Hechos 12

1Jich ora te muc' ajwalil Herodes jajch' yuts'in cha'oxtul te jch'uunjeletique. 2La yac' ta milel ta puñal te Jacobo te sbanquil te Juane. 3C'alal la yil te bin nax yo'tan yu'un te judioetique, la stsac bael ta chuquel uuc te Pedroe. Ja' c'ot ta pasel ta yorail q'uin te ya swe'ic waj te ma'yuc levadura yich'oje. 4Te Herodes la stsac te Pedroe soc la yac' ochel ta chucjibal. La yac' ta canantayel yu'un chantijc' soldadoetic, chantulic te juju-jtijq'ue. Tijq'uiltijc' la sjel sbaic ta scanantayel. Yu'un snopoj te Herodes te ya stejc'an ta comonsitil ta stojol te lume te c'alal lajix a te q'uin Pascuae. 5Jich te Pedro la yich' canantayel ta chucjibal. Spisil te jch'uunjeletic c'axem to xan la sc'oponbeyic Dios ta stojol. 6Te Herodes pajel xanix te ya yic' loq'uel ta chucjibal a te Pedroe, swenta yu'un ya stejc'an ta comonsitil ta stojol te lume. Ja'uc me to, ta ajc'ubal wayal ta chucjibal te Pedroe, lapal ta olilal yu'un cheb soldadoetic, soc chucul ta cha'lijc' cadena. Te yan soldadoetique scanantayejic te ti'chucjibale. 7Ja'uc me to, ora nax chicnaj jtul ch'ul abat yu'un te Cajwaltique. Xojobaj nax a bajt' te yutil chucjibale. Te ch'ul abate la scujbey smoch te Pedroe soc la yalbey: —Jajch'an ta ora —la yut. Jich pol loq'uel te cadenaetic te chucajtic sc'ab a. 8Te ch'ul abat la yalbey: —Chuca te ach'ujt'e soc lapa te axanabe —xi'. Te Pedro jich la spas, soc albot xan yu'un te ch'ul abate: —Lapa tel te anajt'il c'u'e, soc ts'aclinawon —la yut. 9Jich te Pedro la sts'aclin loq'uel te ch'ul abate. Ma la sna' teme melel te bila yac ta spasel te ch'ul abate. La scuy ta swaich nax. 10Ja'uc me to, c'axic bael ta bay te sbabial jcanan-ti'nail soc ta bay xcha'cumul, soc c'otic ta bay muc'ul ti'nail te pasbil ta taq'uin te ja'ix te ti'calle yu'un te lume. Stuquel jam te muc'ul ti'naile. Jich loq'uic bael. Te c'alal beeniquix jun calle a, te ch'ul abate la yijq'uitay jilel stuquel te Pedroe. 11Te c'alal la sna' te Pedroe, jich la yal: —Ta ora to la jna'ix stojol ta melel, te Cajwaltic la sticun tel ch'ul abat yu'un te la scoltayonix ta sc'ab te Herodese soc te bila snopoj te ya spasbonic te jlumal judioetique —xi'. 12Te bit'il la sna'ix te bila c'ot ta pasele, bajt' ta bay sna María te sme' te Juan te Marcos yan sbiile, ta banti stsoboj sbaic bayal ta jtul te jch'uunjeletic ta sc'oponel te Diose. 13Te c'alal c'o stij te ti'nail yu'un te yamac'ul nae, loc' yaiy stojol jtul ach'ix te ay ta abatil te Rode sbiile. 14Te c'alal la yaiy stojol te ja' sc'op te Pedroe, bin nax yo'tan yu'un, ja'uc me to, ma la sjam te ti'naile. Animal och bael ta yutil na ta yalel yaiy te yantique te ja' teq'uel ta ti'nail te Pedroe. 15La yalbeyic te ach'ixe: —Soquem ajol —la yutic. Ja'uc me to, la yac' puersa ta yalel te bit'il melele. Soc la yal ta spisilic: —Ma ja'uc. Ja'ix te ch'ul abat canantaybil yu'une —xiic. 16Ja'uc me to, te Pedro ma la scom sba ta stijel te ti'naile. Jich la sjamic soc la yilic te ja' nixe, soc yan nax q'uinal la yaiyic yu'un. 17Te Pedro la sjim sc'ab ta scomel te ya slaman sbaique. Jich la xcholbey yaiyic te bit'il la yich' loq'uesel ta chucjibal yu'un te Cajwaltique. Jich la yalbey yaiyic: —Albeya yaiyic te Jacoboe soc te quermanotactique —xi'. Jich loc' bael soc q'uejel bajt' stuquel. 18Te c'alal sacub te q'uinale, te soldadoetique bayal jajch'ic ta xiwel yu'un, soc ma sna'ic te bi ya yalic yu'un te bit'il ma chicanuc te Pedroe. 19Te Herodes la sticun ta leel, ja'uc me to, ma la staic. Jich la yich'bey sc'opic te soldadoetic te la scanantayique soc la yac' ta milel. Jich co bael ta sq'uinal Judea te Herodese. Ba ainuc ta lum Cesarea. 20Te muc' ajwalil Herodese ilinem yo'tan yu'un te lum Tiro soc te lum Sidone. Jich te lume tal xchap sc'opic soc te Herodese. Ja' neel la sc'anbeyic te Blasto te swentainejbey sna te muc' ajwalil, te yacuc xcoltayotic ta c'op yu'une. La yalbeyic wocol te muc' ajwalil te yacuc xjunaj yo'tan sbaique, melel ta bay smaquen-q'uinal te ajwalile tey ya sta swe'elic ta spisilic a te slumalique. 21Jich la stsa jun c'aal te Herodese, la slap sc'u' swenta muc' ajwalil soc la snajc'an sba ta bay te chajbajibal yu'une. Jajch' ta c'op ta stojolic. 22Jich ora jajch'ic ta aw te lume: —¡Dios te yac ta c'ope, ma winicuc! —xi' sc'oplal yu'unic ta awtayel. 23Ta ora nax tal jtul ch'ul abat yu'un te Cajwaltique, la yejch'entes te Herodese, scaj te ma ja'uc la yac' ta ich'el ta muc' te Diose. Jich laj ta ti'el yu'un yalja. Jc'axel laj yu'un. 24Pujc' te sc'op te Cajwaltique, soc bayal esmaj te jnopojeletique. 25C'alal ju' ta pasel yu'unic te yat'elic ta Jerusalén, te Bernabé soc te Sauloe sujt'ic bael ta Antioquía, soc la yic' bael sjoinic te Juan te Marcos yan sbiile.


Copyright
Learn More

will be added

X\