2 San Pedro 1

1Jo'on Simón Pedroon, yabaton te Jesucristoe soc jpuc-c'opon yu'un. Ya jpatbeyex awo'tanic ja'ex te ay xch'uunjel awo'tanic, te jelawen yutsil jich te bit'il jch'uunejtique. Melel te Diose soc te Jcoltaywanej cu'untique, ja' te Jesucristoe, toj yo'tan stuquel. 2C'axem to xan ac'a yac'beyex bayal yutsil yo'tan soc lamaluc me q'uinal ya awaiyic yu'un ta swenta bit'il ana'ojbeyic sba te Diose soc uuc te Cajwaltic Jesucristoe. 3Ta swenta yu'el te Diose, yac'ojbotiquix te bila ya xju' ya xcuxinotic yu'une soc te spisiluc ora ya jna'tic te Diose. La yac' jna'beytic sba te Mach'a la yic'otic ta stojol, ta swenta te smuc'ul yutsilal soc ta swenta te jchajp at'eliletic te la yac'botic quiltique. 4Ta swenta in to, jelawen yutsil ta c'axem to xan te bila yalojbotic te ya yac'botic ta patile. Swenta yu'un pajal quileltic ya xc'ootic soc te bit'il ay te Diose, soc te libre ya xjilotic yu'un spisil sbolil te bila mulanbil ta pasel ta balumilale. 5Jich yu'un, ya sc'an te ya awaq'uic puersa te ya x'esmaj xch'uunjel te awo'tanique. Soc lecuc me spisil te bila ya apasique. Soc na'aic xan lec te q'uinale. 6Teme la ana'iquix te q'uinale, na'aic me amandaltesbel abaic atuquelic. Teme la amandaltes abaique, ac'a ts'ijc'uc awu'unic. Teme ts'ijc' awu'unique, na'aic me spisil ora te Diose. 7Teme la ana'ic spisil ora te Diose, junuc me awo'tan abaic soc te awermanotaque. Teme junaj awo'tanique, c'ux me x'awaiy abaic. 8Melel teme ayix awu'unic spisil in to, soc teme yaquix ta esmajel ta awo'tanique, jich ma tojoluc te cuxulex ta q'uinale, soc jich ma tojoluc te la ana'beyiquix sba te Cajwaltic Jesucristoe. 9Yan te mach'a ma'yuc yu'une, pajal c'oem soc jtul ma'sit, soc pajal c'oem soc te mach'a ma'yuc yip te site. Melel ch'ayix ta yo'tan te bit'il la yich' poquel te smul sleoj ta neelal toe. 10Jich yu'un, quermanotac, te bit'il ic'bilex yu'un te Diose soc tsabilex yu'un, jc'axeluc me ismajuc ta awo'tanic. Teme jich ya apasique, jich ma ba ya xyalex xan ta mulil. 11Jich me muc' nax ya xjambotex ochel sbelal ta bay ay ta muc' ajwalil sbajt'el q'uinal te Cajwaltic Jesucristoe, te Jcoltaywanej cu'untique. 12Jich yu'un, ya me jultesbeyex xan ta awo'tanic in to, manchuc teme ana'ojiquixe, jc'axel ainuc me ta awo'tanic te smelelil c'op awaiyojiquix stojole. 13Te bit'il cuxulon toe, ay ta jwenta te ya jtac'uyexe. 14Yu'un yac'ojbonix jna' stojol te Cajwaltic Jesucristo te nopolix ya quijq'uitay jilel te jcuxlejal ta q'uinale. 15Jich ya jpas xan te bay c'alal ya xju' cu'une, swenta yu'un te c'alal lajemonix ae, ya me xjul ta awo'tanic te bila la calbeyexe. 16La cac'beyex anopic te bit'il ay yu'el te ya xcha'tal xan te Cajwaltic Jesucristoe. Ma ja'uc la calbeyex awaiyic jowil lo'laywanej c'op te ay lajel ta swentae, melel la quiltic ta jsitic soc smuc'ul yutsilal te Cajwaltique. 17La quiltic ta sitic te c'alal chicnantesbot yutsilal soc ac'ot ta ich'el ta muc' yu'un te Jtatic Diose. Soc la caiybeytic stojol yutsil sc'op te Diose: “Ja' in to, ja' Jnich'an te bayal c'ux ta co'tan te bin nax co'tan yu'une”, te xie. 18Jo'otic la caiytic stojol ta jchiquintic te c'opoj tel ta ch'ulchane, melel tey joinej jbatic soc a te Cajwaltic ta bay te ch'ul witse. 19Jich ya jna'tic te smelelil te bila yalojic jilel te namey q'uinal j'alwanejetique. Ja' lec te bit'il awich'ojic ta muc' te c'op yalojique, te melel pajal soc lámpara te tilem ta ijc' q'uinale, ja' to teme sacub q'uinale, soc ja' to teme loc' tel te muc'ul ec' swenta sacubel q'uinal te ya yac' sacub q'uinal ta awo'tanique. 20Ja'uc me to, ya sc'an te neel ya ana'ic stojol in to: Jtul ma'yuc mach'a ya sna' xcholel ta stuquel nax te bila ts'ibubil jilel ta Sjun Dios yu'un te j'alwanejetique, 21te melel ma sc'anjeluc nax yo'tanic te c'opojic te namey q'uinal j'alwanejetique. Melel ja' ac'bot sna' ta yo'tanic yu'un te Ch'ul Espíritu te c'opojique, te melel u'uninbilic yu'un Dios te winiquetique.


Copyrighted Material
Learn More

will be added

X\