2 Corintios 7

1Jich yu'un quermanotac, te c'uxex ta co'tane, te bit'il jich yalojbotic te Diose, jich yu'un ac'a quijq'uitaytic jilel spisil te bila ya sboltesbotic jbaq'uetaltic soc te co'tantique. Soc te bit'il jna'ojtic stojol te xi'bantic sba te Diose, yan yanuc me ta ch'ultesel te co'tantique. 2¡C'ux me x'awaiyotic ta awo'tanic! Melel jtul ma'yuc mach'a la cuts'intic, soc jtul ma'yuc mach'a la jboltestic, soc jtul ma'yuc mach'a la jlo'laytic. 3Ma yu'unuc ya calbeyex te ay amulic ta jtojole. Melel calojbeyex ta neelal te ayex ta co'tane, manchuc teme ya xcuxinotic, manchuc teme ya xlajotic. 4Mero jamal co'tan awu'unic soc toyol nax q'uinal ya caiy awu'unic. Bayal muc'uben q'uinal ya caiy awu'unic soc ay bayal sbujts' co'tan, manchuc teme bayal te uts'inele. 5Te c'alal julotic ta bay te sq'uinal Macedoniae, ma'yuc bay la jtajtic te ya jcux co'tantic soc te jbaq'uetaltique. C'axix jwocoltic ta bayuc. Bayuc nax la jtajtic c'op, soc bayal la jtajtic xiwel. 6Ja'uc me to, te Diose ya me smuc'tesbey q'uinal yaiyic te mach'atic peq'uelique, ja' la smuc'tesbotic q'uinal caiytic te c'alal jul te Titoe. 7Soc ma ja'uc nax muc'ub q'uinal la caiytic yu'un te c'alal jul te Titoe, ja' muc'ub q'uinal la caiytic yu'un te muc'uben nax q'uinal ya yaiy awu'unique. Ja' la yalbotiquix te bit'il toyol awo'tanic te ya awilonique, soc la xcholbotiquix te bit'il bayal la awoq'uetay abaique, soc te bit'il bayal la ana'onique. Jich c'axem to xan bujts'naj co'tan yu'un. 8Manchuc teme la caq'uex ta mel-o'tan ta swenta te carta la jpasbeyexe, ja'uc me to, ma ba ya jmel co'tan yu'un ta ora to. Manchuc teme la jmel co'tan yu'un ta neelale, yu'un la quil te la yaq'uex ta mel-o'tan che'oxebuc c'aal te jcartae. 9Yan ta ora to ay bayal sbujts' co'tan awu'unic. Ma yu'unuc ja' ay sbujts' co'tan yu'un te la amel awo'tanique; ja' ay sbujts' co'tan yu'un te la asujt'es awo'tanic ta scaj te mel-o'tane. Yu'un la amel awo'tanic ta stojol te Diose. Jich ma ba ch'ay te bendición ta atojolic ta jwentatic. 10Yu'un teme ya jmel co'tantic ta stojol te Diose, jich me ya yac' sujt'es co'tantic, soc tey me ya xcolotic a. Jich ma ba ya caiytic xan mel-o'tan ta patil. Yan teme ja' ya jmel co'tantic ta swenta nax te balumilale, ya yac'otic ta lajel stuquel. 11Te bit'il la amel awo'tanic ta stojol te Diose, ¡ilawilic, lec c'oex ta loq'uel yu'un a! Jich jajch' anopic te bit'il ya achajbanique soc te ya xc'opojex cu'une. Melel la yac'beyex ilinuc awo'tanic, soc och xiwel ta awo'tanic yu'un. Ta patil la ana'onic te ya ac'an awilonique, soc la awac'beyic tulan tojobtesel te mach'a ay smule. Tey chicnaj ta jamal a te ma'yuc bila amulinejic ta swenta in c'op to. 12Jich te c'alal la jts'ibubeyex te cartae, ma ja'uc nax ay ta co'tan te mach'a jajch'esej-c'ope soc te mach'a c'ax swocol yu'une. Ja' ay ta co'tan te yacuc xchicnaj xan awilic ta stojol Dios te ay bayal jc'oplal ta awo'tanique. 13Ja' swentail te muc'ubenix q'uinal ya caiytique. Ja'uc me to, c'axem to xan muc'uben q'uinal ya caiytic ta swenta te Titoe. Melel bayal bujts'najem yo'tan awu'unic te bit'il la awac'bey smuc'ul yo'tan. 14La calbey te Titoe te mero lec te awo'tanique. Ma la jta q'uexlal yu'un te bila la calbeye. Jich bit'il smelelil te bila la calbeyexe, jich ma lotiluc spisil te bila la calbey te Titoe, te bin nax co'tan awu'unique. 15Jelawen to xan c'ux ya yaiyex ta yo'tan ta ora to, te melel ya sna'ulay te bit'il la ach'uunbeyic smandal ta apisilic, soc te jun awo'tanic la awic' ta atojolic, soc te bit'il la awich'ic ta muq'ue. 16Ta ora to, ayix smuc'ul co'tan awu'unic soc bayal bujts'najemix co'tan.


Copyright
Learn More

will be added

X\