2 Corintios 8

1Ta ora to, quermanotac, ya calbeyex awaiyic te bit'il chicnajix yutsil yo'tan Dios ta stojol te jch'uunjeletic te ayic ta sq'uinal Macedoniae. 2Ay bayal sbujts' yo'tanic, manchuc teme c'axix bayal yaiyjibal yo'tanic ta controinele. Soc manchuc teme mero me'ba ayique, ja'uc me to, c'ax bayal la stsobic te coltayele, jich c'oem te bit'il ay sc'ulejalic yilele. 3Ja' testigoon yu'unic te soc yo'tanic la yaq'uic juju-jtul ta bay c'alal ju' yu'unique, soc c'ax to xan jich la yaq'uic a te bit'il ya xju' ta aq'uel yu'unique. 4La yalbotic bayal wocol te yacuc xju' ya yaq'uic uuc te coltayel yu'un te mach'atic ch'ul lum yu'un Dios ta Jerusalén. 5C'ax jich ju' yu'unic yaq'uel a te bit'il yacotic ta smaliyele. Melel neel la yac' sbaic ta abatinel yu'un te Cajwaltique soc la yac' sbaic ta abatinel ta jwentatic ta swenta sc'anjel yo'tan te Diose. 6Jich yu'un la calbeytiquix wocol te Titoe, yacuc xba sju'tes ta stsobel te coltayele, te ja' nix neel jajch' stsob ta awolilique. 7Jich yu'un te ja'exe, c'ax jich ju'emix awu'unic te bit'il yantique. C'ax jich ay xch'uunjel awo'tanic, soc c'ax jich ya ana'ic c'op, soc p'ijubenex ta lec, soc c'ax jich toyol awo'tanic, soc c'ax jich c'uxotic ta awo'tanic. Jich yu'un ya sc'an te c'ax jich ya atsobic te coltayel te bit'il te yantique. 8Ma yu'unuc ya calbeyex mandal. Ja' nax ya jc'an te ya ana'ic stojol te bit'il toyol yo'tanic te yantique, swenta yu'un tey me ya jna' a teme ay xc'uxul awo'tanic ta mero melele. 9Melel ana'ojiquix te bit'il ay yutsil yo'tan te Cajwaltic Jesucristoe. Manchuc teme ay sc'ulejale, ta swenta xc'uxul yo'tan awu'unic te la sc'atp'un sba ta me'ba, swenta yu'un jich me ya yac'beyex ac'ulejalic ta swenta bit'il la yac' sba ta me'ba stuquel. 10Ta ora to, ya calbeyex mandal. Ja' lec teme ya aju'tesic te bila jajch' apasic ta c'ax tel ja'wile. Melel neel jajch'ex ta stsobel yu'un te yantique soc ja'ex atuquelic te neel bin nax awo'tanic ta spasele. 11Ta ora to, binuc nax me awo'tanic ta sju'tesel ta tsobel, jich te bit'il bin nax awo'tanic jajch'ex ta neelale. Ac'a yac' juju-jtul chican te bit'il ay yu'unique. 12Melel te mach'a toyol yo'tan te ya yaq'ue, lec ya yil te Diose te jich yipal ya xju' yu'un ya yaq'ue. Ma ba c'ax jich ya xc'anbotic a te bila ma'yuc yu'unique. 13Te bit'il jich ya calbeyexe, ma yu'unuc ja' ya jc'an te ay bayal bila ay yu'unic soc te ja' ya xjilex ta wocol yu'une. Ja' ya jc'an te pajaluc ma'yuc awocolique. 14Ta ora to, ay bayal bila ay awu'unic. Jich ya xju' awu'unic te ya acoltayic te yantique te bit'il bayal bila ya spas falta yu'unic stuquelique. Ta yan buelta te c'alal ay bayal bila ay yu'unique, jich me ya scoltayex uuc teme ay bila ya spas falta awu'unique. Jich me pajal ay bila ay awu'unic ta apisilic, 15jich te bit'il ts'ibubil jilel ta Sjun te Diose: “Te mach'a bayal la stsobe, ma la spas sobrail yu'un. Ja' nanix jich te mach'a jteb nax la stsobe, ma la spas falta yu'un”, te xie. 16Ja'uc me to, wocol la yal Dios te bit'il la yac' sna'ex ta yo'tan te Titoe, jich te bit'il bayal ya jna'ex te jo'one. 17La xch'uunbonix te ya xtal yilexe. Jich yu'un, ta ora to spasemal yo'tan ya xtal yilex, melel toyol yo'tan awu'unic. 18Soc pajal la jticuntic soc Tito jtul quermanotic te lec sc'oplal yu'un spisil te jch'uunjeletic ta swenta bit'il lec at'ejemix ta spuquel te lec yach'il c'ope. 19Soc ja' nix la yich'ix tsael yu'un uuc spisil te jch'uunjeletic te li' ayic to te ya sjoinotic ta beel, swenta yu'un ya jwentaintic bael te coltayele. Jich ya jpastic swenta yu'un ya x'ich'ot ta muc' yu'un a te Cajwaltique, soc jich me ya xchicnaj te bin nax co'tantic ta stojole. 20Ja' ya jc'antic te ma'yuc mach'a ya slebotic jmultic yu'un te coltayel te c'ax bayal te jwentainejtic stsobele. 21Jich me ya jtsajtaytic te ma me ayuc falta ya jtatic ta stojol te Diose soc ta stojol te ants-winiquetique. 22Soc ay yan quermanotic te pajal la jticuntic soc te Titoe. Bayal buelta quilojtic te toyol yo'tan ta stojol te Cajwaltique, soc c'axem to xan ta ora to, te melel jun yo'tan ta atojolic. 23Jich bit'il te Titoe, ja' joy jba ta at'el soc ta atojolic. Soc te cheb xan quermanotactique, ja'ic ticunbilic yu'un spisil te jch'uunjeletic li'to, soc ja' yac'ojic ta ich'el ta muc' te Cristoe. 24Swenta yu'un jich me ya sna'ic stojol spisil te jch'uunjeletique, ac'beya yilic te bit'il ay xc'uxul awo'tanic ta mero melel, soc te bit'il ma tojoluc te toyol nax q'uinal ya caiytic awu'unique.


Copyright
Learn More

will be added

X\