2 Corintios 5

1Te jo'otique, jich c'oemotic te bit'il jwol na ta balumilal, soc jich c'oemotic te bit'il nail pac' te ma xjalaje. Jna'ojtic te ya xjin te bila jnainejtique, melel Dios spasojbotiquix yan te ya yac' jnaintic swenta sbajt'el q'uinal ta ch'ulchan, te ma ja'uc pasbil ta sc'ab te ants-winiquetique. 2Ja' swentail te yacotic ta ajc'an ta q'uinal te jayeb c'aal jnainejtic in jbaq'uetaltic to, yu'un co'tantic ya x'ac'bototic jnaintiquix te jbaq'uetaltic te ay ta ch'ulchane. 3Jich me ya jlaptic te bit'il c'u'ile, yu'un ma me t'analuc ya xc'ootic. 4Te jayeb c'aal ya jnaintic in jbaq'uetaltic to, yacotic ta ajc'an, yu'un ay bayal jwocoltic ya caiytic. Ma yu'unuc ya jc'antic te ya jloq'uestic te pocol jbaq'uetaltique. Ja' ya jc'antic te yacuc jlaptiquix ta ora te yach'ile swenta yu'un te bila ya xlaje, ya me xc'atp'uj ta swenta cuxinel. 5Ja' swentail te Dios te jich la spasbotic te jich ya xc'ootic ta patil yu'une. Soc ja' nix yac'ojbotiquix te Ch'ul Espíritu, te ja' seña quich'ojtiquix te bila ya yac'botic xan quich'tic ta patile. 6Jich yu'un ay smuc'ul co'tantic spisil ora. Melel jna'ojtic stojol te ma ba ayotic ta mero jnatic te jayeb xan c'aal jnainejtic in jbaq'uetaltic to, yu'un ma to ayucotic ta bay te Cajwaltique. 7Melel ta swenta xch'uunjel co'tantic te yacotic ta beele, ma yu'unuc te chican ta ilel ta jsitique. 8Ayix smuc'ul co'tantic yu'un, soc co'tanticuc te ya quijq'uitaytiquix jilel ta nainel in jbaq'uetaltic to. Yu'un jich me ya xba join jbatiquix soc te Cajwaltique. 9Jich yu'un spisiluc ora toyoluc co'tantic yu'un spasel te bila ya sc'an yo'tan te Cajwaltique, chican teme jnainejtic to te jbaq'uetaltique, o teme la quijq'uitaytiquix jilele. 10Melel jpisiltic ya me xc'o jtejc'an jbatic ta bay chajbajibal yu'un te Cristoe, swenta yu'un juju-jtul ya me yich' te bila ya xc'ot ta swentae, chican te bila spasoj te c'alal snainej to a te sbaq'uetale, chican teme leque o teme ma lecuque. 11Jna'ojtic stojol te bit'il xi'bantic sba te Cajwaltique, jich ya cat'elintic te ya cac'beytic c'otuc ta yo'tanic te ants-winiquetique. Ja'uc me to, Dios ya sna'botic ta lec te bi yilel te co'tantique, soc te ja'exe ya cal te ya ana'botic uuc te bi yilel te co'tantique. 12Ma yu'unuc ya xjajch' caltic xan te lec jc'oplaltique. Ja' nax ya jc'antic te ayuc bit'il toyol q'uinal ya awaiyic cu'untic, swenta yu'un ya me xju' awu'unic te ya asujt'esbeyic sc'opic te mach'atic cajal ya yac' sbaic yu'un te bi yilel yutsilalic ta q'uinale, soc te xujt' ma'yuc sc'oplal yu'unic stuquel te bi yilel te yo'tanique. 13Teme jowejem jol ya awaiyique, ja' ta swenta te Diose. O teme ma ba jowejem jole, swenta awutsteselic ya xc'ot. 14Melel ja' ya sujotic ta co'tantic ya caiytic te xc'uxul yo'tan te Cristoe. Yu'un ya jna'tic te laj yu'un spisilic te jtule, jich lajic ta spisilic. 15Ja' nix jich laj uuc te Cristo ta swenta te ants-winiquetique, swenta yu'un te jayeb cuxulic ta q'uinale, ma ba cuxuliquix ta stuquelic nax, ja' cuxuliquix ta swenta Cristo te laje soc te cha'cux tel ta swentaique. 16Jich yu'un, te jo'otique ma jichuc jnopojtic te bit'il ay te yantique, jich te bit'il ya yalic te mach'atic ayic ta balumilale. Manchuc teme jich jnopojbeytic sc'oplal Cristo jich te bit'il ya yalique, ta ora to ma jichuc c'oemix ta co'tantic te bit'il ya yalique. 17Jich yu'un, te mach'a jun nax c'oemix soc te Cristoe, yach'il ants-winiquix. Jilemix spisil te spocol cuxlejale. Ta ora to, la yich'ix ach'ubtesel ta spisil. 18Ta spisil in to, ja' yat'el te Diose te ja' nix la yac' junajuc co'tan jbatic soc ta swenta te Cristoe. Soc la yac'botiquix cat'eltic ta xcholel te bit'il ya xju' ya xjunaj yo'tan sbaic soc Dios spisil te ants-winiquetique. 19Ja' bi, ja' te Dios ya yac' te ya xjunaj yo'tan sbaic soc te mach'atic ayic ta balumilal ta swenta Cristo. Ma ba ya sna'bey smulic te ants-winiquetique. Soc ja' yac'ojbotiquix cat'eltic ta xcholel te bit'il ya xjunaj yo'tan sbaic soque. 20Jich yu'un teq'uelotic ta c'op ta atojolic ta swenta te Cristoe. Jich c'oem te bit'il ja' ya yal wocol Dios ta atojolic ta jwentatic te jo'otique. Ya calbeyex wocol ta atojolic ta swenta sbiil te Cristoe te ac'a junajuc awo'tanic ta stojol te Diose. 21Melel te Cristoe ma'yuc smul stuquel. Ja'uc me to, te Diose, ja' la yac'bey ta swenta xcuchel te jmultique, swenta yu'un jich me libre ya xc'ootic yu'un jmultic ta swenta bit'il jun c'oemotiquix soc te Cristoe.


Copyright
Learn More

will be added

X\