Hechos 10

1Ay jtul winic ta lum Cesarea te Cornelio sbiil te centurión yu'un jchajp soldadoetic te Italiano sbiile. 2Xi'oj te Diose soc jun yo'tan xch'uunej soc spisil te mach'a ay yu'un ta snae. Bayal ya sq'uebanlay staq'uin ta scoltayel te judioetique soc spisil ora ya sc'opon te Diose. 3Ay ac'bot yil ta stelemal yilel jtul ch'ul abat yu'un te Diose. Ay niwan oxeb ora c'aal a te la yil tal ta stojole soc te c'oponot yu'une: —Cornelio —xi' la yaiy. 4Te Cornelio la stojlinbey ta ilel sit te ch'ul abate soc bayal xiw yu'un: —¿Bila a, Cajwal? —xi' te Cornelioe. La yal te ch'ul abate: —Dios la sna'atix te bit'il ya ac'opone soc te bit'il ya aq'ueban ataq'uine. 5Jich yu'un ta ora to, ticuna bael winiquetic ta lum Jope, te ya yic' tel te Simón te Pedro yan sbiile. 6Ja' smajanejbey sna te Simón te jc'a'tesej-nujc'ule te ay sna ta nopol ti'mare. [Ja' me ya yalbat te bila ya sc'an ya apase] —xi' te ch'ul abate. 7Te c'alal bajt' te ch'ul abat te yac ta c'op soque, la yic' tel cheb te abatetic yu'un soc jtul soldado te spisil ora ya yabatin soc te jun yo'tan xch'uunej te Diose. 8La yaanbey yaiyic spisil te bila albote soc la sticun bael ta lum Jope. 9Ta yan c'aalil te bit'il ayiquix ta beele, nopol xc'otiquix ta lum Jope. Jich ora te mo bael ta sba yamac'ul na ta sc'oponel Dios te Pedroe. Olilix c'aal a. 10Tal wi'nal ta yo'tan la yaiy. Yo'tan nax c'an we'uc. Ja'uc me to, te bit'il yac to ta chajbanel te we'elile, ay bila ac'bot yil yu'un Dios ta stelemal yilel. 11Ja' la yil te jamal te ch'ulchane soc coj tel ta lum te bila jich yilel te bit'il muc'ul sábana-pac' te chucbil xchanebal te xchiquine. 12Ta bay yutil te paq'ue, la yil tey a spisil ta jchajp chambalametic soc chanetic soc mutetic. 13Soc la yaiy stojol ay mach'a c'oponot yu'un te jich la yale: —Pedro, jajch'an, mila ati' —xi' sc'oplal la yaiy. 14La yal te Pedroe: —Ju'u, Cajwal. Ma'yuc bay jti'oj xujt'uc te bila ma lecuc sc'oplale soc te bila ilaybile —xi'. 15Soc c'oponot xan ta xchebal buelta te jich la yale: —Te bila lecubenix yu'un te Diose, ma me xawal te ma lecuc sc'oplale —xi'. 16Oxeb buelta ac'bot yil jich in to. Jich cha'sujt' moel ta ch'ulchan te sábana-paq'ue. 17Te bit'il yac ta aiyej yo'tan a te Pedro te bi swentailuc te bila ac'bot yile, jich ora c'otic ta ti'nail te abatetic yu'un te Cornelio te la sjojq'uiyic tel ta banti ay sna te Simone. 18Soc la yawtayic te yajwal nae. La sjojc'obeyic teme tey smajanej na te Simón te Pedro yan sbiile. 19Te Pedro yac to ta snopel ta yo'tan te bi swentailuc te bila ac'bot yile, te albot yu'un te Ch'ul Espiritue: —Aiya awaiy, ay oxtul winiquetic ya sleat. 20Jajch'an, coan bael, soc joina bael. Ma me bi xyaan awo'tan, yu'un jo'on la jticun tel —xi'. 21Jich yu'un te Pedroe co bael ta sc'oponel te winiquetic te ticunbil tel yu'un te Cornelio. Jich la yalbey: —Jo'on te ya aleonique. ¿Bi swentailuc te talexe? —xi'. 22La yalic: —Ja' la sticunotic tel te Cornelio te centurión cu'untique te toj ta winiquile, soc te xi'oj te Diose, soc te lec sc'oplal yu'un spisil te judioetique. Ja' albot mandal yu'un te ch'ul abat te ya sticunat ta iq'uel te ya xbaat ta snae, swenta yu'un ya yaiy stojol te bila ya awalbeye —xiic. 23Jich te Pedro la yic' ochel ta na. Tey la yac' wayuc a. Ta yan c'aal la sjoin bael, soc la yic' bael sjoin cha'oxtul te quermanotactic te ainemic ta Jope. 24Ta yan to c'aalil ochic ta lum Cesarea te banti yac ta maliywanej te Cornelio soc spisil te xchapomale soc te mach'atic jun yo'tan sba soque. 25Te c'alal och ta sna Cornelio te Pedroe, tal ta tael ochel yu'un soc la stinan sba coel c'alal ta lum ta yich'el ta muc'. 26Ja'uc me to, te Pedro la yac' jajch'uc. Jich la yalbey: —Jajch'an, tejc'ana aba, melel winicon uuc jich te bit'ilate —xi'. 27Yac ta c'op soc te och bael ta snae. Tey c'o sta te tsobol ta jtul te mach'atic stsoboj sbaique. 28Jich te Pedro jajch' yalbey yaiyic: —Te ja'exe ya ana'ic stojol te ay mandalil cu'untic jo'otic te judiootic te ma xju' ya join jbatic soc te mach'a jyanlum, ni ya xju' ya x'ochotic ta sna. Ja'uc me to, Dios la yac'bonix jna' stojol te ma xju' cal te ma lecuc sc'oplal jtuluc ants-winic soc ma xju' ya quilay. 29Ja' swentail te ma'yuc bi la cal yu'un xujt'uc te c'alal la aticunon ta iq'uele. Jich yu'un ya me awalbon te bi swentailuc te la aticunon ta iq'uele —xi'. 30Jich jajch' yal te Cornelioe: —Ayix ta xchanebal c'aal, jich ora bit'il to, jpasoj ayuno soc yacon ta sc'oponel Dios li' ta bay jna to, jich bit'il te ay ta pasel ta swenta oxeb ora xmalel te c'aale. Te c'alal yacon ta sc'oponel Dios a, chicnaj ta jtojol jtul winic te xlemet nax xojobil te sc'u'-spaq'ue 31te jich la yalbone: “Cornelio, Dios la yaiybat stojol te bit'il ya ac'opone, soc la sna'atix te bit'il ya aq'ueban ataq'uine. 32Jich yu'un ticuna ta iq'uel ta lum Jope te Simón te Pedro yan sbiile, te smajanejbey sna te yan Simón te jc'a'tesej-nujc'ule te ay sna ta nopol ti'mar. [Te c'alal ya xtale, ay me bi ya yalbat]”, la yuton. 33Jich la jticunat ta iq'uel ta ora nax. Bin nax co'tan yu'un te talatixe. Jich yu'un ta ora to, jpisiltic li' ayotic to ta stojol te Diose, yu'un ya jc'an caiytic stojol spisil te bila yalojbatix tel ta mandal te Diose —xi' te Cornelioe. 34Jich te Pedro jajch' ta c'op. Jich la yal: —C'otix ta co'tan, te ma'yuc mach'a tsabil nax yu'un te Diose. 35Melel ta bay juju-jchajp nación lec ya yil spisil mach'a ya x'ich'ot ta muc' yu'un soc te ya yat'elinic spasel te bila leque. 36Dios la sticun ta alel ta stojol te israeletique te bit'il ya xju' te lamal q'uinal ya caiytic ta swenta te Jesucristoe, te ja' Ajwalil yu'un spisil te ants-winiquetique. 37Te ja'exe ana'ojic stojol te bila c'ot ta pasel ta spamal sq'uinal te judioetique. Tey jajch' ta sq'uinal Galilea te c'alal lajix yo'tan ta xcholel sc'oplal ich'ja' a te Juane. 38Melel awaiyojbey stojol sc'oplal te Jesús te talem ta lum Nazarete. Dios la yac'bey yu'el ta swenta te Ch'ul Espíritu te la yac'bey yiq'ue. Jich bayuc been ta scoltayel te ants-winiquetic soc ta slamantesel spisil te mach'atic ay swocolic ta uts'inel yu'un te pucuje. Jich ju' yu'un spasel, melel sjoinej te Diose. 39Jo'otic testigootic yu'un spisil te bila la spas Jesús ta bay sq'uinal te judioetique soc ta Jerusalén. Ja'uc me to, la smilic ta jijp'anel ta cruz-te'. 40Dios la xcha'cuxes ta yoxebal c'aal soc la yac'botic quiltic. 41Ma spisiluc te jlumal te ac'bot yilique, jo'on nax soc te jo'taque, te namey tsabilotic yu'un Dios te ja' testigo ya xc'ootic yu'une. La join jbatic soc ta we'el-uch'ajel te c'alal cha'cuxix tel ta bay te animaetique. 42Soc la spasotic ta mandal te ya calbeytic sc'oplal ta stojol te lume, soc te ya cac' jbatic ta testigo te bit'il Dios la yac'beyix yat'el ta juez ta stojol te mach'atic cuxulique soc te mach'atic lajemique. 43Soc ja' te mach'a la yalbeyic sc'oplal ta neelal to te j'alwanejetic yu'un te Diose, te bit'il ja' ta swenta sbiil Jesús te ya spasbot perdón yu'un smulic spisil te mach'atic ya xch'uunique —xi' te Pedroe. 44Yac to ta c'op a te Pedroe, jul ta swentaic te Ch'ul Espíritu te mach'atic yacalic ta yaiyel stojol te bila yac ta yalele. 45Te mach'atic yich'ojic te circuncisión te sjoinejic tel te Pedroe, jchajp nax la yilic te pujc' te Ch'ul Espíritu ta swentaic te jyanlumetique, 46melel la yaiyic stojol te yacalic ta c'op ta yantic c'opiletic soc yacalic ta yalel wocol ta stojol te Diose. 47Te Pedro jich la yal: —¿Mach'a c'an scom teme ya x'ac'bot yich'ic ja' in yipalic to? Melel ac'botix yiq'uic te Ch'ul Espíritu jich nix te bit'il te jo'otique —xi'. 48Jich la yal mandal te ya x'ac'bot yich'ic ja' ta swenta sbiil te Jesucristoe. Jich yu'un la yalbeyic wocol te Pedro te yacuc sjoinic che'oxebuc c'aale.


Copyright
Learn More

will be added

X\