2 Corintios 6

1Jich yu'un te bit'il joy jbatic ta at'el soc te Diose, ya me jtac'uyex te ma me tojoluc ya xc'ot awu'unic te la yaq'uix ta ilel yutsil yo'tan ta atojolic te Diose. 2Yu'un jich yaloj jilel ta Sjun: “Ja' mero yorail te la caiybat stojol te ac'ope. Ja' sc'aalel colel a te la jcoltayate”, te xie. Ta ora to, ja' yorailix te ay ta ch'uunele, soc ta ora to, ja' sc'aalelalix te colele. 3Ya jtsajtay jbatic te ma'yuc mach'a ya cac'tic yaluc jtuluc cu'untique, swenta ma me ayuc mach'a ya yalbey amen sc'oplal te bit'il quich'oj cat'eltique. 4Jich yu'un ja' ya sc'an ya cac'beytic yilic spisil ants-winiquetic te bit'il abatotic yu'un te Diose, chican te bila ya xtal ta jtojoltique. Ya sc'an sts'ijc' cu'untic te uts'inele, te me'bale, soc te jwocoltique. 5Soc te majele, te chuquele, te awtayel ta controinel yu'un te ants-winiquetique, soc te tulan at'ele, soc te ma'yuc cux-o'tanil ta wayele, soc te ay wi'nal la caiytique. 6Buen toj ya sc'an x'ainotic, soc ay sp'ijil co'tantic, spisil ya xcujch' cu'untic. Soc ay yutsil co'tantic ta swenta te Ch'ul Espiritue, soc te ay xc'uxul co'tantic ta melele, 7soc smelelil te bila ya caltique, soc quich'ojbeytic yu'el te Diose. Ja' cat'ejibtic te bit'il toj ayotic ta q'uinale, ja' ya caiytic tsalaw a soc ja' jmajq'uiltic, ta wa'el ta q'uexen. 8Ay ya x'ich'ototic ta muc', ay ma x'ich'ototic ta muc'. Ay te lec jc'oplaltic ya yalbotique, ay amen jc'oplaltic yu'unic. Ay mach'atic scuyojotic ta jpas-lot, manchuc me smelelil te bila ya caltique. 9Ay ma sna' jbajtic ta sc'opic te ants-winiquetique, ja'uc me to, mero ya sna' jbajtic ts'iin. Ay jc'axel jlajelotiquix, ja'uc me to, cuxulotic ts'iin. Ay ya x'ac'bototic castigo ta majel, ja'uc me to, ma jc'axeluc ya xlajotic yu'un. 10Manchuc teme ay mel-o'tan ta co'tantique, ja'uc me to, ay sbujts' co'tantic spisil ora. Manchuc teme me'baotique, ja'uc me to, ay tsobol mach'atic jc'ulejetic ya xc'ot cu'untic. Manchuc teme ma'yuc bila ay cu'untique, ja'uc me to, spisil cu'uninejtic. 11Quermanotac corintoetic, jamal quejtic ta yalel ta atojolic te bila ay ta co'tantique, melel c'uxbajemex ta co'tantic. 12Ma'yuc banti xchebet co'tantic ta atojolic. Ja'ex atuquelic te xchebet awo'tanic ta jtojoltique. 13Jich ya jc'oponex te bit'il cal-jnich'nabe. Ya calbeyex bayal wocol te yacuc c'uxbajucon ta awo'tanique, jich te bit'il c'uxex ta co'tane. 14Ma me junuc yugo ya xc'oex soc te mach'atic ma ba xch'uunejic te cuxul Diose. ¿Ya bal snujp'in sba soc toj-o'tanil te bila ma stojiluque? ¿Ya bal sjoin sba soc saquil q'uinal te ijc' q'uinale? 15¿Jun bal yo'tan sba soc Cristo te Satanase? ¿Ya bal snujp'in sba soc te mach'a xch'uunej Dios te mach'a ma xch'uunejuque? 16¿Ya bal snujp'in sba te ya x'ain loc'ombaetic ta bay te templo yu'un te Diose? Melel ja'ex temploex yu'un te cuxul Diose, jich te bit'il la yal te Diose: “Ya me xnainon ta yolilic, tey me ya xbeenon a. Jo'on Dioson yu'unic soc lum cu'un ya me xc'otic”, te xie. 17Ja' swentail te jich la yal xane: “Loc'anic me tel ta yolilic, parte me xawac' abaic, xi' te Cajwaltique. Ma me x'atsaquic te bila ilaybile. Jich me jun nax co'tan ya quiq'uex ta jtojol. 18Jo'on me Atatonic ya xc'oon, te ja'exe cal-jnich'nab ya xc'oex, xi' te Cajwaltic te Spisil ya xju' yu'une”, te xie.


Copyright
Learn More

will be added

X\