Hechos 14

1Te c'alal ayiquix ta lum Iconio te Pablo soc te Bernabé, ochic ta bay te sinagoga yu'un te judioetique. Ay yip te sc'opique. Jich tsobol judioetic soc tsobol griegoetic la xch'uunic. 2Yan te jayeb judioetic te ma la sc'an xch'uunique, la sjachbey slab yo'tanic te jyanlumetique. Jich ju' yu'unic te la scontroinic te cheb quermanotactique. 3Ja'uc me to, ay bayal c'aal jalajic tey a. Ay yip yo'tanic yu'un te Cajwaltique, jich ju' yu'unic yalel te bit'il ayotic ta c'uxtayel ta jpisiltic yu'un te Cajwaltique. Ja' la yac' ta ilel te bit'il melel te bila la yalic ta swenta bit'il la yac'bey yu'elic ta spasel te jchajp at'eliletique soc te señailetique. 4Ja'uc me to, te yajwal te lume la sjat sbaic yu'un. Ay mach'atic jun yo'tan sbaic soc te judioetique soc ay mach'atic jun yo'tan sbaic soc te jpuc-c'opetique. 5Te jyanlumetique la spaj sc'opic soc te judioetic soc te jtuuneletic yu'unique, te ya yuts'inic soc te ya smilic ta ch'ojel ta tone. 6Te Pablo soc te Bernabee la sna'ic stojol te bila snopojique. Jich bajt'ic ta anel ta lum Listra soc ta Derbe te ayic ta bay te sq'uinal Licaonia. Tey ainic a soc ta bay sjoylejal te q'uinale. 7Tey la xcholic a te lec yach'il c'ope. 8Ay jtul winic tey a ta bay lum Listra te ma'yuc yip te yacane, yu'un coxo ta yayinab to te ma'yuc banti beenem xujt'uc. 9Tey nacal ta yaiyel stojol te bila la yal te Pabloe. Te Pablo la yilbey sit, la yil te bit'il ay xch'uunjel yo'tan te ya xcole. 10Jich tulan la sc'opon: —Jajch'an. Toj xtec'lat soc te awacane —la yut. Te winique wil jajch'el ta ora. Jajch' ta beel. 11Te bit'il la yilic te ants-winiquetic te bila la spas te Pablo, jajch'ic ta aw ta licaonia-c'op: —Coemic tel ta jtojoltic diosetic te scajt'anej sbaic ta winiquetique —xiic ta aw. 12Jajch' yalic te ja' Júpiter te Bernabé soc ja' Mercurio te Pabloe scaj te ja' yac ta c'op stuquele. 13Jich te sacerdote yu'un te Júpiter, te ay templo yu'un ta ti'lume, la yic' tel toroetic te ch'albilic ta nichime. Te sacerdotee soc te ants-winiquetique c'an smilbeyic smajt'anin Bernabé te toroetic te bit'il scuyojic ta Jupitere. 14Te c'alal la yaiyic stojol te Bernabé soc te Pabloe, la xch'i' sc'u'ic yu'un soc la sten sbaic ochel ta bay yolil te ants-winiquetique. Jich la yalbey yaiyic ta aw: 15—Winiquetic, ¿bistuc te jich ya apasique? Melel te jo'otique winicotic uuc jich te bit'ilexe. Ja' tal calbeyex te ya awijq'uitayic ta pasel te bila xujt' ma'yuc stuule soc te ya asujt'es awo'tanic ta stojol te cuxul Dios te ja' la spas te ch'ulchane te balumilale te mare soc spisil te bitic ay tey a. 16Ta namey tel Dios la yac'bey spasic te jyanlumetic te bila la sc'an yo'tanique. 17Ja'uc me to, ma yu'unuc ma la yac' ta na'el te bit'il ay stuquel te Diose, melel lec te bi ya spase. Ya yac' taluc ja'al ta ch'ulchan soc ya yac' sitinuc te cawal-jts'unubtique. Jich ya xnoj te jch'ujt'ique soc ya xbujts'naj co'tantic ta lec yu'un —xiic ta aw. 18Jich wocol ju' yu'unic scomel te ants-winiquetique, melel ja' ay ta yo'tanic te ya smilbeyic smajt'ane. 19Ay c'otic judioetic te talic ta Antioquía soc ta Iconio. Tal stic'beyic c'op te ants-winiquetique. Jich la xch'ojic ta ton te Pabloe soc la stasic loq'uel c'alal ta ti'lum, yu'un la scuyic te jc'axel lajemixe. 20Ja'uc me to, te jnopojeletic tal sjoytayic ta tec'lej te Pabloe. La stejc'an sba jajch'el, soc och bael ta lum yan buelta. Ta xchebal c'aal la yijq'uitay jilel te lum Listrae, bajt' ta lum Derbe soc te Bernabé. 21Te Pablo soc te Bernabé la yalic te lec yach'il c'op ta bay te lum Derbe. Tsobol ta jtul ants-winiquetic te la xch'uunic te Jesuse. Patil sujt'ic bael ta lum Listra, soc ta lum Iconio, soc ta bay te lum Antioquía. 22Te banti c'axique, la yac'bey yip yo'tanic te jnopojeletique, soc la yalbey yaiyic te jc'axel ac'a yac' xch'uunjel yo'tanic. Soc la yalbeyic te puersa me ya xc'ax jwocoltic ta jpisiltic te ya x'ochotic ta banti ay ta ajwalinel te Diose. 23Soc la sleic jilel te mach'atic la yac'beyic yat'el ta ancianoil ta bay juju-jtsojp jch'uunjeletique, soc la spasic ayuno ta sc'oponel Dios. Jich te Pablo soc te Bernabé la yaq'uic jilel ta sc'ab te Cajwaltic te xch'uunejiquixe. 24Jich c'axic bael ta sq'uinal Pisidia, soc talic ta sq'uinal Panfilia. 25Tey la yalic te lec yach'il c'op ta bay te lum Perge. Patil coic bael ta lum Atalia. 26Tey ochic ta barco a, soc bajt'ic ta lum Antioquía te banti c'anbotic bendición te ya me sjoinic bael te Diose, te xc'otuc spasic te at'el te ju'ix ta pasel yu'unique. 27Te c'alal c'otic ta Antioquía, la yiq'uic tel spisil te jch'uunjeletique. La yalbey yaiyic spisil te bila spasoj Dios ta swentaique soc te bit'il jamal be yu'un te ya yac' xch'uunjel yo'tanic uuc te jyanlumetique. 28Te Pablo soc te Bernabé bayal c'aal la sjoinic tey a te jnopojeletique.


Copyright
Learn More

will be added

X\