Hechos 15

1Ay mach'atic talic ta sq'uinal Judea, tal yac'beyic snop te quermanotactic: —Teme ma xyich'ic circuncisión jich bit'il la yal mandal te Moisese, ma xju' ya xcolex —xiic. 2Jich jajch' bayal c'op yu'un. In te Pablo soc te Bernabee tulan la yut sbaic soc. Jich la yich'ic tsael ta xchebalic soc xan yantic quermanotactic te ya xbajt'ic ta xchapel ta stojol te jpuc-c'opetic soc te ancianoetic te ayic ta lum Jerusalén. 3Jich la yich'ic ticunel bael yu'un te jch'uunjeletic ta lum Antioquía. C'axic bael ta sq'uinal Fenicia soc ta sq'uinal Samaria. C'ax yalbeyic te quermanotactic te bit'il ay tsobol jyanlumetic te la xch'uuniquix te Diose. Spisil te quermanotactique bin nax yo'tanic yu'un. 4Te c'alal c'otic ta Jerusalén te Pablo soc te Bernabee, spisil te jch'uunjeletic soc te jpuc-c'opetic soc te ancianoetique bin nax yo'tanic la yiq'uic ta stojolic. Jich jajch' yalbey yaiyic spisil te bila spasoj Dios ta swentaique. 5Ja'uc me to, ay fariseoetic te xch'uunejiquix te Jesuse, la stejc'an sbaic. Jich la yalic: —Puersa me ya cac'beytic yich'ic circuncisión te jyanlumetique, soc puersa ya calbeytic mandal te ya yat'elinic xch'uunel te mandalil yu'un te Moisese —xiic. 6Jich la stsob sbaic te jpuc-c'opetic soc te ancianoetic ta snopel in aiyej to. 7Te c'alal jalajiquix ta yaanele, la stejc'an sba jajch'el te Pedroe. Jich la yal: —Quermanotac, te ja'exe ana'ojic stojol te Dios la stsaon ta awolilic swenta yu'un ya me jpuc te lec yach'il c'op yu'un te colele, swenta yu'un jich me ya xch'uunic te jyanlumetique. 8Te Diose, te sna'oj stuquel te o'tanile, ja' testigo yu'un te bit'il la yac'bey yiq'uic ta yo'tanic uuc te Ch'ul Espíritu, jich bit'il te jo'otique. 9Pajal quileltic la yilotic soc te jyanlumetique, jich Dios la yutstesbey yo'tanic ta swenta te xch'uunjel yo'tanique. 10Jich yu'un ¿bistuc te ya awilbeyic yo'tan te Diose, te ya awac'bey yijc'ats te jch'uunjeletic ta xch'uunel te bila ma ju' cu'untic xch'uunel soc uuc te jme'-jtatique? 11Ma jichuc ya sc'an. Ja' jch'uunejtic te bit'il ta swenta nax yutsil yo'tan cu'untic te Cajwaltic Jesús te colemotique, jich te bit'il la yich'iquix coltayel uuc te jyanlumetique —xi' te Pedroe. 12Jich ch'abic ta c'op ta spisilic te mach'atic stsoboj sbaique, soc la yaiybeyic stojol sc'op te Bernabé soc te Pabloe te la yalic te bit'il Dios la spas señailetic soc jchajp at'eliletic ta swentaic ta stojol te jyanlumetique. 13Te c'alal lajix yo'tanic ta c'ope, jajch' ta c'op uuc te Jacobo, jich la yal: —Quermanotac, aiybon awaiyic stojol te bila ya calbeyexe. 14Te Simone la yalix caiytic te bit'il jajch' ta at'el Dios ta stojol te jyanlumetique, swenta yu'un ya stsa te mach'a lum ya xc'ot yu'un uuc. 15Jich nix ay sc'oplalic ta sjun uuc te j'alwanejetic yu'un te Diose, jich te bit'il ts'ibubile: 16“La yal te Cajwaltique: ‘Ta patil ya xcha'talon xan soc ya me jcha'pas xan te sna David te jinem coele. Ya me jchajban xan ta yach'il te bit'il jineme, soc ya jcha'tejc'an moel, 17swenta yu'un ya me xtal sleic Cajwaltic te mach'atic jilemic xane soc spisil te jyanlumetic te ya yalbonic te jbiile’, xi'. 18Jich la yal te Cajwaltique, te yac'ojix ta na'el stojol spisil in to ta namey q'uinal”, te xie. 19“Ja' swentail te jich ya cal: Ma xcac'beytic swocolic te jyanlumetic te ya xch'uunic te Diose. 20Ja' nax ac'a jts'ibubeytic sjunic te ya calbeytic te ma me swe'elinic te we'elil te ma lecuc sc'oplal te ac'bil ta jmajt'anil ta stojol te loc'ombaetique, soc te ma me xyalic ta mulil, soc te ma sti'beyic sti'balul ta bay ts'otbil nax snuc' te yich'oj milele, soc te ma stuuntesic te ch'ich'e. 21Melel ta namey to tel, ay mach'a ya xchol ta stojolic ta bay juju-jsejp lumetic te mandalil yu'un te Moisese, soc ya yich' ilel ta bay sinagogaetic ta jujun sc'aalelal te cux-o'tane —xi' te Jacoboe. 22Jich te jpuc-c'opetic soc te ancianoetic soc spisil te jch'uunjeletic la snopic te ya stsaic ta yolilic te mach'atic ya sticunic bael ta lum Antioquía soc te Pablo te Bernabee. Ja' la stsaic te Judas te Barsabás yan sbiile soc te Silas te ich'bilic ta muc' yu'un te quermanotactic ta Jerusalene. 23Jich ac'bot yich'ic bael te carta te jich ts'ibubile: “Quermanotac, jo'otic te jpuc-c'opotic soc te ancianoetic soc te quermanotactic, ya spatbeyex awo'tanic, ja'ex te jyanlumex te ayex ta Antioquía ta sq'uinal Siria, soc te ayex ta sq'uinal Cilicia. 24La caiytiquix stojol te ay cha'oxtul jajch'emic bael li'to te ma ticunbiluc cu'untic te la yac'beyex amel awo'tanic yu'un te bila la yalbeyex awaiyique, soc la yac' ayanuc awo'tanic te bit'il la yalbeyex te puersa ya awich'ic circuncisión soc te ya ach'uunic te mandalil yu'un te Moisese. 25Jich yu'un la jpastic acuerdo te ya jtsatic quermanotactic ta coliltic te ya xtal yilexe soc ja' pajal ya xtal soc te quermanotic Bernabé soc Pablo te bayal c'ux ta co'tantique, 26ja'ic te winiquetic te yac'oj sbaic ta lajel soc xcuxlejalic ta swenta sbiil te Cajwaltic Jesucristoe. 27Jich yu'un la jticuntiquix tel te Judase soc te Silase. Ja' me ya yalbeyex awaiyic spisil in aiyej to. 28Melel ja' lec la yaiy te Ch'ul Espíritu soc jich co'tantic uuc te ma'yuc yan ijc'atsil te ya cac'beyex awich'ique, ja' nax ta bay tulan sc'oplal. 29Ja' in to: Ma me x'ati'ic ti'bal te yich'oj milel smajt'anin te loc'ombaetique, soc ma me x'ati'beyic sti'balul te bay ts'otbil nax snuc' yich'oj milele, soc ma me xatuuntesic te ch'ich'e, soc ma me xyalex ta mulil. Teme ya ach'uunic in mandal to, lec me ayex abi. Ja' nax abi, quermanotac”, xi' te scartaique. 30Jich la yich'ic ticunel bael te winiquetique. C'alal c'otic ta lum Antioquía, la stsobic spisil te jch'uunjeletique soc la yac'beyic ta sc'abic te cartae. 31Te c'alal la yich' ilel yu'unic te cartae, bayal bujts'naj yo'tanic yu'un te bila albotic tey a. 32Te bit'il j'alwanejetic yu'un Dios te Judas soc te Silase, jalajic ta smuc'tesbeyel yo'tanic soc bayal la yac'beyic yip yo'tanic. 33Jalajic bayal c'aal tey a. Ta patil ac'otic sujt'el yu'un spisil te jch'uunjeletique. Lamal nax yo'tanic la spatbeyic bael yo'tanic te c'alal sujt'ic bael ta stojol te mach'atic ticunbilic tel yu'une. [ 34Ja'uc me to, te Silase la snop te ya to xjil ta Antioquía.] 35Ja' nanix jich te Pablo soc te Bernabee tey jilic uuc a. La sjoin sbaic soc tsobol xan yantic ta p'ijubteswanej soc ta spuquel te lec yach'il c'ope. 36Jun cheb c'aal ta patil te Pablo jich la yalbey te Bernabé: —Ja' lec ya xba quiltic xan te quermanotactic ta lumlumtic ta bay la caltic te sc'op Cajwaltique —xi'. 37Te Bernabé ja' la sc'an ya yic' bael sjoinic te Juan te Marcos yan sbiile. 38Yan te Pabloe la yal te ma spas ya yic' bael sjoin te mach'a ijq'uitayotic jilel yu'un ta bay sq'uinal Panfilia te ma la sc'an sjoin bael ta spasel soc te at'ele. 39Tulan la yut sbaic yu'un, jich la sjat sbaic. Te Bernabé la yic' bael sjoin te Marcose. Ochic ta barco, bajt'ic ta sq'uinal Chipre. 40Yan te Pablo ja' la stsa te ya sjoin bael te Silase. Jich te quermanotactique la sc'anbeyic bendición te ya me sjoinic bael te Cajwaltique. Jich a bajt'ic. 41C'axic bael ta sq'uinal Siria soc ta sq'uinal Cilicia. C'ax yac'bey yip yo'tanic ta tsojboltsojp te jch'uunjeletique.


Copyright
Learn More

will be added

X\