2 Timoteo 1

1Jo'on Pabloon te ayon ta jpuc-c'op yu'un te Jesucristoe, ticunbilon ta swenta sc'anjel yo'tan Dios, te yalojix te ja' nax ay cuxlejal ta swenta te Cristo Jesuse. 2Ya jts'ibubat in carta to, Timoteo, ja'at jnich'anat te c'uxat ta co'tane. Ac'a me yac'bat bayal yutsil yo'tan te Jtatic Diose soc te Cajwaltic Cristo Jesuse. Ac'a me xc'uxtayat soc lamaluc me q'uinal ya awaiy yu'unic spisil ora. 3Ja'uc me to, c'aal ajc'ubal ya xjulat ta co'tan te c'alal ya jc'opon te Dios ta yalel wocol. Jun co'tan cac'oj jba ta abatinel yu'un, jich bit'il la spasic te me'il-tatiletic cu'une. 4Spisil ora ya xjul ta co'tan te bit'il bayal oc'at cu'une. Toyol co'tan te yacuc quilbat xan asit. Jich me ya xbujts'naj xan ta lec co'tan awu'un. 5Melel ya xjul ta co'tan te ay xch'uunjel awo'tan ta melele, jich bit'il ay xch'uunjel yo'tan te Loida, te sme' te ame'e, soc te ame' Eunice. Jna'oj ta lec te bit'il jich nix ay xch'uunjel awo'tan uuc te ja'ate. 6Jich yu'un, ya calbat te toyoluc me awo'tan ta stuuntesel te amajt'an yu'un spasel yat'el te Diose, te ac'botat ta awenta te c'alal la jcajanbat jc'ab ta ajole. 7Melel te Diose ma ja'uc yac'ojbotic te ya xiw co'tantique. Ja' yac'ojbotic yip co'tantic soc xc'uxul co'tantic, soc te bit'il ya jna'tic stsajtaybel jbajtique. 8Jich yu'un ma me xq'uexawat yu'un te ya awalbey sc'oplal te Cajwaltique; soc ma me xq'uexawat cu'un uuc te bit'il ayon ta chuquel ta swenta. Ts'ica awocol uuc te melel pajal ya jta jwocoltic ta swenta te lec yach'il c'op te ya caltique. Ja'uc me to, ya scoltayotic ta swenta yu'el te Diose. 9Dios la scoltayotic soc la yic'otiquix ta stojol, jich me ch'ul lum ya xc'ootic yu'un ta melel. Ma yu'unuc ay bila lec ju'em cu'untic spasel, ja' nax ta swenta te jich la snop ta yo'tane. C'alal ma to chicanuc a te balumilale, la snop ta yo'tan te ya sc'uxtayotic ta swenta te Cristo Jesuse. 10La yac' chicnajuc te yutsil yo'tan ta jtojoltic ta ora to te bit'il xtaluc te Jcoltaywanej cu'untique, ja' te Jesucristoe. Ja' xtaluc slajinbey yu'el te lajele, soc la yac' ta ilel ta swenta te lec yach'il c'op te bit'il ay cuxinel te ma xlaj sbajt'el q'uinale. 11Dios la yac'bon quich' cat'el ta xcholel ta bayuc te lec yach'il c'ope, soc ja' la sticunon ta jpuc-c'op soc ta jp'ijubteswanej ta stojol te jyanlumetique. 12Ja' swentail te ay jwocol yu'un ta ora to. Ja'uc me to, ma ba ya xq'uexawon yu'un, melel ya jna' te mach'a jch'uuneje, soc xch'uunej co'tan te bit'il ay yu'el ta scanantayel te bila cac'ojix jilele ja' to te c'alal ya sta sc'aalelal te ya xcha'tal xane. 13Ma me xawac' ch'ayuc ta awo'tan te lequil c'op te awaiyoj stojol cu'une. Jujun c'aal ayuc me xch'uunjel awo'tan soc xc'uxul awo'tan ta swenta te Cristo Jesuse. 14Soc canantaya me te bila lec ac'bilat jilel ta awenta yu'un te Diose. Ja' me ya scoltayat ta scanantayel te Ch'ul Espíritu te ainem ta co'tantique. 15Jich bit'il awaiyoj stojol, la yijq'uitayonix ta yo'tanic ta jc'axel spisil te mach'atic ayic ta smaquen-q'uinal Asia, jich bit'il te Figelo soc te Hermógenes. 16Ja'uc me to, ac'a me yich' c'uxtayel yu'un Cajwaltic te mach'a ay yu'un te Onesíforo, te melel bayal buelta xtaluc smuc'tesbon co'tan, soc ma ba q'uexaw yu'un te bit'il ayon ta chuquel ta cadenae. 17Yu'un te c'alal tal ta Romae, la yac' puersa ta slebelon ja' to te la staone. 18Ac'a me yich' c'uxtayel yu'un Cajwaltic te bi ora ya sta sc'aalelal te ya xcha'tal xane. Te ja'ate ana'oj ta lec te bit'il bayal la yac' sba ta abatinel cu'untic ta lum Efeso.


Copyright
Learn More

will be added

X\