Hechos 11

1Te jpuc-c'opetic soc te jch'uunjeletic te ayic ta sq'uinal Judea, la yaiyic stojol te xch'uunejiquix uuc te Sc'op Dios te jyanlumetique. 2Te c'alal sujt' tel ta Jerusalén te Pedroe, la yich' tijel ta c'op yu'un te mach'atic ay bayal sc'oplal ta yo'tanic te circuncisione. 3Jich la yalbeyic: —¿Bistuc ochat ta sna te mach'a ma ba yich'oj circuncisione, soc bistuc la ajoin ta we'el? —la yutic. 4Jich te Pedro xmelmon jajch' xcholbey yaiyic te bila c'ot ta pasele, jich la yal: 5—Te c'alal ayon ta lum Jope, yacon ta sc'oponel Dios a, te ay bila ac'boton quil ta stelemal yilele. Ja' la quil te bila pajal yilel soc muc'ul sábana-pac' te chucbil ta xchanebal xchiquin te yac ta coel tel ta ch'ulchane. Jul ta jtojol. 6Te c'alal la quil ta jsite, tey la quil a spisil ta jchajp chambalametic, soc chanetic soc mutetic. 7Soc la caiy stojol te ay mach'a jich la yalbone: “Pedro, jajch'an, mila ati'”, la yuton. 8Ja'uc me to, la calbey: “Ju'u, Cajwal. Ma'yuc banti ochem ta que te bila ma lecuc sc'oplale soc te bila ilaybile”, la cut. 9Jich la sc'oponon xan ta xchebal buelta te mach'a c'opoj tel ta ch'ulchan la caiye. Jich la yalbon: “Te bila lecubenix yu'un te Diose, ma me xawal te ja'ate te ma lecuc sc'oplale”, xi' la caiy. 10Oxeb buelta te jich la spasbone. Patil ic'ot moel spisil ta ch'ulchan. 11Jich ora c'ot oxtul winiquetic tey a ta banti na ayone, ticunotic tel c'alal ta lum Cesarea ta slebelonic. 12Te Espíritu la yalbon te ya xboon soque soc te ma x'ayan co'tan yu'une. Soc la sjoinonic bael uuc in wactul quermanotactic to. Jpisiltic ochotic tey a ta bay sna te winique. 13Soc la xcholbotic caiytic te bit'il la yil ta sna jtul ch'ul abat yu'un Dios te teq'uel ta stojole te jich albot yu'une: “Ticuna bael winiquetic ta lum Jope te ya yic' tel te Simone te Pedro yan sbiile. 14Ja' me ya yalbat awaiy te bit'il ya xju' xcolate soc spisil te mach'a ay awu'un ta anae”, utot yu'un. 15Te c'alal jajch'on ta c'op ta stojolique, jul ta swentaic te Ch'ul Espiritue, jich nix te bit'il jul ta jwentatic ta xjajch'ibal te jo'otique. 16Tey la jna' a te bila la yal te Cajwaltic te c'alal jich la yale: “Te Juane la yac' ich'ja' ta swenta nax ja'. Yan te ja'exe, ya me x'ac'botex awiq'uic te Ch'ul Espiritue” te xie. 17Jich yu'un teme ja' nanix Dios la yac'bey uuc te Ch'ul Espiritue, jich te bit'il la yac'botiquix jo'otic te jch'uunejtic te Cajwaltic Jesucristoe, ¿mach'aon me a te ya jcom ta at'el te Diose? —xi' te Pedroe. 18Te c'alal la yaiyic stojol spisil in to te mach'atic la stijic ta c'op te Pedroe, ch'abic ta c'op yu'un soc la yalbeyic jelawen yutsil sc'oplal te Diose. Jich la yalic: —¡Dios la yac'beyix sujt'es yo'tanic yu'un smulic te jyanlumetique, swenta yu'un jich me ya xcuxinic sbajt'el q'uinal uuc! —xiic yu'un. 19Te mach'atic pujq'uic bael ta scaj te uts'inel te jajch' ta stojolic te c'alal laj ta milel te Estebane, ay bajt'ic ta sq'uinal Fenicia soc ta sq'uinal Chipre soc ta lum Antioquía. Ma'yuc yan mach'a la yalbeyic te lec yach'il c'ope, ja' nax la yalbey yaiyic te mach'a judioetique. 20Ja'uc me to, ay jch'uunjeletic te talemic ta sq'uinal Chipre soc ta lum Cirene, te c'otic ta lum Antioquía, jajch' yalbey yaiyic te lec yach'il c'op yu'un Cajwaltic Jesús te mach'atic griegoetique. 21At'ej soc yu'el ta stojolic te Cajwaltique, jich tsobol la xch'uunic soc la sujt'es yo'tanic ta stojol te Cajwaltique. 22Te c'alal la yaiyic stojol te jch'uunjeletic ta Jerusalene, la sticunic bael ta Antioquía te Bernabee. 23Te c'alal c'ot tey a, la yilbey yutsilal te Diose. Bin nax yo'tan yu'un, soc la stac'uy te ayuc me swentail ta yo'tanic soc te jc'axel ac'a junajuc yo'tanic ta stojol te Cajwaltique. 24Melel te Bernabé lec nax yo'tan soc nojel ta yo'tan te Ch'ul Espiritue soc ay bayal xch'uunjel yo'tan ta stojol te Cajwaltique. Jich ay tsobol mach'a la xch'uunic Cajwaltic ta swenta. 25Te Bernabé bajt' ta lum Tarso ta sleel te Sauloe. 26Te c'alal la stae, la yic' tel ta lum Antioquía. Sjunal ja'wil la sjoinic te jch'uunjeletic soc la sp'ijubtesic tsobol ta jtul. Ja' nix te Antioquía ta banti neel ac'bot sbiilinic “cristianoetic” te jnopojeletique. 27Ja' yorail te ay j'alwanejetic yu'un Dios te coic tel ta Jerusalén te c'otic ta Antioquía. 28Ay jtul la stejc'an sba jajch'el te Agabo sbiile, la yal ta swenta te Espíritu te ya xtal bayal wi'nal ta spamal balumilal. Ja' c'ot ta pasel a te c'alal ay ta muc' ajwalil te Claudioe. 29Jich te jnopojeletic te ayic ta Antioquía, la snopic te ya sticunbeyic scoltayel te quermanotactic te ayic ta sq'uinal Judea, chican te bit'il ya xju' yu'unic juju-jtul te ya yaq'uique. 30Te c'alal tsobajix yu'unique, la sticunic bael ta stojol te ancianoetic te ayic ta Jerusalén. Ja' la yac'beyic bael ta sc'ab te Bernabé soc te Sauloe.


Copyright
Learn More

will be added

X\