Hechos 16

1Jich te Pablo soc te Silas c'otic ta lum Derbe soc lum Listra te banti la staic jtul jnopojel te Timoteo sbiil te yal jtul judia-ants te xch'uunej te Jesuse. Yan te state griego-winic stuquel. 2Te Timoteo lec sc'oplal yu'un spisil te quermanotactic te ayic ta lum Listra soc lum Iconio. 3Te Pablo la sc'an yo'tan te ya yic' sjoine. Jich yu'un la yac'bey yich' circuncisión ta scaj te judioetic te ayic tey a, melel sna'ojic ta spisilic te griego-winic te state. 4Ta bay juju-jpam lum te c'axique, la yalbey yaiyic te quermanotactic te bila mandal la xchapic te jpuc-c'opetic soc te ancianoetic te ayic ta lum Jerusalene. 5Jich te jch'uunjeletic ta bayuc la yich' yip te xch'uunjel yo'tanique, soc jujun c'aal esmaj te yajt'alulique. 6Beenic c'axel ta sq'uinal Frigia soc ta Galacia, melel comot yu'un te Ch'ul Espíritu te ya yalic sc'op Dios tey a ta bay smaquen-q'uinal te Asiae. 7C'alal c'otic ta sq'uinal Misia, c'an ochuc ta sq'uinal Bitinia, ja'uc me to, ma ba ac'botic permiso yu'un te Espíritu yu'un te Jesuse. 8C'axic bael ta sq'uinal Misia, jich coic bael ta lum Troas. 9Te Pabloe tey ac'bot yil ta ajc'ubal ta stelemal yilel jtul Macedonia-winic te teq'uel ta yalel wocol ta stojole. Jich albot yu'un: —C'axan bael ta Macedonia. Ya me acoltayotic —utot yu'un. 10Te c'alal jich la yil ta stelemal yilel, jich la jchajban jbatic ta ora te ya xbootic ta sq'uinal Macedonia. Melel c'ot ta co'tantic te ja' ya sticunotic bael tey a te Diose, swenta yu'un ya me xba calbeytic yaiyic te lec yach'il c'ope. 11Jich ochotic ta barco tey a ta lum Troas. Toj bootic ta barco c'alal ta sq'uinal Samotracia te joytaybil ta mare. Ta xchebal c'aal c'ootic loq'uel ta lum Neápolis. 12Tey jajch'otic ta beel a. C'ootic ta lum Filipos te ja' sbabial lum te muc' sc'oplal ta smaquen-q'uinal Macedonia te ja' colonia yu'un te romanoetique. Tey jalajotic jun chebuc c'aal a. 13Ta sc'aalelal cux-o'tan loc'otic bael ta patlum ta bay ti'ja' te banti c'aemic te ya stsob sbaic ta sc'oponel te Diose. Tey la jnajc'an jbatic a, soc la calbeytic yaiyic te lec yach'il c'op te antsetic te stsoboj sbaique. 14Ja'uc me to, ay jtul ants te tey ay a, Lidia te sbiile, te talem ta lum Tiatira. Ja' yat'elinej xchonel te t'ujbil tsaj'aman pac' te bayal stojole. In ants to, ja' yich'oj ta muc' te Diose, jich jambot yo'tan yu'un te Cajwaltique. La yaiy stojol te bila la yal te Pabloe. 15Jich ac'bot yich' ja' soc spisil te mach'a ay yu'un ta snae. Soc jich la yalbotic wocol: —Teme ana'ojiquix stojol te jun co'tan jch'uunejix te Cajwaltique, la' me talan, ainanic ta jna —xi'. Ma ba laj yo'tan. Puersa la yic'otic bael te ba ainucotic ta snae. 16Ta yan buelta te c'alal yacotic ta bael te banti ya jtsob jbatic ta sc'oponel te Diose, la staotic jtul ach'ix te ay pucuj ta yo'tan te ya sna' yalel te bila ya xc'ot ta pasele. Ay cha'oxtul yajwal te la spasic bayal ganar yu'un te bila ya sna' yalele. 17Te ach'ixe jajch' sts'aclinotic soc te Pablo. Jich yac ta yalel ta aw: —Ja' in winiquetic to, ja' abatetic yu'un Dios te toyol ay ta ch'ulchane. Ja' ya yalbeyex awaiyic te sbelal te colele —xi' ta aw. 18Bayal c'aal te jich la spas te ach'ixe. Te Pablo ma la smulan te bila yac ta spasele. Jich la sujt'es sba sc'opon te pucuj te ay ta yo'tane: —Ya calbat mandal ta swenta sbiil te Jesucristoe: Loc'an tel ta yo'tan te ach'ixe —la yut. Jich loc' ta ora nax te pucuje. 19Te yajwalic te ach'ixe, la yilic te ma xju'ix yu'un te ya spasic ganar ta swentae. Jich la stsaquic te Pablo soc te Silase, soc la yiq'uic bael ta yolil lum ta stojol te mach'atic yich'oj tulan yat'elic yu'un te lume. 20La stec'anic ta stojol te jchajbanwanejetic, soc jich la yalbeyic: —In winiquetic to judioetic te ya sjajch'esic c'op li'to ta bay jlumaltic. 21Ya yaq'uic ta nopel yantic costumbreetic te ma stac' ya jnoptic soc ma stac' ya jch'uuntic spasel, melel romanootic —xiic. 22Jich te lume jajch' scontroinic uuc. Te jchajbanwanejetique sc'ajc'al nax la xch'i'beyic loq'uel sc'u' te Pablo te Silase, soc la yalic mandal ta majel ta bara-te'. 23Bayal ta jyalel majel ac'botic, ta patil ochesotic ta chucjibal. Te jcanan-chuquele pasot ta mandal te ya me scanantay ta leque. 24Te bit'il la yich'ix mandale, jich la yac' ochel c'alal ta slajibal yutil te chucjibale, soc la xojbeyic yacan ta bay jutlabil ch'ujte'. 25Ja'uc me to, ta olil ajc'ubal te Pablo soc te Silase yacalic ta sc'oponel te Diose soc ta sc'ajintayel, soc yacalic ta yaiyel stojol te yantic jchuqueletique. 26Ta ora nax a tal tulan nijq'uel te la syuc'bey yiptajib te chucjibale. Ora nax jam spisil te ti'nailetique soc col loq'uel te cadenaetic chuculic spisilic a te jchuqueletique. 27Wijc' sit yu'un te jcanan-chuquele. La yil jamalix te ti'nailetique. Jich la stas loq'uel spuñal, c'an smil sba ta ora a, yu'un la scuy te anemiquix bael spisil te jchuqueletique. 28Ja'uc me to, te Pablo jich la yal: —Ma me xamil aba. Jpisiltic li' ayotic to —xi' ta yawtayel. 29Jich te jcanan-chuquele la sc'an tel c'ajc' yil. Animal och bael. Yac ta nijq'uel te c'o stinan sba coel ta yacan te Pablo soc te Silase. 30Soc la yic' loq'uel ta chucjibal. Jich la yalbey: —Tatiquetic, ¿bi ya sc'an ya jpas te ya xju' ya xcolone? —xi'. 31Te Pablo te Silas jich la yalbeyic: —Ch'uuna te Cajwaltic Jesucristoe. Jich me ya xcolat ja'at soc spisil te mach'a ay awu'un ta anae —xiic. 32Soc la yalbey yaiyic te sc'op te Cajwaltique soc spisil te mach'a ay yu'un ta snae. 33Te jcanan-chuquele ja' nix yorail ta ajc'ubal a te la yic' bael, la spocbey yejch'enic te Pablo te Silase. Soc ac'bot yich' ja' ta ora soc spisil te mach'a ay yu'un ta snae. 34La yic' bael ta sna ta smac'linel. Bin nax yo'tan yu'un soc spisil te mach'a ay yu'un ta sna te bit'il xch'uunejiquix te Diose. 35Te c'alal sacubix te q'uinale, te jchajbanwanejetique la sticunic tel policiaetic ta stojol te jcanan-chuquele. Yich'ojic bael mandal te ya scoltayic bael te Pablo soc te Silase. 36Jich te jcanan-chuquele la yalbey te Pabloe: —Quich'ojix mandal yu'un te jchajbanwanejetic te ya jcoltayex baele. Jun awo'tanic, baanic —xi'. 37Ja'uc me to, te Pablo la yalbey te policiaetique: —¿Ma bal ta comonsitiluc la yac'botic castigo ta majel te ma neeluc la yich'botic jc'optic ta chajbanel, soc la xchucotic? Ja'uc me to, yajwalotic te Romae. Jich yu'un ¿muquen bal ya sloq'uesotic ta ora to? ¡Ma spas! Ac'a taluc sloq'uesotic bael stuquelic —xi' te Pabloe. 38Jich te policiaetique ba yalbey yaiyic te jchajbanwanejetique. Bayal xiw yo'tanic yu'un te la yaiyic stojol te ja' romano te Pablo soc te Silase. 39Jich tal sc'anic perdón ta stojolic, soc la yiq'uic loq'uel ta chucjibal, soc la yalbeyic wocol te yacuc yijq'uitayic jilel te lume. 40Te c'alal colic loq'uel ta chucjibale, bajt'ic ta sna Lidia. Te c'alal la yilic te quermanotactique, la yac'bey xan yip yo'tanic jilel. Ta patil bajt'ic.


Copyright
Learn More

will be added

X\