta bay te lume. Jich la yalic ta aw: —Te mach'atic yacalic ta xjajch'esel c'op ta spamal balumilal, li' ayiquix ta coliltic. 7Te Jasone ja' la snajc'anix ta sna. Spisilic ya scontroinbeyic smandal te muc' ajwalil Cesare, yu'un ya yalic te ay yan muc' ajwalil ta sc'opic te Jesús sbiile —xiic ta aw. 8Te c'alal la yaiyic stojol te c'ope, bayal jajch'ic ta c'op yu'un te ants-winiquetique soc te mach'atic yich'oj yat'elique. 9Jich la sc'anbeyic jilel smulta te Jasón, swenta scomjibalic soc te quermanotactique, soc la scoltayic bael. 10Ta ora nax ta ajc'ubal te quermanotactic la sticunic bael c'alal ta lum Berea te Pablo te Silase. Te c'alal c'otic tey a, bajt'ic ta bay sinagoga yu'un te judioetique. 11Te judioetic te ayic ta bay lum Berea, ay razon ta yo'tanic stuquelic. Ma jichuc yo'tanic te bit'il yo'tanic te mach'atic ayic ta bay te lum Tesalonicae. Toyol yo'tanic la yaiyic stojol te bila albot yaiyic yu'un te Pabloe. Jujun c'aal la sle yilic ta Sjun Dios teme melel te bila yacalic ta yaiyel stojole. 12Jich col spisiluc la xch'uunic soc tsobol la xch'uunic uuc te jc'ulej griega-antsetic te ich'bilic ta muq'ue soc uuc te winiquetic yu'unique. 13Ja'uc me to, te judioetic ta lum Tesalónica la yaiyic stojol te yac ta yalel sc'op Dios ta lum Berea te Pabloe. Jich talic ta Berea ta xjajch'esel c'op tey a. 14Te quermanotactique la sticunic bael ta ora c'alal ta ti'mar te Pabloe. Yan te Silas soc te Timoteoe jilic to ta lum Berea stuquelic. 15Te mach'atic la yiq'uic bael te Pabloe ba yijq'uitayic jilel c'alal ta lum Atenas. C'alal sujt'ic bael te mach'atic xtaluc yijq'uitayique, yich'ojic bael mandal te ya me xtalic ta ora nax te Silas te Timoteo ta sjoinel te Pabloe. 16Te bit'il yac ta maliywanej ta bay lum Atenas te Pablo te ya xtal te Silas soc te Timoteoe, bayal la smel yo'tan tey a, yu'un la yil te bayuc nax ay ta spamal lum Atenas te loc'ombaetic xch'uunejique. 17Jich ba yaanic soc te judioetic te lec yach'il c'op ta bay te sinagoga yu'unique soc te yantic te yich'ojic ta muc' te Diose. Jujun c'aal la yaanic soc, chican mach'a te la sta sba soc tey a ta bay yolil lum. 18Ay filósofoetic yu'un te epicúreoetique soc te estoicoetique, jajch'ic ta tsaltomba-c'op soc te Pablo. Jich la yalic: —¿Bi ya sc'an ya yalic me chulti' to? —xiic. Soc ay yantic la yalic: —Jchol-c'op yu'un yach'il diosetic yilel —xiic yu'un. Jich la yalic yu'un te bit'il ya xcholbey sc'oplal te lec yach'il c'op yu'un te Jesús soc te bit'il ay te cha'cuxele. 19Jich la yiq'uic bael ta stojol tsoblej te Areópago sbiile. Jich la yalbeyic: —¿Ya bal xju' ya caiytic stojol te yach'il p'ijubtesel awich'oj tele? 20Yu'un jchajp nax ya caiytic a te bi ya awalbotique. Jich yu'un ya me awalbotic xan caiytic te bi swentailuque —xiic. 21Melel ta spisil te atenasetique soc te mach'atic tey ayic a te q'uejel talemique, ja' nax ya smulan yo'tanic yaiyel stojol soc yaanel biluc nax ach' c'opiluc te ya yich' alel yaiyique. 22Jich te Pablo ba stejc'an sba ta yolil te Areópagoe. Jich la yal: —Ja'ex winiquetic, atenasetic, ya quil te toyol awo'tanic ta xch'uunel te diosetique. 23Melel te c'alal c'axon tel ta yilel te ch'uunjibaletic awu'unique, la jta jun scajtijib majt'anil te banti jich ts'ibubile: “Ja' yu'un te Dios te ma na'biluc sbae”, te xi' te ts'ibubile. Jich yu'un te Dios te awich'ojic ta muc' te ma x'ana'beyic sbae, ja'ix te mach'a ya calbeyex sc'oplale. 24“Te Dios te la spas te balumilale soc spisil te bitic ay tey ae, ja' yajwal stuquel te ch'ulchan soc te balumilale. Ma snain temploetic te pasbil ta c'abal yu'un te ants-winiquetique, 25soc ma smajanbey sc'ab winiquetic, melel ma'yuc bi ya xtuun yu'un stuquel. Ja' stuquel yac'ojbey xcuxlejal ta spisil ants-winiquetic, soc te yac'ojbey yich'ic iq'ue, soc ja' yac'ojbey spisil te bila ya xtuun yu'unique. 26“Ta swenta jtul nax winic, Dios la xchicnantes spisil ta jchajp ants-winiquetic, swenta yu'un ya x'ainic ta spamal te balumilale. Xjajch'ibal to chajbanbil yu'un Dios te yorailic ta cumulcum soc ta banti ay te smojonil sq'uinalique. 27Jich la spas, swenta yu'un jich me ya staic ta leel te Diose. Ya xju' ta leel soc ta tsaquel, melel ma ba najt' ay ta jtojoltic juju-jtulotic te Diose. 28Ja' ta swenta te bit'il cuxulotique, soc te bit'il ya jtij jbatique, soc te bit'il ayotic ta q'uinale, jich bit'il yaloj cha'oxtul te jpas-junetic awu'unique: “Jpisiltic yal-snich'anotic te Diose”, te xiique. 29Jich yu'un teme yal-snich'anotic te Diose, ma me jcuytic ta Dios te bila loc'taybil te pasbil ta oro o ta plata o ton te la spas te ants-winiquetique, chican te bi yilel la sc'an te la snop ta yo'tanique. 30Te Diose, ma'yuc bila la yal yu'un te jich yipal c'aal ayiquix tel te ants-winiquetic te bit'il ma la sna'ic stojole. Yan ta ora to, ya spasix ta mandal spisil ants-winiquetic ta bayuc te ya sujt'es yo'tanique. 31Te Diose, chapalix yu'un jun c'aal te ya yich' ta c'op spisil ants-winiquetic ta balumilal, ta swenta te jtul Winic te tsabil yu'une, ja' chican te bi yilel te yat'elique. Spisilic ya me yac' xch'uunjel yo'tanic ta stojol te Mach'a cha'cux tel ta bay animaetique —xi' te Pabloe. 32Te c'alal la yaiyic stojol te ya xcha'cuxic te animaetique, ay cajic ta labanwanej yu'un. Soc yantic la yalic: —Yan to buelta ya caiytic xan stojol te bila ya awale —xiic. 33Jich te Pablo loc' bael ta yolil te tsobleje. 34Ja'uc me to, ay la sts'aclinic bael te Pablo soc la xch'uunic te bi la yaiyiquix stojole, jich bit'il te Dionisio te yich'oj yat'el yu'un te Areópago, soc ay jtul ants Dámaris sbiil, soc xan yantic.


Copyright
Learn More

will be added

X\