2 Timoteo 3

1Ya sc'an ya ana' stojol in to, te c'alal nopolix a te slajibal c'aale, ya me xtal te bila c'ax chujc'ultic sba ta q'uinale. 2Melel te ants-winiquetique, stuquel nax ta juju-jtul te c'ux ya yaiy sba ta yo'tane, biq'uit nax yo'tanic yu'un te taq'uine, yich'oj sbaic ta muc' stuquelic, jtoybaetic, jtoybac'optaywanejetic, soc ma xch'uunic mandal ta stojol te sme'-statique. Ma'yuc yutsil yo'tanic, soc ma'yuc Dios ta yo'tanic. 3Ma'yuc xc'uxul yo'tanic, soc ma xju' ta utstesel yo'tanic. Jowil jle-muliletic, ma sna' scombel sbaic, c'ax jelawenic ta uts'inwanej, soc sp'ajojic spisil te bila leque. 4J'ac'awanejetic ta c'abal, jc'ajc'al c'opetic, cajal yac'oj sbaic. Ja' nax baem ta yo'tanic sleel te bila jelawen yutsil sbujts' ta yo'tanique. Ma ja'uc baem ta yo'tanic te bila swenta te Diose. 5Mero xch'uunejic Dios yilel, ja'uc me to, ta swenta yat'elic, ma xchicnaj ta smelelil te bila xch'uunejique. Ma me xajoin te mach'atic jich yo'tanic in to. 6Melel ja'ic te ya x'ochic ta naetique, yu'un ya slo'layic antsetic te ma'yuc yip yo'tanique. C'ax bolobenic yu'un mulil, soc nitbil yo'tanic ta spasel spisil te bila ya sc'an te sbaq'uetalique. 7Spisil ora jich yacalic ta snopel te biluc nax nopjibale, ja'uc me to, ma'yuc bi ora ya xc'ot ta yo'tanic te smelelil c'ope. 8Jich bit'il la scontroin Moisés ta Egipto te Janese te Jambrese, ja' nix jich te ants-winiquetic ta ora to, c'ax boloben te yo'tanique, scontroinejic te smelelil c'ope, soc xujt' ma ba c'oem ta yo'tanic te bit'il ay te xch'uunjel-o'tanile. 9Ja'uc me to, ma jc'axeluc ya xju' yu'unic, melel ya xchicnaj ta ilel ta comonsitil te ma'yuc bi ya sna'ic xujt'uque, jich bit'il te cha'tul te la scontroinic te Moisese. 10Yan te ja'ate, ja' at'unoj te nopjibal cu'une, te bi yilel te cat'ele, te bila cantayej spasele, te xch'uunjel co'tane, te yip co'tane, te xc'uxul co'tane soc te ts'ijq'uem cu'un te jwocole. 11Soc awilojbon jwocol ta uts'inel soc ta woclajel, jich bit'il ta lum Antioquía soc ta lum Iconio soc ta lum Listra. Bayal c'ax jwocol ta uts'inel tey a, ja'uc me to, ta spisil la scoltayon loq'uel te Cajwaltique. 12Ja' nanix jich ya me xc'ax swocolic ta uts'inel spisil te mach'atic yat'elinejic xch'uunel te Cristo Jesuse. 13Yan te mach'atic amen yat'elic soc te jlo'laywanejetique, yanyanic ta bolobel stuquelic. Yaquic ta lo'laywanej soc yaquic ta lo'layel uuc. 14Ja'uc me to, te ja'ate ma me xawijq'uitay te bila anopoj soc te bila ach'uuneje, melel ana'oj te mach'atic la yac'bat anope. 15Melel ta awalalil to ana'oj te bila ts'ibubil jilel ta Xch'ul Sjun te Diose, te ja' ya yac'bat sp'ijil awo'tan te bit'il ya xcolat ta swenta xch'uunjel awo'tan ta stojol te Cristo Jesuse. 16Spisil te bila ts'ibubil ta Sjun te Diose, loq'uem tel ta yo'tan te Diose. Ya xtuun cu'untic ta swenta p'ijubtesel, ta swenta comel, ta swenta tojobtesel, soc ta swenta tac'uyel ta stojil, 17soc swenta yu'un jich me chapal ya xc'ot te yabat te Diose. Jich me p'ijuben ta lec ta spasel spisil te lequil at'elile.


Copyright
Learn More

will be added

X\