Hechos 13

1Te jch'uunjeletic ta lum Antioquia ay j'alwanejetic yu'un Dios soc maestroetic yu'un te sc'op Diose: ja' te Bernabé, soc Simón te Negro yan sbiile, soc Lucio te talem ta lum Cirene, soc Manaén te pajal la yich' ch'ijtesel soc te Herodes te ajwalil yu'un te Galileae, soc te Sauloe. 2Jun c'aal, c'alal la stsob sbaic ta yalel wocol ta stojol te Cajwaltique soc spasojic ayuno a, jich albotic yu'un te Ch'ul Espiritue: —Ac'bonic ta jwenta te Bernabé soc te Saulo te tsabiliquix cu'un ta spasel te at'ele —utotic yu'un. 3Jich la spasic ayuno ta sc'oponel te Diose. La scajanbey sc'abic ta sjolic soc la sticunic bael. 4Jich te Bernabé soc te Sauloe la yich'ic ticunel bael yu'un te Ch'ul Espiritue. Jich coic bael ta lum Seleucia. Tey ochic ta barco a, bajt'ic ta sq'uinal Chipre. 5Te c'alal c'otic ta lum Salamina, jajch' yalic tey a te sc'op Dios ta bay te sinagogaetic yu'un te judioetique. Te Juane yic'ojic ta abatinel. 6La yoclinic spisil te sq'uinal Chipre te joytaybil ta mare. Jich c'otic ta lum Pafos te banti la staic jtul mago te Barjesús sbiile. Judio-winic stuquel soc lotil j'alwanej. 7Ja' sjoinej sba soc te ajwalil Sergio Paulo sbiil te p'ij yo'tane. Te Sergio Paulo la sticun ta iq'uel te Bernabé soc te Sauloe, yu'un la sc'an yaiy stojol te sc'op Diose. 8Ja'uc me to, te mago, te Elimas yan sbiile, la scontroin te Bernabé soc te Sauloe. La xchebalc'optay te ajwalil te manchuc ya xch'uune. 9Jich te Saulo te Pablo yan sbiile, noj ta yo'tan te Ch'ul Espiritue. La stojlinbey ta ilel sit te Elimase. 10Jich la yalbey: —Te ja'ate lo'laywanejat, nojel ta awo'tan spisil te bila amen ta pasele. Ja' snich'anat te pucuje, acontroinej spisil te bila lec ta pasele. ¿Jc'axel bal ma x'acom aba ta smacbel sbe te Cajwaltique? 11Ta ora to ya me yac'bat castigo te Cajwaltique. Ma'sit ya xc'oat soc bayal c'aal ma ba ya awilbey xojobil te c'aale —la yut. Ta ora nax ijc'al ajc'ubal bajt' te q'uinal la yile. Caj sle te mach'a ya xnitot ta sc'ab yu'une. 12Te c'alal la yil te ajwalil te bila c'ot ta pasele, jich la xch'uun te Cajwaltique. Bayal la yaan yo'tan te bit'il ay te nopjibal yu'un te Cajwaltique. 13Te Pablo soc te sjo'taque, ochic ta barco ta lum Pafos. Jich bajt'ic ta lum Perge te ay ta sq'uinal Panfilia. Tey ijq'uitayotic jilel yu'un a te Juane. Sujt' bael ta Jerusalén stuquel. 14Yan te Pabloe soc te Bernabé, la yijq'uitayic jilel te lum Perge, bajt'ic ta lum Antioquía te ay ta sq'uinal Pisidia. Ta sc'aalelal te cux-o'tane, och snajc'an sbaic ta sinagoga. 15Te c'alal la yich'ix ilel sjunal te mandalile soc te sjun te j'alwanejetic yu'un te Diose, te mach'atic yich'oj yat'elic ta sinagoga la sticunic ta alel ta stojol te Pablo soc Bernabé: —Quermanotac, teme ay bi ya ac'an ya awalic ta stojol te lume, ya me xju' ya xc'opojex —xiic. 16Jich tejc'aj jajch'el te Pabloe. La yac'bey yil seña ta sc'ab te ya slaman sba te mach'atic stsoboj sbaique, jajch' sc'opon: —Israel-winiquetic soc ja'ex te awich'ojic ta muc' te Diose, aiya awaiyic stojol: 17Te Dios cu'untic, te jo'otic te lum israelotique, la stsa te antiguo jme'-jtatique. Muc'ul lum c'ot yu'un, manchuc me jyanlumetic ainic ta sq'uinal Egipto. Soc la sloq'ues tey a ta swenta yu'el te Diose. 18Ay niwan cha'winic (40) ja'wil te la sts'icbey te amen yat'elic ta bay te muc'ul jochol taquin q'uinale. 19Soc la sjin te jucchajp nacionetic te ayic ta sq'uinal Canaán, yu'un la yac'bey ta swentaic te q'uinale. 20Jich ay niwan bajc' soc lajuneb yoxwinic (450) ja'wil te la swentain ta swenta juecetic, ja' to c'alal Samuel te j'alwanej yu'une. 21Jich ora la sc'anic te ayuc muc' ajwalil yu'unic. Jich ac'botic yu'un Dios te ja' muc' ajwalil c'ot yu'unic cha'winic (40) ja'wil te Saúl te snich'an Cis te sts'umbal Benjamine. 22Ja'uc me to, Dios la sloq'ues ta muc' ajwalil te Saule, ja' la sjelolin ta muc' ajwalil te Davide, te jich la yalbey sc'oplale: “La jta te David te snich'an Isaí, ja' te winic te bin nax co'tan yu'une. Ja' me ya spas spisil te bila ya sc'an co'tane”, te xie. 23Ja' nix Jesús te sts'umbal David te Dios la yaq'uix ta Jcoltaywanej yu'un te israeletique, jich te bit'il la yal ta namey te ya spase. 24Te c'alal ma to xtal a te Jesuse, te Juan la yalbey yaiy spisil israeletic te sc'oplal ich'ja'e, swenta yu'un ya sujt'es yo'tanic ta stojol Dios. 25Te c'alal nopol ya xju'ix yu'un yat'el te Juane, jich la yal: “¿Mach'aon ta ac'opic a? Ma jo'ocon te mach'a ya awalique. Ja'uc me to, ay me mach'a ya xtal ta jpat te jichon ta stojol ya caiy te bit'il ma'yuc jtuul ta jyalele. Ni yacuc xju' ya jtilbey sc'ab te xanabe”, te xie. 26“Quermanotac, te yal-snich'anex te Abrahame soc ja'ex ta apisilic te awich'ojic ta muc' te Diose, julix ta alel ta atojolic te bit'il ay sc'oplal te colele. 27Melel te mach'atic ayic ta lum Jerusalén soc te jwolwanejetic yu'unique, ma la sna'ic teme ja' Jcoltaywanej cu'untic te Jesuse, soc ma ba c'oem ta yo'tanic te bila yalojic te j'alwanejetic yu'un te Diose, te ya yich' alel ta sinagogaetic ta jujun sc'aalelal te cux-o'tane. Jich c'ot ta pasel ta swentaic te la yaq'uic ta lajel te Jesuse. 28Jich la sc'anbeyic te Pilato te ya yal mandal te ya yich' milel, manchuc teme ma'yuc smul la stabeyic te ya xju' ya x'ac'ot ta lajel yu'un. 29Te c'alal la sc'otesiquix ta pasel spisil te bila ts'ibubil jilel sc'oplal ta Sjun te Diose, la scojt'esic ta cruz te sbaq'uetale soc la smuquic. 30Ja'uc me to, Dios la xcha'cuxes tel ta bay te animaetique. 31Te Jesús bayal c'aal la yac'ulay sba ta ilel ta stojol te mach'atic la sjoinic loq'uel tel ta sq'uinal Galilea te c'alal bajt'ic ta Jerusalene. Ta ora to, ja'ic testigoetic yu'un te ya yalbeyic sc'oplal ta stojol te lume. 32“Jich te jo'otique, ja' ya calbeyex awaiyic te lec yach'il c'ope, melel c'otix ta pasel yu'un Dios te bila la yalbey te antiguo jme'-jtatique. 33Melel Dios la yac' c'otuquix ta pasel ta jtojoltic, jo'otic te patil alnich'anotique, te c'alal la xcha'cuxes tel ta bay animaetic te Jesuse, jich bit'il ts'ibubil jilel ta bay salmo número dos: “Te ja'at jnich'anat. Nax to nax ayinat cu'un”, te xie. 34Soc la yal te Diose te ya xcha'cux tel ta bay animaetic swenta yu'un ma'yuc bi ora ya xc'a' te sbaq'uetale, jich te bit'il la yale: “Ya cac'beyex spisil te bendicionetic te calojbey te Davide”, te xie. 35Ja' swentail te jich la yal xan ta banti yan salmoe: “Ma xawac' ta c'a'el jbaq'uetal jo'on te Ach'ul-nich'anone”, te xie. 36Melel te David la yac' sba ta abatinel ta stojol te mach'atic pajal c'ax ta q'uinal soque, jich nix te bit'il ay sc'anjel yo'tan ta neelal to te Diose. Patil way sbaq'uetal. Bajt' ta muquenal ta bay mucul te sme'-state. Tey c'a' sbaq'uetal a. 37Yan te sbaq'uetal te mach'a cha'cuxesot yu'un te Diose, ma ba c'a' stuquel. 38Jich yu'un, quermanotac, na'aic me stojol te yaquix ta alel ta atojolic te ayix perdón yu'un jmultic ta swenta te Jesuse. 39Melel ta swenta Jesús te libre ya xc'ootic yu'un jmultic teme la jch'uuntique. Yan te mandalil yu'un te Moisese, ma xyac'otic ta libre yu'un jmultic stuquel. 40Tsajtaya me abaic jiche, ma me ja'uc ya xc'ot ta pasel ta atojolic te bila la yal jilel te j'alwanejetic yu'un te Diose, te jich la yalique: 41“Aiya awaiyic stojol ja'ex te jp'ajawalexe, xiwanic me soc ch'ayanic ta q'uinal, melel te jo'on ya jpas jchajp at'elil ta atojolic te ma xach'uunique. Ma ba ya xc'ot ta awo'tanic manchuc teme ay mach'a ya xcholbeyex awaiyic sc'oplale”, te xie —xi' ta yalel te Pabloe. 42Te c'alal loq'uic bael ta sinagoga yu'un te judioetique te Pablo soc te sjo'taque, te jyanlumetique la yalbeyic wocol te Pablo soc te Bernabé te yacuc x'albot xan yaiyic yu'un ta yan sc'aalelal te cux-o'tane. 43Te c'alal loq'uemiquix bael ta sinagoga, ay tsobol judioetic soc tsobol jyanlumetic te yac'oj sbaiquix ta judioile, la sts'aclinic bael te Pablo soc te Bernabé. Jich la yalbey yaiyic te jc'axel ac'a xch'uunic te bit'il ay yutsil yo'tan te Diose. 44Ta yan waxaqueb c'aal ta sc'aalelal cux-o'tan, col spisiluc lum la stsob sbaic ta yaiyel stojol te sc'op Diose. 45Te judioetique la yilic te ay bayal mach'atic la stsob sbaique, jich jajch' slab-o'tantayic. Jajch' yalic te ma meleluc te bi ya yal te Pabloe, soc la scontroc'optayic soc la stoybac'optayic. 46Jich te Pabloe soc te Bernabé, jajch' yalbey yaiyic ta jamal: —Te ja'ex te judioex atuquelique, puersa neel albotex awaiyic te sc'op Diose, ja'uc me to, la ap'ajiquix soc ma x'ac'anic te ya awich'ic acuxlejalic sbajt'el q'uinale. Jich yu'un ta ora to, tey me ya xbootic ta stojol te jyanlumetique. 47Melel jich la spasotic ta mandal te Cajwaltique: “Jich la cac'atix ta ilel te bit'il xojobil c'ajc' ta stojol te jyanlumetique, ja'at me ta awenta te ya yich'ic coltayel spisil ants-winiquetic ta bayuc ta spamal balumilal”, te xie —xi' te Pabloe. 48Te c'alal la yaiyic stojol in to te jyanlumetique, bin nax yo'tanic yu'un soc jajch' yalic te bin nax yutsil sc'op te Cajwaltique. Spisil la xch'uunic te mach'a jayeb tsabilic yu'un te ya xcuxinic sbajt'el q'uinale. 49Jich pujc' ta spamal sq'uinalic te sc'op Cajwaltique. 50Ja'uc me to, te judioetic la sjachbey slab yo'tanic te jc'ulej-antsetic te ich'bilic ta muc' soc te yich'ojic ta muc' te Diose, soc uuc te winiquetic te ich'bilic ta muc' yu'un te lume. Jich jajch'ic ta uts'inel te Pablo soc te Bernabé, soc la yich'ic tenel loq'uel ta bay sti'il te sq'uinalique. 51Jich te Pablo soc te Bernabé la scusic jilel stanul yacanic swenta seña te ay ta swentaic stuquelic te ma xch'uunique. Jich bajt'ic ta lum Iconio. 52Yan te jnopojeletique, bayal sbujts' yo'tanic yu'un te xch'uunejiquixe soc nojel ta yo'tanic te Ch'ul Espiritue.


Copyright
Learn More

will be added

X\