2 Tesalonicenses 3

1Quermanotac, slajibalix ya calbeyex in to: C'oponbotic me Dios te ya me xpujc' ta ora ta bayuc te sc'op te Cajwaltique, soc te ya me x'ich'ot ta muc' yu'un te ants-winiquetique, jich nix te bit'il c'ot ta pasel ta awolilic te ja'exe. 2Soc c'oponbotic me Dios te ya me scoltayotic ta sc'ab te winiquetic te ixta yo'tanique, amen te bila ya spasique, melel ma'yuc xch'uunjel yo'tanic. 3Ja'uc me to, jun yo'tan te Cajwaltique. Ya me stulantesbeyex awo'tanic spisil ora, soc ya me scanantayex te ma xyaq'uex ta uts'inele. 4Xch'uunej co'tantic ta swenta te Cajwaltique, te yacalex ta spasel te bila la calbeyex ta mandale, soc te jich nix ya apasic bael spisil ora. 5Ac'a yac'beyex ta awo'tanic te Cajwaltic te bit'il ay xc'uxul yo'tan te Diose, soc te bit'il ts'ijc' yu'un Cristo te swocole. 6Quermanotac, ya calbeyex xan mandal ta swenta te Cajwaltic Jesucristoe: Ma me xajoin aba soc te quermanotic te chican nax te bila ya spase soc te ma jichuc ya spas te bit'il la cac'beyex anopique. 7Te ja'exe ya ana'ic te bit'il ya sc'an ya anopic te ejemplo la cac'beyex awilique. Melel te c'alal ayotic ta awolilic ma la cac'beyex awilic ch'ajilal, 8soc ma jmajt'anticuc we'otic yu'un yan. Lubotic ta at'el ta c'aal ajc'ubal, yu'un ma la sc'an co'tantic te la cac'beyex awocolic jtuluc te ja'exe. 9Ma yu'unuc te ma'yuc ta jwentatic te la jc'anbeyex te bila tuun cu'untic te jichuque. Ja'uc me to, at'ejotic swenta yu'un jich me ya awilic te ejemplo te bit'il ya sc'an te ya x'at'ejex uuc te ja'exe. 10Melel te c'alal ayotic ta awolilique, jich la calbeyex mandal: “Te mach'a ma sc'an x'at'eje, ma me xwe'”, xootic. 11Pero ay caiyojtic stojol te ay cha'oxtulex te ma x'ac'an te ya x'at'ejexe soc te ma'yuc swentail ya xc'ax c'aal awu'unique. 12Te mach'atic jich ya spasique, ya me jtac'uytic soc ya me calbeytic mandal ta swenta te Cajwaltic Jesucristoe: Ac'a at'ejuc ta spasemal yo'tan swenta yu'un jich me ya sta swe'el a. 13Quermanotac, ma me xlubex ta spasel te bila leque. 14Teme ay mach'a ma xch'uun spasel te bila la caltic li' ta carta to, na'beya me sba. Ma me xajoinic stuquel swenta yu'un jich me ya xq'uexaw. 15Ja'uc me to, ma me yu'unuc contro ya awilic. Tac'uyaic ta sbelal te bit'il awermano aba soque. 16Te Cajwaltic te lamal q'uinal ta swentae, ac'a slamantesbeyex awo'tanic ta spisil ora chican te bi awilelic ayexe. Ac'a sjoinex ta apisilic stuquel te Cajwaltique. 17Ja' spatjibal xan awo'tanic cu'un in to jo'on te Pabloone. Jich ay te jfirmae. Ja' me seña ya cac' ta bay spisil cartaetic te ya jpase. 18Ja' ac'a yac'beyex te yutsil yo'tan ta apisilic te Cajwaltic Jesucristoe. Jichuc.


Copyright
Learn More

will be added

X\